حالىقارالىق «بولاشاق» باعدارلاماسى بويىنشا كەيىنگى جىلدارى اۋىلداعى جاس ماماندارعا كۆوتا ءبولىنىپ, جەڭىلدىكتەر قاراستىرىلعان. الايدا ەلدەگى جاستار مۇنى تولىققاندى پايدالانا الماي وتىر. اتالعان باعدارلاما بويىنشا اۋىلداعى قىز-جىگىتتەردىڭ شەتەلدىك جوعارى وقۋ ورنىنا ءتۇسۋ كورسەتكىشى تىم تومەن.
ماسەلەنىڭ وڭ شەشىمىن تابۋ ءۇشىن بىلتىر 6 قاراشادا «اۋىل» پارتياسى مەن حالىقارالىق «بولاشاق» باعدارلامالار ورتالىعى ءوزارا ىنتىماقتاستىق جايىندا مەموراندۋمعا قول قويعان بولاتىن. سونىڭ اياسىندا پارتيا مەن ورتالىق اۋىلداعى جاس مامانداردى «بولاشاق» باعدارلاماسىمەن شەتەلدىڭ وقۋ ورىندارىندا وقىتۋ جانە تاعىلىمدامادان وتكىزۋدە بىرلەسە جۇمىس ىستەۋگە كەلىسكەن.
ال وسى اپتا باسىندا «اۋىل» حالىقتىق-دەموكراتيالىق پاتريوتتىق پارتياسىنىڭ وكىلدەرى اتالعان ماسەلەگە بايلانىستى حالىقارالىق باعدارلامالار ورتالىعى باسشىلىعىمەن كەزدەسۋ وتكىزدى. ءىس-شاراعا «اۋىل» پارتياسى ورتالىق اپپاراتىنىڭ باسشىسى ق.سەيىتجانوۆ, پارلامەنت ماجىلىسىندەگى «اۋىل» پارتياسى فراكتسياسىنىڭ دەپۋتاتى ت.سەرىكوۆ, حالىقارالىق باعدارلامالار ورتالىعىنىڭ باسقارما توراعاسى ءا.وسپانوۆا, سونداي-اق ونلاين رەجىمدە اۋداندىق ءماسليحات دەپۋتاتتارى, اۋداندار جانە اۋىلدىق وكرۋگتەردىڭ اكىمدەرى, «اۋىل» پارتياسى وڭىرلىك فيليالدارىنىڭ توراعالارى مەن جاستار جەتەكشىلەرى قاتىستى.
جيىندا قوس تاراپ شەتەلدە «بولاشاق» باعدارلاماسىمەن ءبىلىم الۋشى اۋىل جاستارىنىڭ سانىن ارتتىرۋداعى جۇمىس جايىن تالقىلادى. اتاپ ايتساق, ەلدى مەكەندەرگە ناسيحاتتاۋ توپتارىن جىبەرۋ, ۇمىتكەرلەردىڭ شەت ءتىلىن تالاپقا ساي مەڭگەرۋىنە جاعداي جاساۋ, جەرگىلىكتى جەردەگى اگرارلىق ماماندىق يەلەرىن, مەديتسينا قىزمەتكەرلەرى مەن مۇعالىمدەردى كاسىبي تاعىلىمدامادان وتكىزۋ ماسەلەسى كەڭىنەن ءسوز بولدى.
– «اۋىل» پارتياسى تاراپىنان پارتيانىڭ فيليالدارى ارقىلى اۋىلدىق جەردەگى ساۋاتتى جاستاردى تاۋىپ, ولاردىڭ شەتەلدە ءبىلىمىن شىڭداۋعا بارىنشا كومەك كورسەتەمىز. سونىمەن قاتار ماجىلىستەگى دەپۋتاتتار ارقىلى «بولاشاق» باعدارلاماسىنىڭ كەيبىر كەمشىن تۇستارىن تولىقتىرۋعا, اۋىل جاستارىنا قولايلى بولۋى ءۇشىن زاڭعا وزگەرىستەر ەنگىزۋگە كۇش سالامىز, – دەيدى پارتيا ورتالىق اپپاراتىنىڭ باسشىسى قۋانىش سەيىتجانوۆ.
سونداي-اق كەزدەسۋدە ءسوز العان ءماجىلىس دەپۋتاتى ت.سەرىكوۆ باعدارلامادا اۋىلدىقتار ءۇشىن تەك ماگيستراتۋرادا ءبىلىم الۋ قاراستىرىلعانىن, تاعىلىمداما مەن دوكتورانتۋرانىڭ ۇمىت قالعانىن ەسكە سالدى.
جيىن سوڭىندا كەزدەسۋگە قاتىسۋشىلار باعدارلاماعا قاتىستى سۇراقتار قويىپ, ۇسىنىستارىن ايتتى. ۇيىمداستىرۋشىلار ءاربىر ۇسىنىس پەن سۇراق, كوتەرىلگەن ماسەلەنىڭ ەسكەرۋسىز قالمايتىنىن جەتكىزدى.