وزبەكستاننىڭ ەڭبەك سىڭىرگەن ءارتىسى ءمادينا فايزيەۆانىڭ «استانا وپەرا» تەاترىنداعى ونەر ساپارى باستالدى. كلاسسيك كومپوزيتور س.راحمانينوۆتىڭ 150 جىلدىق مەرەيتويىنا ارنالعان كونتسەرتتىك باعدارلاماسىن مۋزىكانت وتكەن اپتادا فورتەپيانولىق مۋزىكاعا ارنالعان جەكە شىعارماشىلىعىنان باستاسا, ال 20 اقپان كۇنى وتەتىن «رومانسپەن كەزدەسۋ» ۆوكالدىق مۋزىكا كەشىندە وزبەكستاندىق مەيمان ەلىمىزگە تانىمال وتاندىق وپەرا انشىلەرى – قازاقستاننىڭ ەڭبەك سىڭىرگەن قايراتكەرلەرى, «استانا وپەرانىڭ» جەتەكشى ءسوليسى بيبىگۇل جانۇزاق جانە تانىمال باريتون ازامات جىلتىركوزوۆپەن بىرگە ونەر كورسەتەدى.
بۇل – مۋزىكانتتىڭ ەلوردالىق ساحنادا العاش رەت ونەر كورسەتۋى. ءمادينا فايزيەۆا – ءوز ەلىنىڭ جارقىن پيانيستەرىنىڭ ءبىرى, الەمنىڭ جەتەكشى ساحنالارىندا بەلسەندى كونتسەرتتىك قىزمەتىنەن بولەك, وزبەكستان مەملەكەتتىك كونسەرۆاتورياسى ارنايى فورتەپيانو كافەدراسىنىڭ مەڭگەرۋشىسى. ءارتىستىڭ شىعارماشىلىعى يتاليا مەن گەرمانيادا وتكەن حالىقارالىق بايقاۋلارداعى جارقىن جەڭىستەرىمەن, پيانيستەردى دايارلاعانى ءۇشىن «تاساننو» سىيلىعىمەن, «حالىقتىق ءبىلىم بەرۋ سالاسىنىڭ ۇزدىگى» مەدالىمەن جانە «جىل مۋزىكانتى» سىيلىعىمەن اتالىپ ءوتتى.
«البەتتە, مەن «استانا وپەرا» تەاترىنىڭ داڭقى مەن ونىڭ اتاقتى سوليستەرى تۋرالى كوپ ەستىدىم. قانىق تەمبرلى, عالامات داۋىستى انشىلەرىنىڭ ارقاسىندا قازاقستاننىڭ ۆوكالدىق ونەرى بۇكىل الەمگە تانىمال, – دەپ وتاندىق وپەرا ونەرىنە جوعارى باعا بەرگەن پيانيست ءارى قاراي اڭگىمەسىن ەلوردالىق كورەرمەنگە تارتۋ ەتپەك كونتسەرتىنىڭ ەرەكشەلىگى تۋراسىنان تارقاتتى. – مەن ءۇشىن سەرگەي راحمانينوۆتىڭ تۇتاس شىعارماشىلىعى ەرەكشە. «رومانسپەن كەزدەسۋ» ۆوكالدىق كەشىنىڭ باعدارلاماسىن, ارينە, تاماشا سوليستەر ازامات جىلتىركوزوۆ پەن بيبىگۇل جانۇزاق ۇسىندى. ال س.راحمانينوۆتىڭ فورتەپيانولىق شىعارمالارىنان قۇرالعان جەكە كونتسەرتىمە كەلەر بولساق, پرەليۋديالاردى ىرىكتەۋگە نەگىزىنەن ۆوكالدىق كەش باعدارلاماسىن تاڭداۋىمىز سەبەپشى بولدى. پرەليۋديالار كوبىنەسە كوركەم بەينەلى رومانستارمەن, كوڭىل كۇيمەن, ەموتسيونالدى ساتتەرمەن ۇندەس كەلەدى. مۇنداعى پاراللەلدەردى شەكسىز جالعاي بەرۋگە بولادى. №1 سوناتا رە مينورعا كەلسەك, بۇل – س.راحمانينوۆ شىعارمالارىنىڭ ىشىندەگى سۇيىكتى تۋىندىلارىمنىڭ ءبىرى. سوناتا باعدارلاماسى ي.ۆ.گيوتەنىڭ «فاۋست» تراگەدياسىنىڭ كەيىپكەرلەرى مەن سيۋجەتىنە نەگىزدەلگەنى بەلگىلى. بىراق, ارينە, اركىم ءوزى ءۇشىن تەرەڭ ماعىنا اشا الادى. قالاي دەسەك تە, بۇل سوناتا ادام ءومىرىنىڭ اجىراماس بولىكتەرىنىڭ ءبارىن قامتىعان – بىتپەيتىن وي تولعاۋلار, كۇمان, ارپالىس, جاقسىلىق پەن ز ۇلىمدىقتىڭ, جارىق پەن تۇنەكتىڭ تەكەتىرەسى, سىرشىل كوڭىل مەن كۇيلەر, بولمىس فيلوسوفياسى».
كونتسەرتتەر استانالىق تىڭدارمان قاۋىمعا ءمادينا فايزيەۆانىڭ مۋزىكانت رەتىندەگى بەينەسىن ەكى ءتۇرلى كەيىپتە, ەكى ورىنداۋشىلىق جانردا – جەكە ورىنداۋشىلىق جانە ۆوكاليستەرمەن بىرگە انسامبلدە پاش ەتەدى.
«مەن ءۇشىن جەكە ونەر كورسەتۋ دەگەنىمىز – اۆتوردىڭ ەركىنە بارىنشا باعىنعان جاعدايدا ءوزىن تانىتۋ مۇمكىندىگى. قالاي بولعاندا دا, كومپوزيتوردىڭ تۋىندىسىن وزىندىك پايىمداۋ. ال شىعارماشىلىق وداقتا, انشىمەن مۋزىكالىق ديالوگتە ونەر كورسەتۋ ساحنادا ءومىر ءسۇرۋدىڭ وزگە فورمالارىن تالاپ ەتەدى. حح عاسىردىڭ باسىندا كامەرالىق ۆوكالدىق جانردىڭ دامۋى ءبىر ەرەكشە قاسيەتپەن سيپاتتالدى. بۇل فورتەپيانو پارتياسىنىڭ ءوسىپ كەلە جاتقان ءرولى ەدى. ول ەندى ءانشىنىڭ پارتياسىمەن تەڭ دارەجەدەگى مانگە يە بولدى. راحمانينوۆتىڭ رومانسىنداعى فورتەپيانونىڭ سۇيەمەلدەۋى ءدال وسىنداي ەرەكشە بايلىعىمەن, بوياۋى مەن پىشىندەرىنىڭ الۋان تۇرلىلىگىمەن ەرەكشەلەنەدى, ونىڭ ۇستىنە اۋەزدى جارقىن, بەدەرلى ۆوكالدىق پارتيا ونىڭ تىعىز قالىڭ ورنەگى اياسىندا انىق كورىنىپ, ەشقاشان سولعىن تارتپايدى. سونداي-اق فورتەپيانو جانىندا ۆوكالدىق جەلىمەن ۇشتاسقان ەرەكشە اۋەندى داۋىس ءجيى بىلىنەدى, ناتيجەسىندە ەكى سەرىكتەس اراسىندا مانەرلى ديالوگ پايدا بولادى. دەگەنمەن مازمۇندالۋدىڭ كۇردەلىلىك دارەجەسى مەن فورماسى قانداي بولسا دا, داۋىس پارتياسى مەن فورتەپيانو ءاردايىم دەرلىك ءوزارا تىعىز ارەكەتتەسىپ, ءبىرتۇتاس اجىراماس كوركەمدىك تۇتاستىقتى قۇرايدى. ءسوزسىز, بيبىگۇل جانۇزاق جانە ازامات جىلتىركوزوۆپەن بىرگە «رومانسپەن كەزدەسۋ» ۆوكالدىق كەشىندە ونەر كورسەتۋىمىز ارقىلى كوركەمدىك ءبىرتۇتاس كورىنىستى قالىپتاستىراتىن وسىناۋ ۇيلەسىمدى ارىپتەستىككە قول جەتكىزگىمىز كەلەدى», دەپ اعىنان اقتارىلدى مۋزىكانت.