بۇگىن ءماجىلىستىڭ جالپى وتىرسىندا ايەلدەر قۇقىعى مەن بالالاردىڭ قاۋىپسىزدىگىن قامتاماسىز ەتۋگە باعىتتالعان زاڭ جوباسىنا ەنگىزىلگەن نورمالار ءتۇسىندىرىلدى. قۇجاتتا ايەل ادامداردى تۇرمىستىق زورلىق-زومبىلىقتان اراشالاۋ, كامەلەت جاسىنا تولماعان بالالاردى ءولتىرۋ, زورلىق كورسەتۋ ىسىنە بايلانىستى جاۋاپكەرشىلىكتى كۇشەيتەتىن نورمالار قابىلداندى, دەپ جازادى Egemen.kz.
دەپۋتات جۇلدىز سۇلەيمەنوۆا جاڭا نورمالاردىڭ ىشىندە قىلمىستىق كودەكسكە «ۇرۋ» بابى ەنگىزىلگەنىن حابارلادادى.
بۇعان دەيىن قىز-كەلىنشەكتەرگە قول كوتەرۋ, ۇرۋ دەرەگى اكىمشىلىك قۇقىقبۇزۋشىلىق تۋرالى كودەكس شەڭبەرىندە قارالىپ كەلگەن.
ەندى وزىنە ەر ادام قول كوتەرگەنىن ايتىپ, ناقتى دايەك ۇسىنعان ايەل قۇزىرلى ورگاندارعا ارىزدانسا, ونىڭ شاعىمى قىلمىستىق كودەكس اياسىندا قارالادى. سوندىقتان ايەلگە قول كوتەرگەننىڭ دە جازاسى قاتاڭ بولماق.
«ۇرۋ» بابى بويىنشا وسىنداي شاعىم تۇسكەن جاعداي ايقىندالسا ايەلىنە قول كوتەرگەن, شاپالاقپەن تارتىپ قالعان ەر ازاماتتار 25 تاۋلىككە قامالادى. سونداي-اق 80 اەك-كە دەيىنگى مولشەردە ايىپپۇل سالىنۋى مۇمكىن. (80 اەك - 295 360 تەڭگە).
80 ساعاتقا قوعامدىق جۇمىسقا تارتۋ شاراسى دا ەنگىزىلگەن.
اتالعان باپتى حالىق قالاۋلىلارى ءبىرىنشى وقىلىمدا ماقۇلدادى.