قازاقستان پرەزيدەنتى قاسىم-جومارت توقاەۆتىڭ وكىمىمەن 2023 جىلى 75 ادەبيەت جانە ونەر قايراتكەرىنە مەملەكەتتىك ستيپەنديا تاعايىندالدى. بۇگىن الماتى قالاسىندا وتكەن سالتاناتتى ماراپاتتاۋ راسىمىندە مادەنيەت جانە اقپارات ءمينيسترى ايدا بالاەۆا جاس جازۋشىلار مەن اقىندارعا پرەزيدەنتتىك ارناۋلى ادەبي سىيلىقتى تابىس ەتتى, دەپ جازادى Egemen.kz.
«پرەزيدەنتىمىز تاياۋدا «Egemen Qazaqstan» گازەتىنە بەرگەن سۇحباتىندا: ء«بىز وزىق ويلى ۇلت رەتىندە حالىقتى ىدىراتاتىن ەمەس, بىرىكتىرەتىن جولدى تاڭداۋىمىز كەرەك» دەدى. ادىلەتتى ءارى قۋاتتى قازاقستان قۇرۋ جولىندا ىرگەلى رەفورمالار مەن جاڭا باستامالارعا جول اشتى. پرەزيدەنتتىڭ باستامالارىن ىسكە اسىرۋدا شىعارماشىل زيالى قاۋىم وكىلدەرى مەن مادەنيەت قايراتكەرلەرى ماڭىزدى ءرول اتقارادى. سىزدەر تاۋەلسىزدىگىمىزدىڭ تۇعىرلى بولۋى مەن ۇلتتىق بىرلىك پەن تۇتاستىقتىڭ بەرىك ورناۋىنا سۇبەلى ۇلەس قوسىپ كەلەسىزدەر. جىل سايىن تاعايىندالاتىن مەملەكەتتىك ستيپەنديا – مەملەكەتتىڭ مادەنيەت پەن ونەر قايراتكەرلەرىنە, شىعارماشىلىق قىزمەتكەرلەرىنە جانە جاس دارىندارعا جاساعان قولداۋى مەن قامقورلىعىنىڭ ايعاعى, سونداي-اق, ولاردىڭ قازاقستاننىڭ مادەنيەتىن وركەندەتىپ, الەمگە تانىتۋعا قوسقان ۇلەستەرىنە كورسەتىلگەن قۇرمەت», دەپ اتاپ ءوتتى مينيستر.
قازاقستان جازۋشىلار وداعى مىڭعا جۋىق كاسىبي جازۋشىلاردىڭ باسىن بىرىكتىرگەن. قالامگەر قاۋىمعا, مادەنيەت سالاسى مايتالماندارىنا قولداۋ كورسەتۋ – مينيسترلىك جۇمىسىنىڭ نەگىزگى ماقساتتارىنىڭ ءبىرى.
وتكەن جىلى پرەزيدەنت جارلىعىمەن ەل دامۋىنا ەلەۋلى ۇلەس قوسقان 6 قالامگەر «قازاقستاننىڭ حالىق جازۋشىسى» اتاعىمەن, 8 ونەر قايراتكەرى «قازاقستاننىڭ حالىق ءارتىسى» قۇرمەتتى اتاعىمەن ماراپاتتالدى. جىل سايىن «Umai» جانە «ايبوز» ادەبي-مادەني ۇلتتىق سىيلىقتارى, «دارىن» مەملەكەتتىك جاستار سىيلىعى بەرىلەدى.
مادەنيەتارالىق جانە ەتنوسارالىق بىرلىكتى نىعايتۋ بويىنشا بىلتىر العاش رەت ۇيىمداستىرىلعان ادەبيەت جانە جۋرناليستيكا سالاسىنداعى 11 ۇزدىك جۇمىسقا ارنايى سىيلىق بەرىلدى.
بيىل جوشى ۇلىسىنىڭ قۇرىلعانىنا 800 جىل, تاريحشى مۇحاممەد حايدار ءدۋلاتيدىڭ 525 جىلدىعى, عالىم قانىش ساتباەۆتىڭ 125 جىلدىعى, جازۋشى ءابدىجامىل نۇرپەيىسوۆ, حالىق قاھارمانى راقىمجان قوشقارباەۆ پەن ساعادات نۇرماعانبەتوۆتىڭ 100 جىلدىقتارىن جانە باسقا دا تۇلعالارىمىزدىڭ مەرەيتويلارىن اتاپ وتەمىز.
مينيستر اقىن-جازۋشىلار مەن ادەبيەتتانۋشىلارعا, دراماتۋرگتەر مەن پۋبليتسيستەرگە, تەاتر, كينو جانە بالەت اكتەرلەرىنە, قولونەرشىلەر مەن وزگە دە مادەنيەت مايتالماندارىنا ستيپەنديا تابىس ەتتى.
مادەنيەت سالاسىنداعى ستيپەنديا ءاسانالى ءاشىموۆ, مىرزاتاي جولداسبەكوۆ, بيبىگۇل تولەگەنوۆا, ولجاس سۇلەيمەنوۆ, يرانبەك ورازباەۆ, نۇرعالي ءنۇسىپجان, تۇڭعىشباي جامانقۇلوۆ, مەرۋەرت وتەكەشوۆا, اماندوس اقاناەۆ, دۋلات يسابەكوۆ, تولەن ابدىك, اكىم تارازي, گۋلۆەر رازيەۆا جانە باسقا دا قازاق ادەبيەتى مەن ونەرىنىڭ مايتالماندارىنا تابىستالدى.
سونىمەن قاتار كانن حالىقارالىق فەستيۆالىنىڭ لاۋرەاتى سامال ەسلاموۆا, سكريپكاشى ەركەبۇلان ساپارباەۆ, سۋرەتشى رەنات ەلۋباەۆ, انشىلەر اندرەي ترەگۋبەنكو, نازىم ساعىنتاي, اكتەر ماكسيم ياششەنكو سەكىلدى جانە وزگە دە جاس دارىندارعا مەملەكەتتىك قولداۋ كورسەتىلدى.