استاناداعى ۇلتتىق اكادەميالىق كىتاپحانادا ساتيريك قالامگەر قاناعات ابىلقايىردىڭ «پەرىشتەلەر جوق جەردە» اتتى كىتابىنىڭ تانىستىرىلىمى ءوتتى.
بۇعان دەيىن وقىرمانعا بىرنەشە جيناق تارتۋ ەتكەن جازۋشىنىڭ جاڭا كىتابى «فوليانت» باسپاسىنان جارىق كورگەن. شىعارمانىڭ نەگىزگى ارقاۋى قوعام دەرتىنە اينالعان جەمقورلىق تاقىرىبىنا ارنالعان.
كەش تىزگىنىن ۇستاعان پارلامەنت ءماجىلىسىنىڭ دەپۋتاتى, اقىن جاناربەك ءاشىمجان قالامگەر شىعارماشىلىعىنا توقتالىپ, ونىڭ ساتيرا جانرىندا ءونىمدى ەڭبەك ەتىپ جۇرگەنىن جەتكىزدى.
«ساتيرا – قيىن دا كۇردەلى جانر. سوندىقتان وعان قالام تەربەيتىندەر سيرەك. ماسەلەن, قازاق ادەبيەتىندە ساتيرالىق رومان جازعان سادىقبەك ادامبەكوۆتەن باستاپ وسپانحان اۋباكىروۆ, شونا سماحان ۇلى, سەيىت كەنجەحمەت ۇلى, كوپەن امىربەك, ۇمبەتباي ۋايدين سەكىلدى ارداقتى اعالارىمىز وسى جانردى ءبىر بيىككە كوتەردى. وسى ساتيرا ساڭلاقتارىنىڭ جولىن ءساتتى جالعاعان قالامگەردىڭ ءبىرى – قاناعات ابىلقايىر. ونىڭ ءار شىعارماسىن وقىرماندار ىزدەپ ءجۇرىپ وقيدى. بۇگىنگى تۇساۋى كەسىلگەن جيناعىندا قوعامنىڭ كەلەڭسىز كورىنىستەرى كوركەم بەينەلەنگەن», دەدى ول.
ودان كەيىن ءسوز العان بەرىك سادىر, باۋىرجان باباجان ۇلى, داۋلەتكەرەي كاپ ۇلى جانە تاعى باسقا دا قالامگەرلەر اۆتوردىڭ تۋىندىسى تۋرالى وي-پىكىرلەرىن ورتاعا سالىپ, ىزگى لەبىزدەرىن ءبىلدىردى.
بەلگىلى سىنشى, حالىقارالىق «الاش» ادەبي سىيلىعىنىڭ لاۋرەاتى امانگەلدى كەڭشىلىك ساتيرالىق جانردا كوركەم شىعارما جازۋ ەكى سۋرەتكەردىڭ ءبىرىنىڭ قولىنان كەلمەيتىنىن تىلگە تيەك ەتتى.
«مەنىڭ ۇعىمىمدا ادەبيەت دەگەن ءبىلىم, ىزدەنىس قانا ەمەس, ول – تازالىق, ادامگەرشىلىك, پاراساتتىلىق. مىنە, وسى ءۇش قاسيەت قاناعاتتىڭ بويىندا بار. ءوزىم ونىڭ تۋىندىلارىن ۇزبەي وقيمىن. پروزا جازۋ وڭاي ەمەس. سونىڭ ىشىندە وقىرماندى كۇلدىرەتىن ساركازممەن جازۋ قيىن. بىراق سول قيىندىقتان قورىقپاعان قالامگەردىڭ شىعارمالارى شىنايى, شىنشىل جازىلعان», دەدى سىنشى.
كەش سوڭىندا قاناعات ابىلقايىر ءوز شىعارماشىلىعى تۋرالى از-كەم ءسوز قوزعاپ, جينالعاندارعا ريزاشىلىعىن ءبىلدىردى.