بۇگىن توتەنشە جاعدايلار ءمينيسترى شىڭعىس ءارىنوۆ ەلىمىزدە كوكتەمگى سۋ تاسقىنىن بولدىرماۋ ماقساتىندا اتقارىلىپ جاتقان جۇمىستاردى ۇكىمەت وتىرىسىندا باياندادى, دەپ جازادى Egemen.kz.
ءمينيستردىڭ سوزىنشە, قازىر رەسپۋبليكادا سۋ تاسقىنى بويىنشا جاعداي تۇراقتى. توتەنشە جاعدايدىڭ الدىن الۋ بويىنشا شارالار قابىلدانعان. وسى باعىتتا «كوكتەم» رەسپۋبليكالىق كوماندالىق-شتابتىق وقۋ-جاتتىعۋ شەڭبەرىندە باسقارۋ ورگاندارىنىڭ كۇشتەرى مەن قۇرالدارىنىڭ ناقتى دايىندىعى تەكسەرىلگەن.
سونداي-اق شىڭعىس ءارىنوۆ سۋ تاسقىنى بولا قالعان جاعدايدا حالىقتى قۇلاقتاندىرۋ, زارداپ شەككەندەردى جيناۋ پۋنكتتەرى دايىندالعانىن ايتتى.
«بۇدان بولەك, ەلدى مەكەندەردە ۋاقىتشا بوگەندەر سالۋ (114 كم), ارىقتاردى, كانالداردى (1 904 كم), سونداي-اق اۆتو جانە تەمىر جولدارداعى سۋ وتكىزۋ قۇرىلىستارىن تازارتۋ (5 002 دانا) ناقتى تۇردە جۇزەگە اسىرىلدى. ەلدى مەكەندەردەن 10,5 ملن تەكشە مەتردەن استام قار شىعارىلدى», دەدى توتەنشە جاعدايلار ءمينيسترى.