ۇلتتىق قوردان 18 جاسقا دەيىنگى ءار بالانىڭ جەكە ەسەپشوتىنا قاڭتار ايىندا اۋدارىلعان قاراجات 1 اقپاننان باستاپ ءتۇستى. سەنات دەپۋتاتى اقمارال ءالنازاروۆا بالاعا جاسالعان قامقورلىق – ۇلتتىڭ قالىپتاسۋىنا جاسالعان قادام ەكەنىن ايتادى.
«وتكەن جىلى مەملەكەت باسشىسى قاسىم-جومارت توقاەۆ, «الەۋمەتتىك مەملەكەت رەتىندە ەلىمىزدە حالىقتىڭ الەۋەتىن ارتتىرۋعا باسىمدىق بەرىپ, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ ۇلتتىق قورىنان بالالارعا ارنالعان قاراجاتتى ەسەپتەۋ, تولەۋ جانە پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويعان بولاتىن.
قابىلدانعان زاڭعا سايكەس, 1 اقپاننان باستاپ ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزى بالالاردىڭ ارنايى جيناقتاۋ شوتىنا اۋدارىلا باستادى.
سەناتور رەتىندە, ەلمەن ەتەنە بايلانىستامىز. تاڭەرتەڭنەن بەرى, ەل ازاماتتارى اسىرەسە, شالعايداعى ءاربىر وتباسىنىڭ مۇشەلەرى وسى وزگەرىستەردى جىلى قابىلداپ جاتقانىن ەستىپ وتىرمىز. بولاشاققا دەگەن سەنىمدەرى ارتقان.
جاسىراتىنى جوق, قازىرگى قوعام – ەلىمىزدەگى ءاربىر وزگەرىستى سول مەزەتتە سەزىنەدى. قازىر بيلىك پەن الەۋمەت اراسىندا شەكارا جوق. سونىڭ ءبىر ايعاعىنداي, بۇگىن سەنات توراعاسى ماۋلەن اشىمباەۆ «ۇلتتىق قور – بالالارعا» جوباسىنىڭ ماقساتتارى تۋرالى جۋرناليستەردىڭ سۇراقتارىنا جاۋاپ بەرگەندە مەملەكەت بۇگىنگى جاس جەتكەنشەكتىڭ ەرتەڭىنە كەرەك ينۆەستيتسياسىنىنىڭ نەگىزىن قالىپتاستىرعاندىعىن ايتتى», دەدى ا.ءالنازاروۆا.