قۋىرشاق تەاترى – كىشكەنتاي بالدىرعانداردى عانا ەمەس, ەرەسەكتەرگە دە عاجايىپ ەرتەگى الەمىنىڭ سيقىرلى سىرىن تانىتىپ, جاقسىلىققا, ادامگەرشىلىككە, شىنايىلىققا شاقىراتىن ءمولدىر مەكەن. ەرتەگىلەر ەلىنە ساپار شەگىپ, تەاتر قويىلىمدارىن تاماشالاعان ءاربىر كورەرمەن كوڭىلى قۋانىشقا بولەنىپ, وزگەشە اسەر الۋى ءۇشىن الماتى مەملەكەتتىك قۋىرشاق تەاترى بىرقاتار ىرگەلى ىستەردى جۇزەگە اسىرىپ جاتىر. وسى ورايدا, جۋىردا الماتى قالاسى اكىمدىگىنىڭ قولداۋىمەن تەاتر عيماراتىنا كۇردەلى جوندەۋ جۇمىستارى جۇرگىزىلدى.
الماتى مەملەكەتتىك قۋىرشاق تەاترى اراعا 10 جىل سالىپ, قايتا جاڭعىردى. الەمدىك تەاتر ساحناسىن زاماناۋي باعىتتار جاۋلاپ جاتقان قازىرگى ۋاقىتتا قۋىرشاق تەاترىنا كۇردەلى جوندەۋ جۇمىستارىن جۇرگىزۋ, ارينە, ەڭ الدىمەن زامان تالابى.
قازىرگى تاڭدا كورەرمەن زالدارى قويىلىمداردىڭ ساپاسىن ارتتىرىپ, مامانداردىڭ قولايلى جۇمىس جاساۋىنا ىڭعايلى سوڭعى ۇلگىدەگى زاماناۋي داۋىس, جارىق, ساحنا جابدىقتارىمەن جاڭارىپ, تەاتر فويەسى كورەرمەندەرگە جايلى اتموسفەرا سىيلايتىن جاڭاشىل ديزاينمەن كوركەمدەلىپ, ءتۇرلى ۇلگىدەگى قۋىرشاق تۇرلەرى, قويىلىم ەسكيزدەرىمەن بەزەندىرىلسە, عيماراتتىڭ ىشكى ينتەرەرى, سىرتقى فاسادى كورەرمەن سۇرانىسىنا ساي جاساقتالدى.
كورەرمەندەردىڭ قويىلىم تاماشالاۋ بارىسىندا جايلى دەمالۋىنا جاعداي جاسايتىن ىڭعايلى, جۇمساق ورىندىقتار, جوعارى تالعامدى ىشكى ديزاين جانە قويىلىم بارىسىنداعى جارىق پەن دىبىس قۇرىلعىلارىنىڭ ساپاسى قۋىرشاق تەاترىنا دەگەن سۇرانىستىڭ ارتۋىنا ءوز سەپتىگىن تيگىزەرى انىق.
جاڭا ۇلگىدە جابدىقتالعان تەاتر – شىعارماشىلىق جانە تەحنيكالىق ءبولىم قىزمەتكەرلەرىنە جاڭا تىنىس, تىڭ يدەيالار, جۇمىسقا دەگەن ەرەكشە كوزقاراس, شالقار شابىت, جاڭا جوبالارعا دەگەن قىزىعۋشىلىق سىيلاپ قانا قويماي, كاسىبي بىلىكتى مامانداردىڭ تەاتردا جۇمىس ىستەۋ سۇرانىسىنىڭ ارتۋىنا ىقپالى زور.
بالدىرعاندار قيالىنا قانات ءبىتىرىپ, جاقسىلىققا جەتەلەيتىن ونەردىڭ العاشقى مەكتەبى – قۋىرشاق تەاترى جاڭا جىلدى جاڭا عيماراتتا, جاڭا جوبالارمەن قۋان- تۋعا دايىن. الداعى ۋاكىتتا سۇيىكتى كورەرمەندەرمەن قاۋىشۋعا اسىق تەاتر ۇجىمى بۇلدىرشىندەرگە ارنالعان تانىمدىق, تاربيەلىك ءمانى زور, باتىلدىق پەن وجەتتىلىككە ۇندەيتىن «ەتىك كيگەن مىسىق», جاسوسپىرىمدەرگە ارنالعان فيلوسوفيالىق تەرەڭ استارعا يە «شاپان» قويىلىمدارىنىڭ پرەمەرالارىن ۇسىنباق.