بيىل XX عاسىرداعى قازاق مادەنيەتىنىڭ ەرەن قۇبىلىسى عاريفوللا قۇرمانعاليەۆتىڭ تۋعانىنا – 115 جىل. ۇلت ونەرىنە وشپەستەي ءىز قالدىرعان دارا دارىننىڭ ەسىمىن ۇرپاق جادىندا جاڭعىرتۋعا ارنالعان مادەني-تانىمدىق كەش الماتىداعى مەملەكەتتىك ورتالىق مۋزەيدە سالتانات قۇردى.
ءداستۇرلى ءانشى رەتىندە عانا ەمەس, وپەرا ارقىلى دا ونەر كەڭىستىگىنەن ايشىقتى ورىن العان عاريفوللا مۇراسى, تالانتتىڭ جان جۇرەگىنەن تۋعان كوپتەگەن مۋزىكالىق شىعارما – حالىقتىق مازمۇنعا باي, كەڭ تىنىستى دۇنيەلەر. اسەم ءان اۋەلەگەن تاعزىم كەشىنە ارنايى كەلگەن ساۋلە جانپەيىسوۆا, ايگۇل قوسانوۆا, ەلزا كارابالينا, ۆەنەرا قارجاۋباەۆا, ارمات يسلامعاليەۆ, كۇنقوجا قايرۋللا قاتارلى ءداستۇرلى ءان شەبەرلەرى عاريفوللا شىعارمالارىنان كونتسەرت قويدى. سونىمەن بىرگە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ جانە قۇرمانعازى اتىنداعى قازاق ۇلتتىق كونسەرۆاتورياسىنىڭ شاكىرتتەرى ءوز ونەرلەرىن ورتاعا سالدى.
مۇحيت مۇراسىن بۇگىنگە جەتكىزىپ, قازاقتىڭ ءداستۇرلى اندەرىن تورتكۇل دۇنيەگە پاش ەتكەن تۋما تالانتتىڭ «اق جايىق», «سۇيگەن جار», «نۇرجامال», «جان ەركەم», «اققۋ», «سۇيەمىن تۋعان ولكەمدى», ء«ۇش قىز» سەكىلدى اۆتورلىق اندەرى دە – حالىق كوڭىلىنەن ورىن العان تۋىندىلار. دەسە دە عۇلاما جىلدار كوشىندە قالعان كونە مۋزىكالىق مۇرالارىمىزدى جاڭا بۋىنمەن قاۋىشتىرعان عاريفوللا قۇرمانعاليەۆتىڭ شىعارماشىلىق تىنىسى ءالى دە تەرەڭنەن زەرتتەپ-زەردەلەنۋگە ءتيىس. بۇل باعىتتا ونىڭ ۇرپاقتارى تولىمدى ەڭبەك ەتىپ ءجۇر.
رۋحاني ءىس-شاراعا زيالى قاۋىم وكىلدەرىمەن بىرگە عاريفوللا قۇرمانعاليەۆتىڭ ۇلى نۇرلان, كەلىنى ءلايلا, نەمەرەسى مەرۋەرت قاتىستى. ەڭ عاجابى, ءانشىنىڭ ۇرپاقتارى دا ونەر مەن عىلىمنان ءورىس تاپقان. ماسەلەن, اتى اڭىزعا اينالعان ونەر يەسىنىڭ ءومىر بەلەستەرى مەن شىعارماشىلىق جولىنان سىر شەرتەتىن مازمۇندى ەڭبەكتىڭ جارىق كورۋىنە نەمەرەسى مەرۋەرت ساناتقىزى مۇرىندىق بولعان. ال اتاسىنىڭ قانشاما ءانىن نوتاعا تۇسىرگەن كەلىنى ءلايلا قۇرمانعاليەۆا ەكەنىن كوپشىلىك بىلە بەرمەيدى.
«باتىس وڭىرىندەگى امانعالي, قۇمار, سارتاي سەكىلدى حالىق كومپوزيتورلارىنىڭ اندەرىن كەيىنگىگە جەتكىزىپ, ارقا ايماعىنداعى عاجايىپ تۋىندىلاردى باتىس ءوڭىرىنىڭ ورىنداۋشىلىق ستيلىنە بەيىمدەپ ايتقان بىردەن-ءبىر ادام – ع.قۇرمانعاليەۆ. بۇل كىسىنىڭ عالامات ءانشى ەكەنىن كۇللى قازاق جاقسى بىلەدى. ال ونىڭ ايتىلماي جۇرگەن ءبىر قىرى – جىرشىلىق قابىلەتى. كەشەگى بالا وراز بەن جىبەكتىڭ ايتىسى سەكىلدى باتىستاعى ەپوستىق جىرلاردى قۇبىلتا جىرلاعانىن, حالىق تەرمەلەرىن, جىرشىلىق سارىنداردى جاڭعىرتقانىن ەكشەپ ايتۋىمىز كەرەك», دەيدى قۇرمانعازى اتىنداعى قازاق ۇلتتىق كونسەرۆاتورياسىنىڭ وقىتۋشىسى كۇنقوجا قايرۋللا.
ءىس-شارا بارىسىندا مەملەكەتتىك ورتالىق مۋزەي قورىنداعى عاريفوللا قۇرمانعاليەۆتىڭ فوتوماتەريالدارى مەن ماراپاتتارى, تىرشىلىگىندە تۇتىنعان جەكە زاتتارى, باسقا دا جادىگەرلەردەن قۇرالعان شاعىن كورمە كوپشىلىك نازارىنا ۇسىنىلدى.
الماتى