بۇگىن ءماجىلىستىڭ الەۋمەتتىك-مادەني دامۋ كوميتەتىندە دەنە شىنىقتىرۋ جانە سپورت ماسەلەلەرىنە, سونداي-اق نورمالاردىڭ ارتىق زاڭنامالىق رەگلامەنتتەلۋىن جويۋعا قاتىستى تۇزەتۋلەردىڭ تانىستىرىلىمى ءوتتى, دەپ جازادى Egemen.kz تومەنگى پالاتانىڭ ءباسپاسوز قىزمەتىنە سىلتەمە جاساپ.
جيىنعا اتالعان كوميتەت توراعاسى اسحات ايماعامبەتوۆ جەتەكشىلىك ەتتى. زاڭ جوباسىن تۋريزم جانە سپورت ۆيتسە-ءمينيسترى سەرىك جاراسباەۆ تانىستىردى.
ەلدىڭ ىشكى چەمپيوناتىنىن بۋكمەكەرلىك كەڭسە اتىمەن اتاۋ قانشالىقتى اقىلعا قونىمدى؟ زاڭ جوباسىن تالقىلاۋ بويىنشا قۇرىلعان جۇمىس توبىنىڭ جەتەكشىسى دەپۋتات نارتاي سارسەنعاليەۆ ەل چەمپيوناتىنا بۋكمەكەرلىك كومپانيالاردىڭ سۇعىنا كىرىپ كەتكەنىنە قىنجىلىس ءبىلدىردى.
لۋدومانيامەن كۇرەس, ويىن بيزنەسىن رەتتەۋ تۋرالى زاڭناما ازىرلەنەتىنىن جەتكىزگەن س. جاراسباەۆ مينيسترلىك تە ويىن بيزنەسىمەن بۋكمەركەرلىك كومپانيالاردىڭ قانات جايۋىن قولدامايتىنىن جەتكىزدى.
«ەشبىر ەلدىڭ فۋتبولدان ىشكى بىرىنشىلىگى بۋكمەكەرلىك كەڭسە اتاۋىمەن اتالمايدى. فۋتبولدان قازاقستان پرەمەر-ليگاسىنىڭ بۋكمەكەرلىك كومپانيا اتاۋىمەن اتالۋى دۇرىس ەمەس. سوندىقتان دا ءبىز تالقىلانىپ وتىرعان زاڭ جوباسىنا بۋكمەكەرلىك كومپانيا اتىمەن اتاۋعا شەكتەۋ قويۋ جونىندە نورما ۇسىنامىز», دەگەن ن.سارسەنعاليەۆ ۆيتسە-مينيستردەن رەسمي ورگاننىڭ وسى نورماعا قاتىستى ۇستانىمىن سۇرادى.
زاڭ جوباسىن تانىستارعان تۋريزم جانە سپورت ءمينيسترىنىڭ ورىنباسارى سەرىك جاراسباەۆ بۋكمەكەرلىك كەڭسەنىڭ ىشكى بىرىنشىلىك اتاۋىنا تەلىنەتىنىنە توقتام بولاتىنىن ايتتى.