جامبىل وبلىسى پوليتسيا دەپارتامەنتىنىڭ قىزمەتكەرلەرى جامبىل, تۇركىستان وبلىستارىنىڭ جانە الماتى مەن شىمكەنت قالالارىنىڭ تۇرعىندارىنان تۇراتىن قىلمىستىق توپتىڭ زاڭسىز ارەكەتىن اشكەرەلەپ, ولاردىڭ «جۇمىسىنا» توسقاۋىل قويدى. قىلمىستىق توپ كولىك جۇرگىزۋشىسى كۋالىگىن زاڭسىز ساۋدالاعان, دەپ حابارلايدى Egemen.kz.
پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, قىلمىستىق توپتىڭ قۇرامىندا بىرنەشە ادام بولعان. قىلمىستىق توپ مۇشەلەرى مۇددەلىلەردىڭ وقۋعا ءتيىس ساباقتارىن جانە كولىك باسقارۋ مۇمكىندىگىن تاجىريبە جۇزىندە تەكسەرمەگەن. قارجىلاي سىياقى ءۇشىن جۇرگىزۋشى كۋالىگىن شۇلەن تاراتقانداي زاڭسىز ۇلەستىرۋمەن ۇزاق ۋاقىت بويى اينالىسىپ كەلگەن.
دەرەككە سەنسەك, قىلمىستىق توپتىڭ قۇرامىنا حقكو قىزمەتكەرلەرىنەن بولەك, جوعارىدا ايتىلعان وڭىرلەردەن جۇرگىزۋشى كۋالىگىن الۋعا نيەت بىلدىرگەن تۇتىنۋشىلاردى ىزدەستىرگەن ارنايى «كومەكشىلەر» بار. ەڭ سوراقىسى قۇجاتتار تاراز قالاسىندا ورنالاسقان حالىققا قىزمەت كورسەتۋ ورتالىعىندا راسىمدەلىپ, زاڭسىز يەلەرىن تاپقان.
«تىركەلگەن قىلمىستىق ءىس بويىنشا تەرگەۋ ارەكەتتەرى جۇرگىزىلىپ جاتقانىن ايتا كەتكەن ءجون. قازىرگى ۋاقىتتا جۇرگىزۋشى كۋالىگىن زاڭسىز بەرۋدىڭ 35 دەرەگى انىقتالدى. قىلمىستىق جۇيەنى ۇيىمداستىرۋشىلار مەن ورىنداۋشىلار ۋاقىتشا ۇستاۋ يزولياتورىنا قاماققا الىندى», دەيدى وبلىستىق پوليتسيا دەپارتامەنتى باستىعىنىڭ ورىنباسارى الماز الماتوۆ.