وتكەن جىلدىڭ سوڭىندا پەتروپاۆل قالاسىنىڭ تۇرعىنى ۆاديم پريحودچەنكونىڭ وتباسىن بىرەۋلەر اسقان قاتىگەزدىكپەن قىرىپ كەتكەن ەدى. وتباسىنىڭ بارلىق ءۇش جانىن: ەرىن, ايەلىن جانە 17 جاسار بالاسىن قانىشەرلەر باۋىزداپ كەتكەن. مۇنى ەستىگەن قالا تۇرعىندارى ءۇرپيىسىپ قالدى. وقيعانى سان-ساققا جۇگىرتىپ, ءتۇرلى وي مەن پىكىر ايتىلدى, وسەك-اياڭ تاراتۋشىلار دا ايانىپ قالمادى.
كوپ ۇزاماي-اق سولتۇستىك قازاقستان وبلىسىنىڭ پوليتسيا قىزمەتكەرلەرى قىلمىسكەرلەردى قولعا ءتۇسىردى. «باقساق, باقا ەكەن» دەگەندەي, قىلمىسكەرلەر الىستان كەلمەپتى. ولار پريحودچەنكونى جاقسى بىلەتىن بيزنەستەگى باسەكەلەستەرى بولىپ شىقتى. مارقۇمنىڭ «يپ پريحودچەنكو» دەپ تىركەلگەن كاسىبى دە ەرەكشە – قايتىس بولعان جانداردى جەرلەۋ جانە سوعان بايلانىستى راسىمدەردى اتقاراتىن كاسىپورىن. بۇرىن تەك حريستياندىق سالتپەن جەرلەنەتىن ادامداردىڭ ءراسىمىن اتقاراتىن بولسا كەيىن وعان ءتىپتى مۇسىلماندار دا جۇگىنەتىن بولعان. زيراتتا توڭ جەردى قازىپ اۋرە بولماس ءۇشىن قاتتى جەرلەردى مۇسىلماندار كاسىپكەردىڭ تەحنيكاسىمەن قازدىرىپ الاتىن بولعان.
ۆاديم پريحودچەنكونىڭ باسەكەلەسى – «پەترو-سپەتسوبسلۋجيۆانيە» جشس. بۇل كاسىپورىن سوناۋ كەڭەس زامانىنان «جەرلەۋ بيۋروسى» دەپ اتالىپ, بۇل قىزمەتتى جەكە دارا اتقارىپ كەلگەن. سەرىكتەستىكتىڭ قازىرگى قوجايىنى بۇرىنعى ديرەكتوردىڭ قىزى ەكەن. جاپپاي جەكەشەلەندىرۋ جىلدارىندا كاسىپورىندى ءوزىنىڭ اتىنا اۋدارىپ العان ديرەكتور كاسىبىن تولىق قىزىنا مۇراعا قالدىرىپتى. كەيىن بۇل كاسىپورىندى قىزى باسقارىپ, جانىنا باسقا دا تۋىستارىن جيناعان.
الايدا جەرلەۋ راسىمىنەن دە تابىس تابۋعا بولاتىنىن كورگەن ۆ.پريحودچەنكو سياقتىلار وسىنداي قىزمەت اتقاراتىن جەكە كاسىپورىندارىن تىركەتە باستاعان. قالا اكىمدىگى, مەديتسينالىق مەكەمە, ت.ب. تاراپىنان زيراتتاردى ۇستاۋعا, كۇتۋگە, مايىتتەردى تاسۋعا بولىنەتىن بيۋدجەتتىك تەندەرلەردى پريحودچەنكو باسەكەلەسىنىڭ الدىنا ءتۇسىپ, بىرنەشە رەت ۇتىپ تا العان.
جالپى, ءمايىتتى جەرلەۋگە وكىمەت تاراپىنان 15,7 اەك كولەمىندەگى ءبىر رەتتىك اقى مارقۇمنىڭ تۋىستارىنا تولەنەدى. بىراق باسقا قىزمەتتەر جاريالانعان تەندەر ارقىلى جەڭگەن كومپانياعا بەرىلەدى. ولار زيراتتان ورىن الۋ, قازۋ, ءمايىتتى راسىمدەۋ, اسىن بەرۋ, ت.ب. ءبارىن ۇيىمداستىرىپ, تەندەردى جەڭىپ العان قىزمەتى بويىنشا الدىمەن بيۋدجەتتەن, قالعانىن مارقۇمنىڭ تۋىستارىنان الىپ, تابىس تابادى.
بۇل ىستە دە سىبايلاس جەمقورلىققا جول بەرىلەتىن تەتىك بار. مارقۇم بولعان ادام تۋرالى جەدەل اقپاراتتى پوليتسيا قىزمەتكەرلەرى جەرلەۋ كومپانياسىنا ءتىپتى تۋىستارىنان بۇرىن جەتكىزەدى. ارينە, بۇل ءۇشىن كەلىسىم بويىنشا اقى الادى. جەدەل اقپاراتتا مارقۇمنىڭ تۇرعان ءۇيى, تەلەفونى, تۋىستارى دا كورسەتىلەدى. سوندىقتان تۋىستار جامان حاباردى جاڭا عانا ەستىپ, ەستەرى شىعىپ جاتقاندا جەرلەۋ ءراسىمىن جاسايتىندار ەسىك قاعىپ تۇراتىن كورىنەدى...
وسى ماسەلەنى كوپتەن زەرتتەپ جۇرگەن جەرگىلىكتى جۋرناليست ز.جۇماليەۆانىڭ ايتۋىنشا, وسىدان بىرنەشە جىل بۇرىن قالادا سونداي اقپاراتتاردى ساتىپ, اقشا تاپقان 4 پوليتسيا قىزمەتكەرى سوتتالىپ, جۇمىستان قۋىلعان. ال ولارعا پارا بەرگەن جەرلەۋ ءراسىمىن جاسايتىندار ۇلكەن كولەمدە ايىپپۇل تولەپ قۇتىلىپتى.
پەندەلەردىڭ باقيعا اتتانۋىن دا اقشا تابۋدىڭ ءتۇرلى كوزىنە اينالدىرعاندار كوپ. بۇل كاسىپتە ءتىپتى قىلمىستىق ىستەرگە دە جول بەرىلەدى. وسىنىڭ ءوزى بۇل كاسىپتى دە قۇقىقتىق تۇرعىدان رەتتەيتىن زاڭنىڭ كەرەكتىگىن كورسەتىپ تۇر. كەز كەلگەن ادام جەرلەۋ ءراسىمىن اتقاراتىن كاسىپورىندى تىركەتە الادى. ال ولارعا قويىلاتىن تالاپتار, جەرلەۋ قىزمەتتەرى اقىسىنىڭ نورمالارى ەش قۇجاتتا ناقتى كورسەتىلمەگەن, زيراتتاردى كۇتۋ مەن تازالاۋدىڭ نورمالارى دا بەلگىلەنبەگەن. ولارعا قويىلاتىن سانيتارلىق-ەپيدەميولوگيالىق تالاپتار دا ناقتىلانباعان.
جوعارىداعى وقيعاعا قايتا ورالساق. قىلمىستىق ىسكە كۇدىكتى رەتىندە پريحودچەنكونىڭ باسەكەلەس كومپانياسى – «پەترو-سپەتسوبسلۋجيۆانيە» جشس-نىڭ ەكى قىزمەتكەرى مەن ديرەكتورى قاماۋعا الىنعان. بۇرىن جەكە دارا اتقارىپ جۇرگەن قىزمەتتەرىنە پريحودچەنكونىڭ ارالاسىپ, سىباعانىڭ ءبىراز بولىگىن تارتىپ الىپ جۇرگەنى كوپتەن بەرى ولاردىڭ زىعىردانىن قايناتىپ جۇرسە كەرەك. ونىڭ ۇستىنە بەس جىل بۇرىن «پەترو-سپەتسوبسلۋجيۆانيە» جشس پەتروپاۆلدىڭ ەكى جاڭا زيراتىن سەنىمدى باسقارۋ قۇقىعىن ۇتىپ العان ەكەن. بۇل مايىتكە ورىندار بەلگىلەۋ, قازۋ جۇمىستارىن اتقارۋ سياقتى تولىپ جاتقان قىزمەتتەر. ال ولاردىڭ قىزمەت قۇنىن بەلگىلەۋ دە وزدەرىنىڭ ەركىندە بولعان. بيىل سول سەنىمدى باسقارۋ قۇقىعىنىڭ مەرزىمى اياقتالىپ, قايتادان تەندەر وتەدى. وعان «يپ پريحودچەنكونىڭ» قاتىساتىنى دا ءسوزسىز. ويتكەنى ول بۇرىنعى تەندەردىڭ شەشىمى دۇرىس ەمەس دەپ سوتقا جۇگىنگەن بولاتىن. الايدا ول كەزدە پريحودچەنكونىڭ تالاپ ارىزى قاناعاتتاندىرىلماعان. بىراق بۇل جولى ونىڭ جەڭىپ كەتۋى ابدەن مۇمكىن ەدى, ويتكەنى كاسىپكەردىڭ ءوز قىزمەتتەرىن باسەكەلەسىنەن ارتىعىراق جاسايتىنى ءتۇرلى جارنامالىق, اقپاراتتاندىرۋ ماتەريالىنان تۇرعىندارعا بەلگىلى بولىپ جۇرگەن. سوندىقتان باسەكەلەستىڭ جولىن كەسۋدىڭ امالىن كۇدىكتىلەر وسىلاي تاپقان سەكىلدى. قازىر قىلمىستىق ءىس ءالى جالعاسىپ جاتىر.
پەتروپاۆل