وبلىستىڭ بارلىق اۋماعىنا بيىل قار كوپ جاۋدى, ال شەت اۋماقتاعى ع.مۇسىرەپوۆ اۋدانىندا تىپتەن قار قالىڭ. بۇل جاقتىڭ ورماندارى از بولعاندىقتان بوراعان قار كوبىنەسە جولدارعا ۇيىلەدى. سوندىقتان مۇندا تەك قۋاتتى تەحنيكالارمەن عانا جول ارشىلادى. ۇيىتقىعان بوراننان تۇرىپ قالعان جەڭىل ماشينالاردىڭ ۇستىنەن قار ءجۇرىپ كەتكەن جاعدايلار دا ءجيى كەزدەسىپ تۇرادى.
جۋىردا وسى اۋداننىڭ تۇرعىنى اراي جاڭاتۋعانوۆا جەڭىل ماشيناسىمەن جالپى 6 ادام بولىپ كەلە جاتىپ قالىڭ قارعا تۇرىپ قالىپ, قاتتى قيىندىق كورەدى. ولاردىڭ ىشىندە سەگىز ايلىق بوبەك تە بولعان. سودان جولدا قالعان ماشينانىڭ پەشى دە ىستەن شىعادى. ايەلدىڭ ايتۋىنا قاراعاندا, ولارعا كومەككە پوليتسيا قىزمەتكەرلەرى كەلىپ قانا اجالدان قۇتقارعان. قيىن جاعدايدا قالعان ادامداردىڭ حابارى جەتكەن بويىندا پاترۋلدىك پوليتسيا باتالونىنىڭ قىزمەتكەرلەرى سايران سماعۇلوۆ, ريزابەك ەرسايىنوۆ, قايرات ورازبەكوۆ جانە دامير ءابدىراحمانوۆ جول پايدالانۋ ۋچاسكەسى جانە «نەجينكا-ەركە» جشس تەحنيكالارىنىڭ كۇشىمەن ادامداردى اجالدان قۇتقارىپ, العىس الدى.
ال مىنا وقيعا كەشە عانا بولدى. اۋدان ورتالىعى نوۆويشيمكا سەلوسىنداعى №16 ءورت-قۇتقارۋشىلار بولىمىنە اۋداننىڭ الىس اۋىلدارىنىڭ ءبىرى تاحتابرودتىڭ اكىمى حابارلاسىپ, 67 جاستاعى ءبىر ادامنىڭ قاتتى قىسىلىپ, ءولىم اۋزىندا جاتقانىن جەتكىزەدى. ونى دەرەۋ اۋدان ورتالىعىنداعى اۋرۋحاناعا جەتكىزبەسە, جان تاپسىراتىنى بەلگىلى بولادى. تاحتابرود پەن نوۆويشيمكانىڭ اراسى – 150 شاقىرىمداي جەر. جولدى بوران جاۋىپ تاستاعان. ناۋقاستى اۋىلدان الىپ شىققان جەدەل جاردەم ماشيناسىن ساعاتىنا 40-50 شاقىرىمدىق قانا جىلدامدىعى بار ۆيكتور چەرەۆيكتىڭ ك-701 تراكتورى اۋدانعا جەتكىزگەنشە كەمىندە ءۇش ساعات وتپەكشى. وسىنى ەسكەرگەن اۋداندىق تج ءبولىمىنىڭ باستىعى, ازاماتتىق قورعاۋ پودپولكوۆنيگى سانات مۇقاشەۆ تراكتوردىڭ الدىنان جول تالعامايتىن «ترەكول» كولىگىن جىبەرەدى. جۇرگىزۋشى ەلدار قۇرمانوۆتىڭ قاسىنا ءوزى جانە ە.تورەگەلدينوۆ وتىرىپ, ادامدى اجالدان قۇتقارۋ ءۇشىن الىپ تەحنيكا تاحتابرودتىڭ جولىنا تۇسەدى.
«جولعا تۇرىپ قالعان قار قاتتى ءارى قالىڭ ەكەن, جەل تاقىرلاپ تاستاعان كەيبىر اشىق جەرلەر كوكتايعاق, ونىڭ ۇستىنە بۇيىردەن قاتتى داۋىل ۇرىپ تۇردى. سوعان قاراماي مۇمكىندىگى بولعان بارلىق جىلدامدىقتى قوسىپ, تاحتابرودتان شىققانىنا 20 شاقىرىمداي بولعان تراكتورمەن كەزدەسىپ, ناۋقاستى مىنگىزىپ الىپ, تاڭعى ساعات 05.50-دە اۋرۋحاناعا جەتكىزدىك», دەيدى سانات مۇقاشەۆ.
اۋرۋ ادامعا بىردەن وپەراتسيا جاسالىپ, اجالدان قالىپتى.
وسىنىڭ الدىندا عانا, ءبىر كۇن بۇرىن كورشىلەس تيميريازەۆ اۋدانىندا دا قارعا باتىپ, ونىڭ ۇستىنە بەنزينى ءبىتىپ, تۇرىپ قالعان «گازەل» كولىگىنىڭ دە جۇرگىزۋشىسى قۇتقارىلعان ەدى. اۆتوكولىك موسكۆورەتسك اۋىلىنان تيميريازەۆ سەلوسىنا شىعىپ, 7 كم جۇرگەن سوڭ تۇرىپ قالعان ەكەن. ءتىسى-تىسىنە تيمەي جاۋراعان جاس جىگىتتى اۋداندىق توتەنشە جاعدايلار ءبولىمىنىڭ جىگىتتەرى «نيۆا-برونتومەن» سۇيرەگەن بويى اۋداندىق قوناقۇيدىڭ الدىنا ءبىر-اق جەتكىزدى.
مىنە, سولتۇستىكتە دە قوياننىڭ قىسى وسىلاي الەك سالۋىن قويماي تۇر.
سولتۇستىك قازاقستان وبلىسى