ەڭبەك جانە حالىقتى الەۋمەتتىك قورعاۋ مينيسترلىگى وتكەن جىلدىڭ قازان ايىندا كاسىبي مەرەكەلەر تىزىمىنە تولىقتىرۋ ەنگىزدى. تىزىمگە جاڭادان قوسىلعان كاسىبي مەرەكەنىڭ ءبىرى - 1 اقپان ازاماتتىق اۆياتسيا قىزمەتكەرلەرى كۇنى, دەپ جازادى Egemen.kz.
كاسىبي مەرەكەنى بەلگىلەۋ ۇسىنىسىن «قازاقستاننىڭ ازاماتتىق اۆياتسياسى سوعىس جانە ەڭبەك ارداگەرلەرىنىڭ بىرلەسكەن كەڭەسى» ازىرلەگەن. ۇسىنىس كولىك مينيسترلىگى تاراپىنان قولداۋ تاۋىپ, ەڭبەك جانە حالىقتى الەۋمەتتىك قورعاۋ مينيسترلىگى رەسمي بەكىتكەن.
«كاسىبي مەرەكە ازاماتتىق اۆياتسيا سالاسىنداعى ءىس-شارالارعا ەرەكشە ءمان بەرىپ, مەملەكەتتىڭ جاس ۇشقىشتارىنىڭ پاتريوتتىق رۋحىن دامىتۋعا ىقپال ەتەدى», دەلىنگەن ازاماتتىق اۆياتسيا كوميتەتىنىڭ حابارلاماسىندا.
ايتا كەتەيىك, سالا قىزمەتكەرلەرى كاسىبي مەرەكەلەرىن بيىل العاش رەت اتاپ وتەدى.