وڭىردە ەسىرتكى تاراتۋ قىلمىسى ءورشىپ تۇر. قوعامعا زاپىراندى تۇتىنۋشىدان گورى تاراتۋشىنىڭ ءىسى زيان ەكەنى بەلگىلى. تۇتىنۋشىلاردى تەرىس جولعا تۇسىرەتىن قاسكويلەر ۇيىمداسقان توپ قۇرىپ, ينتەرنەتتىڭ دە مۇمكىندىگىن پايدالانىپ, ءتۇرلى قيتۇرقى ادىسپەن حالىقتىڭ ساناسىن ۋلاپ, اقشا تابۋدىڭ وڭاي جولىنا تۇسكەن.
ەسىرتكى تاراتۋشىلاردىڭ ۇيىمداسقان توپتارى پەتروپاۆلدىڭ دا تۇكپىر-تۇكپىرىنە جايىلىپ, قالادا ەسىرتكى تاراتىپ جۇرگەنى بەلگىلى بولىپ وتىر. وبلىستىق پوليتسيانىڭ ەسىرتكى قىلمىسىنا قارسى كۇرەس باسقارماسىنىڭ جەدەل قىزمەتكەرلەرى بىرنەشە اي بويى قىلمىستىق توپتىڭ سوڭىنا ءتۇسىپ, اقىرى سەگىز مۇشەسىن ماريحۋانا مەن گاشيشتىڭ ۇلكەن پارتياسىن تاراتۋعا دايىنداۋ كەزىندە, قىلمىس ۇستىندە ۇستاعان.
جەدەل ىزدەستىرۋ قىزمەتكەرلەرىنىڭ بىرنەشە اي بويى ەسىرتكى كەلەتىن كانالداردى جانە ولاردى تاراتاتىن نۇكتەلەردى زەرتتەۋى ناتيجەسىن بەردى. پوليتسەيلەردىڭ ايتۋىنا قاراعاندا, ەسىرتكى نەگىزىنەن استانادان كەلەتىن كورىنەدى. دەمەك ولاردى جاسايتىن نۇكتەلەر ەلوردادا شوعىرلانعان. وبلىستىق پوليتسيا دەپارتامەنتى ءباسپاسوز قىزمەتىنىڭ وكىلى يگور مەرتسالوۆتىڭ ايتۋىنا قاراعاندا, ۇستالعان وسى سەگىز كۇدىكتىنىڭ جەتەۋى پەتروپاۆل قالاسىنىڭ تۇرعىنى, تاعى بىرەۋى – ولاردىڭ باسشىسى جانە ۇيىمداستىرۋشىسى 35 جاستاعى استانا قالاسىنىڭ تۇرعىنى بولىپ شىققان. «قىلمىستىق توپ مۇشەلەرىن ۇستاۋ كەزىندە بارلىعى 49 كگ 318 گرامم ەسىرتكى زاتتارى الىندى. ونىڭ 81,5 گرامى – گاشيش. قازىر سەگىزدىڭ تورتەۋى قاماۋدا وتىر, قالعاندارى پوليتسيانىڭ قاراۋىندا. قازىر بارلىق ءتيىستى تەرگەۋ ءىسى مەن ساراپتاما جاسالىپ, ءىس سوتقا وتكىزۋگە دايىن», دەيدى وبلىستىق پوليتسيا دەپارتامەنتى ەسىرتكىگە قارسى كۇرەس باسقارماسىنىڭ باسشىسى, پودپولكوۆنيك رۋسلان ساپاروۆ.
ايتا كەتەتىن جايت, وتكەن جىلى جەلتوقسان ايىندا دا پەتروپاۆلدا ءبىر ەسىرتكى تاراتۋشى ۇستالعان ەدى. جەدەل اقپاراتتار نەگىزىندە نابەرەجنىي كوشەسىنىڭ بويىمەن كەلە جاتقان «Hyundai Elantra» كولىگى توقتاتىلىپ, تەكسەرگەندە جولاۋشى ورىندىعىندا وتىرعان 43 جاستاعى ايەلدىڭ سومكەسىنەن سينتەتيكالىق ەسىرتكىگە جاتاتىن «مەفەدروننىڭ» قاعازعا ورالعان 80 بولشەگى تابىلعان. تەرگەۋ بارىسىندا ونىڭ تاراتۋعا دايىندالعان ەسىرتكى ەكەنى بەلگىلى بولعان. ايەلدىڭ ءوزى استانا قالاسىنىڭ تۇرعىنى بولىپ شىقتى. پەتروپاۆلدا ۋاقىتشا تۇرىپ جاتقان ونىڭ پاتەرىن تەكسەرگەندە, تاراتۋعا ازىرلەنىپ, فولگا قاعازىنا بولشەكتەپ سالىنعان جارتى كيلوگرامم ەسىرتكى شىققان. رۋسلان ساپاروۆتىڭ ايتۋىنشا, بۇل ءىس بويىنشا قىلمىستىق ءىس قوزعالعان.
پەتروپاۆل