جۇكتىلىكتىڭ سوڭعى ايىندا جولعا شىققان الماتىلىق ايەل پويىزدا قىز بالانى دۇنيەگە اكەلدى. ۆاگون جولسەرىگى باعداگۇل ابداقۇلوۆا جانە پويىز بريگاداسىنىڭ باسقا دا قىزمەتكەرلەرى قاجەتتى كومەك كورسەتىپ, ايەلدى امان-ەسەن بوساندىرىپ الدى, دەپ حابارلايدى Egemen.kz.
جاس انا جانسايا كوكەنوۆا جۇكتىلىكتىڭ سوڭعى ايىندا الماتىدان وسكەمەنگە №352 پويىزبەن جولعا شىققان. پويىز جونەلتىلگەننەن كەيىن ەكاشا – ايىرتاۋ ستانتسيالارى اراسىندا جولاۋشىنىڭ تولعاعى باستالعان. ۆاگون جولسەرىگى باعداگۇل ابداقۇلوۆا جانە پويىز بريگاداسىنىڭ باسقا دا قىزمەتكەرلەرى قاجەتتى كومەك كورسەتىپ, بوسانۋدى امان-ەسەن قابىلدادى. قىز 7 اقپاندا ساعات 13:30-دا دۇنيەگە كەلدى.
پويىز بريگاداسى جاقىن ماڭداعى ستانتسياعا جەدەل جاردەم شاقىرعان. ۆاگوندا بوسانعان ايەلگە كومەك كورسەتۋ ءۇشىن بارلىق قاجەتتى جاعدايلار جاسالعان.
«وسكەمەن ستانتسياسىنا كەلگەننەن كەيىن قىزدى اناسىمەن بىرگە جەدەل جاردەم قىزمەتكەرلەرى قابىلدادى. جولسەرىك باعداگۇل ابداقۇلوۆا تەمىرجولدا 23 جىلدان استام جۇمىس ىستەپ كەلەدى. بۇل وقيعا ونىڭ تاجىريبەسىندە ءبىرىنشى رەت ورىن الىپ وتىر», دەلىنگەن «جولاۋشىلار تاسىمالى» اق حابارلاماسىندا.
ايتا كەتۋ كەرەك, پويىز بريگادالارىنىڭ قىزمەتكەرلەرى ستاندارتتى ەمەس جاعدايلاردا العاشقى مەديتسينالىق كومەك كورسەتۋ بويىنشا تۇراقتى نەگىزدە وقىتىلادى. سوڭعى 3 جىلدا «جولاۋشىلار تاسىمالى» اق پويىزدارىندا 12 بالا دۇنيەگە كەلگەن.