الماتىداعى مەملەكەتتىك ورتالىق مۋزەيدە داڭقتى كينورەجيسسەر شاكەن ايمانوۆتىڭ 110 جىلدىعىنا ارنالعان «قازاق كينوسىنىڭ جارىق جۇلدىزى» اتتى مادەني-تانىمدىق كەش ءوتتى. ەرەن تۇلعانىڭ ەسىمىن جاڭعىرتقان ءىس-شارادا شەبەردىڭ تىرشىلىگىندە تۇتىنعان بۇيىمدارى كوپشىلىك نازارىنا ۇسىنىلىپ, شاعىن كورمە ۇيىمداستىرىلدى.
كورمەدەن ورىن العان كورنەكتى ەكسپوناتتاردىڭ قاتارىندا ش.ايمانوۆتىڭ «الدار كوسە» فيلمىنە تۇسكەندە قولىنا ۇستاعان اساتاياعى, ءوزى شەرتكەن دومبىراسى, شاحمات تاقتايشاسى, ءتۇسىرىلىم الاڭىندا پايدالانعان رۋپور, سونداي-اق 1970 جىلى «اتاماننىڭ اقىرى» ءفيلمى تۇسىرىلگەن كامەرا, كيىمدەرى, قالامساپتارى مەن ۇستەل ساعاتى سەكىلدى ەرەكشە جادىگەرلەر بار.
ەسكە الۋ كەشىندە ش.ايمانوۆتىڭ ءىزىن جالعاپ كەلە جاتقان ساحنا ساڭلاقتارى ايتۋلى تۇلعانىڭ ازاماتتىق بولمىسى, كاسىبي شەبەرلىگى, ۇيىمداستىرۋشىلىق قابىلەتى حاقىندا وي ءبولىستى. اتاپ ايتقاندا, ش.ايمانوۆتىڭ ايگىلى شاكىرتتەرى, قازاق كينوسىنىڭ شوقتىعى بيىك تۇلعالارى قازاقستاننىڭ ەڭبەك ەرى ءاسانالى ءاشىموۆ, قازاقستاننىڭ حالىق ءارتىسى نۇرجۇمان ىقتىمباەۆ سىندى ونەر قايراتكەرلەرى ۇلتتىق تەاتر ونەرى مەن كينو سالاسىنىڭ قالىپتاسۋىنا بۇكىل عۇمىرىن ارناعان تۇلعا تۋرالى جىلى ەستەلىكتەرىمەن ءبولىستى.
«شاكەن اعا دارقان ادام بولاتىن. جان-جاعىنا جايىقتاي كەڭ ەدى. ءبىز ول كىسىنىڭ بالاپانى قۇساپ جانىنا ەرىپ جۇرەتىنبىز. ونىڭ اقىندىق قاسيەتى بارىن كوپ ادام بىلە بەرمەيدى. «اكە تۋرالى جىر» دەگەن ءاننىڭ ءسوزىن جازعانىن, تالاي فيلمدەگى جىر جولدارىن, اندەردى لايىقتى كوركەمدەي بىلەتىن تالعامى بيىك تالانت ەدى. قازاق مادەنيەتىنىڭ ورىستەۋىنە ورەلى ۇلەس قوسقان قايراتكەردىڭ رۋحىنا قالاي قۇرمەت جاساساق تا جاراسادى», دەيدى نۇرجۇمان ىقتىمباەۆ.
مەملەكەتتىك ورتالىق مۋزەي ديرەكتورىنىڭ عىلىمي جۇمىستار جونىندەگى ورىنباسارى عاليا تەمىرتونقىزى مەرەيتوي يەسىنىڭ جانرلىق, تاقىرىپتىق كەڭىستىگى تۋرالى ءسوز قوزعاپ, ء«بىزدىڭ سۇيىكتى دارىگەر», «الدار كوسە», «تاقيالى پەرىشتە» سەكىلدى حالىقتىق كومەديالار ءالى كۇنگە دەيىن كورەرمەننىڭ ىقىلاسىنا بولەنىپ كەلە جاتقان, ەسكىرمەيتىن تۋىندىلار ەكەنىن اتاپ ءوتتى.
الماتى