سەنات توراعاسى ماۋلەن اشىمباەۆ Facebook پاراقشاسىندا ەل ۇكىمەتىنىڭ الدىندا تۇرعان ماقسات-مىندەتتەر تۋرالى ويىن جازىپ, ۇلكەن جاۋاپكەرشىلىك جۇكتەلگەنىن جەتكىزدى, دەپ جازادى Egemen.kz.
ەل ەكونوميكاسىنىڭ الدىندا ايقىن ماقساتتار تۇرعانىن جازعان سەنات سپيكەرى باتىل شەشىم مەن نىق قادام جاساۋ ۋاقىت تالابى ەكەنىن ەسكە سالدى.
«بۇگىن مەملەكەت باسشىسىنىڭ جارلىعىمەن ولجاس بەكتەنوۆ ەلىمىزدىڭ پرەمەر-ءمينيسترى بولىپ تاعايىندالدى. ولجاس اباي ۇلى - ەلدىك مۇددە جولىندا جاۋاپتى لاۋازىمداردى ابىرويمەن اتقارىپ كەلە جاتقان تاجىريبەلى مەملەكەتتىك قىزمەتشى. سوندىقتان ول جاڭا قىزمەتتە وزىنە جۇكتەلگەن ماڭىزدى مىندەتتەردى مۇلتىكسىز ورىندايدى دەپ سەنەمىز جانە سوعان تىلەكتەستىگىمىزدى بىلدىرەمىز.
پرەزيدەنت قاسىم-جومارت كەمەل ۇلى توقاەۆ اتاپ وتكەندەي, قازىرگى تاڭدا ەل ەكونوميكاسىنىڭ الدىندا ايقىن ماقساتتار تۇر. بۇل باعىتتاعى باستامالاردى جۇزەگە اسىرۋ ءۇشىن باتىل شەشىمدەر مەن ناقتى ىستەر قاجەت ەكەنى دە ايتىلدى. وسى رەتتە پارلامەنت سەناتى مەملەكەت باسشىسىنىڭ تاپسىرمالارىن ساپالى ءارى ۋاقتىلى ورىنداۋ ءۇشىن ۇكىمەتپەن ءاردايىم قويان-قولتىق جۇمىس ىستەۋگە دايىن ەكەنىن اتاپ وتكىم كەلەدى», دەگەن م.اشىمباەۆ ۇكىمەت باسشىسىنا جاڭا قىزمەتتە ساتتىلىك تىلەدى.