پارلامەنت سەناتى مەن ءماجىلىسىنىڭ دەپۋتاتتارى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) شتاب-پاتەرىنە باردى. دەلەگاتسيانى سەنات پەن ءماجىلىستىڭ حالىقارالىق قاتىناستار, قورعانىس جانە قاۋىپسىزدىك كوميتەتتەرىنىڭ توراعالارى اندرەي لۋكين مەن ايگۇل قۇسپان باسقاردى. ءىس-شاراعا سىرتقى ىستەر ءمينيسترىنىڭ ورىنباسارى الىبەك باقاەۆ تا قاتىستى.
اوسشك باس حاتشىسى قايرات سارىباي حالىق قالاۋلىلارىنا ورگاندار مەن ينستيتۋتتاردا جۇمىس ىستەپ تۇرعان كەڭەستىڭ قالىپتاسۋ جانە دامۋ تاريحى تۋرالى ايتىپ بەردى. سونداي-اق حاتشىلىقتىڭ اعىمداعى قىزمەتى جانە اوسشك-نى حالىقارالىق ۇيىمعا اينالدىرۋ ۇدەرىسى تۋرالى باياندادى.
– ۇيىمنىڭ نەگىزگى يدەيالارىن نەگىزگە الا وتىرىپ, اوسشك ەگەمەندىك تەڭدىك, مۇشە مەملەكەتتەردىڭ ىشكى ىستەرىنە ارالاسپاۋ, ازياداعى بەيبىتشىلىكتى, قاۋىپسىزدىك پەن تۇراقتىلىقتى نىعايتۋعا كوپجاقتى تاسىلدەردى ازىرلەۋ ارقىلى ارىپتەستىكتى كەڭەيتۋ ءۇشىن ەكونوميكالىق, الەۋمەتتىك جانە مادەني ىنتىماقتاستىق قاعيداتتارىنا نەگىزدەلگەن ساياسات جۇرگىزەدى, – دەدى قايرات سارىباي.
اتاپ ايتقاندا, اوسشك بۇۇ-مەن جانە ونىڭ جۇيەسىنە كىرەتىن مامانداندىرىلعان ۇيىمدارمەن ىنتىماقتاستىق ورناتتى. تۇركپا, اراب مەملەكەتتەرى ليگاسى, ەۋروپاداعى قاۋىپسىزدىك جانە ىنتىماقتاستىق جونىندەگى ۇيىم سياقتى وڭىرلىك قۇرىلىمدارمەن تۇراقتى قارىم-قاتىناس قالىپتاستىردى.
ايگۇل قۇسپان حاتشىلىقتىڭ باسشىلىعىنا ارنايى شاقىرعانى ءۇشىن العىسىن ءبىلدىرىپ, اوسشك جۇمىسىنىڭ ماڭىزدىلىعىن اتاپ ءوتتى. بيىل كەڭەستى شاقىرۋ تۋرالى باستامانىڭ العاش رەت كوتەرىلگەنىنە 32 جىل تولاتىنىن ەسكە سالدى.
– اوسشك كەڭ ىنتىماقتاستىقتىڭ تۇعىرناماسىنا عانا ەمەس, سونىمەن قاتار حالىقارالىق ديپلوماتيانىڭ ءتيىمدى ينستيتۋتىنا اينالدى. ءبىز 2024 جىلعى تامىزدا استانادا ەكولوگيا ماسەلەلەرى بويىنشا اوسشك مينيسترلىك كونفەرەنتسياسىن, سونداي-اق اوسشك جاستار كەڭەسىنىڭ قولداۋىمەن ەرىكتىلەر قوزعالىسى كوشباسشىلارىنىڭ سلەتىن وتكىزۋ سەكىلدى باستامالارعا قولداۋىمىزدى بىلدىرەمىز, – دەدى ايگۇل قۇسپان.
ال الىبەك باقاەۆ دەپۋتاتتاردى قازاقستاننىڭ اوسشك-گە توراعالىعىنىڭ 2020 جىلدان بەرگى نەگىزگى جەتىستىكتەرى تۋرالى حاباردار ەتتى. ول پرەزيدەنت قاسىم-جومارت توقاەۆتىڭ جانە مۇشە مەملەكەتتەردىڭ قولداۋىمەن كوپجاقتى ديالوگ پلاتفورماسىن نىعايتاتىن ەلەۋلى باستامالار تابىستى ىسكە اسىرىلعانىن اتاپ ءوتتى. سىرتقى ساياسات ۆەدومستۆوسى باسشىسىنىڭ ورىنباسارى اوسشك-ءنىڭ التىنشى ءسامميتى بارىسىندا ۇسىنىلعان پرەزيدەنت باستامالارىنىڭ ءمانى تۋرالى دا ايتتى.
قىزۋ پىكىرتالاس بارىسىندا پارلامەنتشىلەر شەكارالارداعى كەدەندىك باقىلاۋدى ۇيلەستىرۋ جانە حالىقارالىق ساۋدانى دامىتۋ, ترانسشەكارالىق سۋ رەسۋرستارى سالاسىنداعى ىنتىماقتاستىق, ەسىرتكىنىڭ زاڭسىز اينالىمىنا قارسى كۇرەستە ارنايى ورگانداردىڭ ءوزارا ءىس-قيمىلى ماسەلەلەرىن كوتەردى. كەزدەسۋگە قاتىسۋشىلار پالەستينا-يزرايل قاقتىعىسىنىڭ شيەلەنىسۋىن قوسا العاندا, حالىقارالىق ساياساتتاعى سىن-قاتەرلەردى جانە ازيالىق قاۋىپسىزدىكتىڭ ءتۇيىندى ماسەلەلەرىن شەشۋدەگى اوسشك ءرولىن تالقىلادى.
– اوسشك مەملەكەتتەرگە, ونىڭ ىشىندە ءوزارا ديپلوماتيالىق تۇرعىدان تانىمالعان مەملەكەتتەرگە ءبىر ۇستەلدە وتىرىپ, كەلىسسوزدەر جۇرگىزۋگە مۇمكىندىك بەرەدى. ۇيىمنىڭ بىرەگەيلىگى مەن كۇشى دە وسىندا جاتىر, – دەدى اوسشك باس حاتشىسى قايرات سارىباي.
ءىس-شارا سوڭىندا كوميتەت توراعاسى اندرەي لۋكين اوسشك قىزمەتى تۋرالى جان-جاقتى اقپارات بەرىلگەنى ءۇشىن العىس ءبىلدىرىپ, دەپۋتاتتىق كورپۋستىڭ كەڭەسكە جان-جاقتى قولداۋ كورسەتۋگە دايىن ەكەنىن جەتكىزدى.