وبلىستىق جاستار رەسۋرستىق ورتالىعى جىل سايىن ءداستۇرلى تۇردە ۇيىمداستىرىپ وتىراتىن «قار دەسانتى» اكتسياسىنىڭ جالعىزىلىكتى قارتتار مەن مۇمكىندىگى شەكتەۋلى جاندارعا كومەگى مول. قايىرىمدىلىق اكتسياسى اياسىندا ەرىكتى جاستار كەيىنگى ءبىر جارىم ايدىڭ ىشىندە 500-گە تارتا اۋلانىڭ قارىن تازارتىپ شىققان.
بۇل جولى قالا تۇرعىنى ايجان قاسكەنوۆانىڭ ۇيىنە بارعان ەرىكتى جاستار جالعىزباستى جاننىڭ اۋلاسىن باسىپ قالعان كۇرتىك قاردى ءبىر دەمدە-اق كۇرەپ, ەسىگىنىڭ الدىن ايناداي عىپ جالتىراتىپ بەردى. ايجان قاسكەنوۆا جەر ۇيدە تۇرادى. وسىدان ون جىل بۇرىن ينسۋلت الىپ, ارباعا تاڭىلىپ وتىر. «بۇرىن تۋعان باۋىرىم كومەكتەسەتىن. قازىر ول دا ناۋقاستانىپ قالدى. ءوزىمنىڭ قار ارشىماق تۇگىلى, ەسىك الدىنا شىعۋىم مۇڭ. ۆولونتەرلەر ۇيگە ءبىرىنشى رەت كەلىپ وتىر. تەلەفون سوعىپ, وزدەرى حابارلاسقان سوڭ, قارسىلىق تانىتپادىم. كىلەڭ جانىپ تۇرعان جاس بالالار. ءبارى عۇمىرلى, باقىتتى بولسىن. العىستان باسقا ايتارىم جوق», دەيدى مۇمكىندىگى شەكتەۋلى جان.
جاستار رەسۋرستىق ورتالىعىنىڭ جەتەكشىسى اباي دۇيسەكوۆتىڭ ايتۋىنشا, ۆولونتەرلەر ءبىر كۇننىڭ ىشىندە ون شاقتى ءۇيدىڭ اۋلاسىن تازارتىپ شىققان.
«بۇل يگى ءىستى جىل سايىن وتكىزىپ تۇرامىز. اكتسيا قاڭتار ايىندا باستالىپ, كەي جىلدارى ناۋرىزدىڭ اياعىنا دەيىن سوزىلىپ كەتەدى. قالادا تۇراتىن زەينەتكەرلەر مەن مۇمكىندىگى شەكتەۋلى جانداردىڭ مەكەنجايىنا حابارلاسىپ, حال-جاعدايلارىن سۇراپ, قانداي قول كومەك كەرەك ەكەنىن سۇراپ وتىرامىز. ول كىسىلەر دە ءبىزدى ءبىلىپ العان. كەيدە وزدەرى حابارلاسىپ جاتادى. ويتكەنى ءوز كۇشتەرىمەن قار ارشي المايدى. ال جاپ-جاس جىگىتتەرگە ول قيىن جۇمىس ەمەس, جابىلىپ ءجۇرىپ ءاپ-ساتتە-اق كۇرەپ تاستايمىز. ءوزىمىزدىڭ كۇرەك-سۇيمەن, سىپىرعى, شانالارىمىز بار», دەيدى ورتالىق جەتەكشىسى.
قوستانايدىڭ ساقىلداعان سارى ايازىنا قاراماستان كۇرەك ۇستاپ, قار كۇرەپ, قارتتارعا كومەك كورسەتىپ جۇرگەن جىگىتتەردىڭ ىشىندە قاراكوز قىزدارىمىز دا بار. سولاردىڭ ءبىرى – جوعارى وقۋ ورنىنىڭ ستۋدەنتى گۇلايىم ءنابي. كەشە عانا اۋىلدان كەلگەن بويجەتكەن قاسىنداعى بوزبالالاردان قالىسپايدى. وزىنەن ۇلكەن كۇرەككە جارماسىپ الىپ جاعالاسىپ قار كۇرەپ ءجۇر. ايتۋىنشا, ۆولونتەر جاستاردىڭ قاتارىنا قوسىلعانىنا ءبىر جىلداي بولعان.
ء«وزىم اۋىلدا قار ارشىپ ءجۇرىپ ءوستىم. ءبىر جىلدان بەرى ورتالىق ۇيىمداستىرعان ءىس-شارالارعا قالماي قاتىسىپ ءجۇرمىن. وسى جولى قارت كىسىلەرگە جاردەمدەسۋگە كەلدىك. ەرىكتى بولعان وزىمە ۇنايدى. ەلدىڭ باتاسىن الىپ, ىقىلاسىنا بولەنگەن ادام جامان بولمايدى. اتا-انام قولىڭنان كەلىپ جاتسا, ادامعا جاردەمدەس, قايىرىمدى, ساۋاپتى ىستەن قاشپا دەگەندى جادىمىزعا قۇيىپ وتىراتىن», دەيدى گۇلايىم.
قوستاناي وبلىسى