يران استاناسى تەگەراندا ءوتىپ جاتقان جابىق كەشەندەگى XI ازيا چەمپيوناتىنىڭ 2-جارىس كۇنى اياقتالدى. ۇلتتىق قۇراما قورجىنىنا تاعى 3 مەدال ءتۇستى, دەپ حابارلايدى Egemen.kz سپورت جانە تۋريزم مينيسترلىگىنىڭ ءباسپاسوز قىزمەتىنە سىلتەمە جاساپ.
بيىكتىككە سەكىرۋدە ەليزاۆەتا ماتۆەەۆا 1.86 مەتردى باعىندىرىپ, چەمپيون اتاندى. بىلتىرعى استاناداعى باسەكەدە باس جۇلدەنى نادەجدا دۋبوۆيتسكايا جەڭىپ العان. ەليزاۆەتا ول كەزدە 2-ورىننان كورىنگەن ەدى.
ال 60 مەترگە جۇگىرۋدە ولگا سافرونوۆا (7.35 سەكۋند) مارەگە 2-بولىپ جەتتى. ول بىلتىر استانادا وتكەن ازيا چەمپيوناتىندا وسى قاشىقتىقتا كۇمىس جۇلدەگەر اتانعان.
سونداي-اق ءۇش قارقىپ سەكىرۋ سايىسىندا ماريا ەفرەموۆا (13.48 مەتر) قولا جۇلدەگە يە بولدى.
قازىر قازاقستان قۇراماسىندا 2 التىن, 2 كۇمىس, 2 قولا مەدال بار. تەگەرانداعى چەمپيونات 19 اقپاندا مارەسىنە جەتەدى.