استانادا قولجازبالار جانە سيرەك كىتاپتار ۇلتتىق ورتالىعى مەن يران يسلام رەسپۋبليكاسىنىڭ قازاقستانداعى ەلشىلىگى جانىنداعى مادەني وكىلدىگى بىرلەسىپ ۇيىمداستىرعان «يران يسلام رەسپۋبليكاسىنىڭ كالليگرافيا جانە جازبا مۇرالاردى قالپىنا كەلتىرۋ ونەرى» اتتى اپتالىعى باستالدى. اپتالىقتىڭ العاشقى ءىس-شاراسى «كالليگرافيا» كورمەسىمەن اشىلدى.
كورمەگە تاريحي ەسكەرتكىشتەگى كۋفي جازۋىمەن جازىلعان 50-دەن اسا جازۋ ۇلگىسى جانە XIII عاسىردا جازىلعان تاريحي تۇلعالاردىڭ ءومىر دەرەكتەرى مەن XVIII عاسىردا ورتالىق ازياداعى تۇركى حالىقتارىنىڭ كوشباسشىلارى تۋرالى قاعازعا تۇسكەن «زوبدات-ۋل-تاريح» قولجازباسىنىڭ كوشىرمەسى قويىلدى.
مازمۇندى شارانىڭ اشىلۋىندا قولجازبالار جانە سيرەك كىتاپتار ۇلتتىق ورتالىعىنىڭ ديرەكتورى جاندوس بولدىقوۆ ەلىمىزدە العاش رەت ءوتىپ وتىرعان كورمەنىڭ ماڭىزىنا توقتالدى.
ء«بىزدىڭ ورتالىق پەن يران يسلام رەسپۋبليكاسىنىڭ ەلىمىزدەگى ەلشىلىگى بىرلەسىپ ۇيىمداستىرعان ءىس-شارا ءبىر اپتاعا جوسپارلانعان. سونىڭ العاشقىسى «كالليگرافيا» كورمەسىمەن اشىلدى. مۇندا كوپتەگەن قۇندى تاريحي دەرەك ۇسىنىلعان. مادەني ءىس-شارا اياسىندا ەكى ەلدىڭ وسى سالاداعى ماماندارى كەزدەسىپ, ءبىر-بىرىمەن تاجىريبە الماسادى», دەدى جاندوس بەكدىلدا ۇلى.
يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار ءوز سوزىندە جازبا مۇرالاردى ساقتاپ, قورعاۋ ءىسى ۇلتتىڭ تاريحىنا دەگەن ۇلكەن جاۋاپكەرشىلىك ەكەنىن جەتكىزدى.
«يران ماماندارى قولجازبالار مەن باسپا ءىسىن رەستاۆراتسيا جاساۋدا وزىق تاجىريبەگە باي. بۇگىنگى كورمەگە تاريحي-مادەني ەسكەرتكىشتەردەن الىنعان كونە جازۋلار ۇلگىسى مەن قولجازبا كوشىرمەلەرى جانە رەستاۆراتورلاردىڭ جويىلا باستاعان مۇرالاردى قايتا جاڭعىرتقان تاڭداۋلى جۇمىستارى قويىلعان», دەدى ەلشى مىرزا.
ايتا كەتەيىك, اپتالىق اياسىندا «يران يسلام رەسپۋبليكاسىنىڭ كالليگرافيا جانە جازبا مۇرالاردى قالپىنا كەلتىرۋ ونەرى» اتتى عىلىمي-تاجىريبەلىك سەمينار ۇيىمداستىرىلىپ, شەبەرلىك ساباعى وتەدى. سونداي-اق يراننان كەلگەن ماماندار مەن وتاندىق رەستاۆراتورلار كونە قولجازبالار مەن سيرەك كىتاپتاردى كاتالوگتەۋ, جۇيەلەۋ, تسيفرلىق جۇيەگە كوشىرۋ, قالپىنا كەلتىرۋ جانە كالليگرافيا ونەرى بويىنشا تاجىريبە الماسادى.