جۋىردا سولتۇستىك قازاقستاننىڭ دارىگەرلىك مەكەمەلەرى 19 جاڭا جەدەل جاردەم كولىگىمەن تولىقتى. بۇل كولىكتەر رەسپۋبليكالىق بيۋدجەتتىڭ كومەگىمەن وبلىستىق بيۋدجەتتەن بولىنگەن قاراجاتقا الىنعان. ارقايسىنىڭ باعاسى – 24 ملن تەڭگەدەن.
كولىكتەر رەسەيلىك «گازەل» اۆتوكولىگىنىڭ نەگىزىندە جاسالعان. ءجۇرىسى اسا جايلى بولماسا دا, قار مەن سازعا باتا قويمايتىن ەكى بەلدەمەمەن جاراقتاندىرىلعان. ءىشى ناۋقاسقا العاشقى مەديتسينالىق كومەك كورسەتەتىن قۇرالدارمەن جابدىقتالعان. «ونىڭ ىشىندە وكپەنى قولدان تازارتۋ مۇمكىندىگى بار, جۇرەككە قولدان ماسساج جاساي الامىز. وسى كولىكتەردىڭ ارقاسىندا ءبىز تۇرعىندارعا جەدەل مەديتسينالىق كومەكتەردى تولىق جاساي الاتىنىمىزعا سەنىمدىمىز», دەيدى وبلىستىق جەدەل جاردەم ورتالىعى ديرەكتورىنىڭ مىندەتىن اتقارۋشى يۋري بەلونوگ.
ساتىپ الىنعان 19 كولىكتىڭ 10-ى قالادا قالدىرىلىپ, قالعاندارى اۋدان ورتالىقتارىنداعى اۋرۋحانالاردىڭ تەحنيكالىق مۇمكىنشىلىكتەرىن ارتتىراتىن بولادى. وسىلايشا, ءبىزدىڭ وبلىس جەدەل جاردەم كولىكتەرىمەن قامتاماسىز ەتىلۋ جوسپارىن 68 پايىزعا جەتكىزىپ وتىر. وبلىستىڭ مەديتسينالىق مەكەمەلەرىن جەدەل جاردەم كولىگىمەن تولىق قامتاماسىز ەتۋ ءۇشىن ءالى 52 اۆتوكولىك الىنۋى كەرەك.
مەديتسينالىق اۆتوكولىكتەردى تاپسىرۋ سالتاناتىنا قاتىسقان وبلىس اكىمى عاۋەز نۇرمۇحامبەتوۆ الداعى ۋاقىتتا دا بيۋدجەت ەسەبىنەن وبلىستىڭ اۋرۋحانالارىنا قاجەتتى ماشينالاردىڭ الىناتىندىعىن ايتتى.
ايتا كەتەتىن جايت, مەملەكەت تاراپىنان وبلىستىڭ دەنساۋلىق ساقتاۋ سالاسىنا جىل سايىن قوماقتى قاراجات بولىنۋدە. ماسەلەن, بىلتىر 11,7 ملرد تەڭگە ءبولىندى. وبلىستا بارلىعى 19 اۋرۋحانا, 63 امبۋلاتوريالىق ەمحانا بار. سونىڭ 4-ءى – وبلىستىق, 2-ءى – قالالىق. سونداي-اق وبلىستىڭ ەلدى مەكەندەرىندە 397 مەديتسينالىق بەكەت پەن 41 فاپ جۇمىس ىستەيدى.
وكىنىشكە قاراي, دەنساۋلىق ساقتاۋ سالاسىنىڭ تەحنيكالىق ينفراقۇرىلىمدارى 77,4 پايىزعا ەسكىرگەن. 480 ادامعا ەسەپتەلگەن كوپبەيىندى اۋرۋحانانىڭ قۇرىلىسى دا بەلگىلەنگەن مەجەدەن كوپ كەشىگىپ, ءالى كۇنگە اياقتالماي جاتىر. الايدا جوعارىدا ايتىلعانداي جاقسى قادامدار دا جاسالۋدا. سونىڭ ىشىندە مەديتسينالىق مەكەمەلەردىڭ ءوز ىشىندەگى ءتارتىپ ماسەلەسى دە بۇرىنعىعا قاراعاندا جاقسارىپ وتىر. بىلتىر بۇرىنعى وبلىس اكىمى ايداربەك ساپاروۆ ارىز-شاعىم كوپ تۇسەتىن ءبىرىنشى ەمحاناعا ەشكىمگە ەسكەرتپەي, تاڭعى مەزگىلدە ءوزى بارىپ تەكسەرىپ, حالىقتىڭ كەزەكتە سارعايىپ تۇرعانىن, ناۋقاستارعا وتىراتىن ورىندار دا جەتپەيتىنىن, ەسىك الدىنىڭ دا اۋرۋ جاندارعا قولايسىزدىعىن, كوپتەگەن ماماندار نەگىزگى قىزمەتىمەن قوسا, اقىلى قۇرىلىمداردا جۇمىس ىستەگەندىكتەن, مۇنداعى حالىقتىڭ قولى ولارعا جەتە المايتىندىعىن اشكەرەلەپ, ۇلكەن ءدۇمپۋ تۋدىرعان. سودان بەرى اۋرۋحانالار مەن ەمحانالاردىڭ ىشكى ءتارتىبى ءبىرشاما جاقسارعان بولاتىن. وسىنداي وقىس تەكسەرىستەردىڭ جيىرەك بولىپ تۇرعانى كەرەك-اق.
سولتۇستىك قازاقستان وبلىسى