وتكەن اپتادا استانادا حالىقارالىق مەيىرىم كۇنى اتالىپ ءوتتى. مەرەكەنىڭ ماقساتى – ادامدار اراسىندا ىزگىلىك, مەيىرىم-ماحابباتتى ناسيحاتتاۋ جانە قايىرىمدىلىققا تارتۋ. بۇل كۇنى ءتۇرلى يگىلىكتى شارالار ۇيىمداستىرىلىپ, ادامدار ءبىر-بىرىنە سىيلىق تارتۋ ەتەدى. وسى كۇنگە وراي ەلوردادا «Asyl niet» قوعامدىق بىرلەستىگى قايىرىمدىلىق اۋكتسيونىن وتكىزدى.
اۋقىمدى اۋكتسيونعا قازاق سۋرەتشىلەرىنىڭ كارتينالارى مەن كاسىپكەرلەردىڭ قۇندى سىي-سياپاتتارى ۇسىنىلدى. وسىنداي ەرەكشە فورماتتا قايىرىمدىلىق جاساۋ ءۇردىسى بىرلەستىكتىڭ ءداستۇرلى ءىس-شاراسىنا اينالعان. بىلتىر وتكىزىلگەن اۋكتسيوننىڭ ناتيجەسىندە تۇرمىسى تومەن, وبىر اۋرۋىنا شالدىققان, بەس بالانى جالعىز تاربيەلەپ وتىرعان اناعا جاتاقحانادان ءبىر بولمە سىيعا تارتىلعان ەدى. ال بۇگىنگى ءىس-شارادان تۇسكەن قاراجات ءۇشىنشى توپ مۇگەدەگى, وبىر اۋرۋىمەن كۇرەسىپ وتىرعان, سونىمەن قاتار ءۇش بالاسىمەن ۋاقىتشا جەرتولەنى جالداپ تۇرىپ جاتقان سامال كارىموۆاعا قولداۋ كورسەتۋگە جۇمسالدى. ۇيىمداستىرۋشىلاردىڭ ماقساتى – سامالعا جەكەمەنشىك باسپانا سىيلاپ, ەم-دومىنا قاجەت ءدارى-دارمەكپەن قامتاماسىز ەتۋ. بىرلەستىك توراعاسى ايجان مۇقاتاەۆانىڭ ايتۋىنشا, ءار تۇسكەن قاراجاتتىڭ ەسەبى الەۋمەتتىك جەلىدە اشىق جاريالانادى.
– قايىرىمدىلىق جاساۋ – جۇرەكتىڭ ءىسى. وسىناۋ يگىلىكتى ءىس – قازاق حالقىنىڭ دا بويىنا سىڭگەن قاسيەت. جىلۋ جيناۋ, اسار ۇيىمداستىرۋ – ۇجىمدىق كومەك كورسەتۋدىڭ ايقىن ۇلگىسى. وسى داستۇردەن جاڭىلماي ءبىز دە قايىرىمدىلىق ءىس-شاراسىن زامانعا ساي قالىپتاپ, ونى سالتاناتتى جاعدايدا وتكىزدىك, – دەيدى ول.
ايتا كەتەيىك, اۋكتسيونداعى سىيلىقتاردىڭ ەڭ ارزانى – 200 مىڭ, ال ەڭ قىمباتى 800 مىڭ تەڭگەگە ساتىپ الىندى.