جاركەنت قالاسىنىڭ ىبىراي التىنسارين اتىنداعى ورتا مەكتەبىندە 74261 اسكەري ءبولىمىنىڭ قولباسشىلىعى مەن اسكەري قىزمەتشىلەردىڭ وتباسى مۇشەلەرىمەن جۇمىستى ۇيىمداستىرۋ جونىندەگى قىزمەت وكىلدەرى حالىق قاھارماندارى ساعادات نۇرماعامبەتوۆ پەن راقىمجان قوشقارباەۆتىڭ 100 جىلدىعىنا وراي ءىس-شارا ۇيىمداستىردى.
ءىس-شاراعا بەلگىلى كومپوزيتور ماقسات جاۋتىكوۆ, «قۇرمەت», «داڭق» وردەندەرىنىڭ يەگەرى, پانفيلوۆ اۋدانىنىڭ قۇرمەتتى ازاماتى, ەڭبەك ارداگەرى كۇلعايشا بەردىعۇلوۆا, تىل ەڭبەككەرى, سوتسياليستىك ەڭبەك ەرى كۇلاش ايتجانوۆا جانە قازاقستاننىڭ ەڭبەك سىڭىرگەن مۇعالىمى نۇرعايشا ءشايدىلدينوۆا ارنايى شاقىرىلدى.
قوس باتىردىڭ عاسىرلىق مەرەيتويىنا ارنالعان كەشتى قۇرلىق اسكەرلەرى باس قولباسشىسىنىڭ تاربيە جانە يدەولوگيالىق جۇمىس جونىندەگى ورىنباسارى, پولكوۆنيك ەرميان بياتوۆ اشتى.
«بيىل ءبىز قازاق حالقىنىڭ داڭقتى ۇلدارى, باتىرلار ساعادات نۇرماعامبەتوۆ پەن راقىمجان قوشقارباەۆتىڭ 100 جىلدىعىن اتاپ وتەمىز. ولار كوزسىز ەرلىگى مەن جانقيارلىق قىزمەتىنىڭ ارقاسىندا وشپەس داڭققا بولەندى. باتىر اتالارىمىز ءبىز ءۇشىن دە, بولاشاق ۇرپاق ءۇشىن ۇلگى بولىپ قالا بەرەدى», دەپ اتاپ ءوتتى ول.
كەزدەسۋدە داڭقتى باتىرلار تۋرالى مازمۇندى باياندامالار وقىلدى. اسىرەسە ولارمەن ەتەنە تانىس بولىپ, بىرگە قىزمەت ەتكەن كوزكورگەندەردىڭ ەستەلىكتەرى ەرەكشە قۇندى بولعانىن دا ايتا كەتۋ كەرەك.
اسكەري قىزمەتشىلەردىڭ وتباسى مۇشەلەرىمەن جۇمىستى ۇيىمداستىرۋ قىزمەتى ءىس-شاراعا اسكەري قىزمەتشىلەردىڭ اتا-انالارىن دا قاتىستىردى. ۇلدارى اقتاۋ قالاسى مەن مەركى اۋلىندا قىزمەت ەتىپ جاتقان انالار بالالارىمەن بەينەبايلانىس ارقىلى سويلەسە الدى.
ءىس-شارا اياسىندا حالىق قاھارماندارى ساعادات نۇرماعامبەتوۆ پەن راقىمجان قوشقارباەۆ تۋرالى كىتاپ كورمەسى ۇيىمداستىرىلىپ, دەرەكتى فيلمدەر كورسەتىلدى. كەزدەسۋدە بىرقاتار ساربازعا, بولىمشە كومانديرى مەن بولىمشە فەلدشەرىنە ادال قىزمەتى ءۇشىن العىسحاتتار مەن باعالى سىيلىقتار تاپسىرىلدى.
ءىس-شارا 74261 اسكەري ءبولىمى كوركەمونەرپازدارىنىڭ كۇشىمەن دايىندالعان كونتسەرتپەن اياقتالدى. كەش بارىسىندا تەكتىلىكتىڭ, سۇيىسپەنشىلىك پەن ادالدىقتىڭ سيمۆولى بولعان وفيتسەرلەر ءۆالسى ەرەكشە اسەرلى بولدى.