بۇدان دەيىن سولتۇستىك قازاقستان وبلىستىق سىبايلاس جەمقورلىققا قارسى كۇرەس دەپارتامەنتىنىڭ وتكەن جىلى ساتىپ الۋ باعاسىن 90 ەسە اسىرىپ, بيۋدجەتتىڭ 1,8 ملرد تەڭگەسىن ورىنسىز جۇمساعان زاڭسىزدىقتاردى انىقتاعانىن جازعان ەدىك. انتيكوردىڭ اشىق ءارى ءادىل قىزمەتى قازىر ەل اۋزىندا.
جۋىردا دەپارتامەنت قىزمەتكەرلەرى تيميريازەۆ اۋداندىق ءبىلىم ءبولىمىنىڭ باسشىسىن دەلدال ارقىلى 1,2 ملن تەڭگە پارا الىپ جاتقان جەرىنەن ۇستادى. ول اۋداندا ءبىلىم بەرۋ سالاسىنىڭ ەكى عيماراتىنا كۇردەلى جوندەۋ جۇرگىزۋ تەندەرىن جەڭىپ العان مەردىگەر كومپانيادان جاسالماعان جۇمىستىڭ اكتىسىنە قول قويعانىن وسىنداي كولەمدەگى قارجىعا باعالاعان. قازىر پارا بەرۋشى مەن الۋشىنىڭ ۇستىنەن قىلمىستىق ءىس قوزعالىپ, ەكەۋى دە تەرگەۋ وقشاۋلاعىشىندا قاماۋدا وتىر.
«بارلىق اقپاراتتى تەرگەۋ جۇمىستارى اياقتالىپ, سوتتىڭ شەشىمى شىققاننان كەيىن باق ارقىلى حالىققا جەتكىزەمىز. ازىرگە قىلمىستىق ءىس تۋرالى ايتۋعا قۇقىمىز جوق», دەيدى انتيكور قىزمەتى باسشىسىنىڭ ءبىرىنشى ورىنباسارى ايدوس ءجۇنىسوۆ. بىراق وسى ءىس بويىنشا تەرگەلگەن ءبىلىم ءبولىمىنىڭ شارۋاشىلىق مەڭگەرۋشىسى انتيكوردىڭ تەرگەۋشىسىنەن شىققان سوڭ وزىنە-ءوزى قول جۇمساماق بولعانى بەلگىلى بولىپ وتىر. وسى وقيعا تۋرالى سۇراققا ا.ءجۇنىسوۆ: «بۇل ءىستى ءبىز ەمەس, پوليتسيا قىزمەتكەرلەرى تەرگەيدى», دەپ قىسقا قايىردى.
وبلىستاعى انتيكور جۇمىسىنىڭ جاندانا تۇسكەنىن تاعى ءبىر فاكتىدەن كورۋگە بولادى. سىبايلاس جەمقورلىقتىڭ الدىن الۋ جانە ونىمەن كۇرەس ىسىنە دەپارتامەنت بۇرىنعى جەمقورلىققا قارسى كۇرەس سالاسى قىزمەتكەرلەرىنىڭ تاجىريبەسىن قولدانۋدى قولعا الىپ وتىر. «انتيكور ۆولونتەرلەرى» دەپ اتالاتىن بۇل جوباعا بۇرىن مەملەكەتتىك مەنشىكتىڭ قولدى بولۋىنا قارسى كۇرەسكەن قىراعى ازاماتتار, قوعامدىق ۇيىمدار, بيزنەس سۋبەكتىلەرى جانە كۆازيمەملەكەتتىك سەكتوردىڭ وكىلدەرى قاتىسادى. قوعامدىق ۇيىمدى قۇرۋعا ارنالعان جينالىسقا دەپارتامەنت باسشىسىنىڭ ءبىرىنشى ورىنباسارى ايدوس ءجۇنىسوۆ, انتيكور قىزمەتكەرلەرى ارداگەرلەر كەڭەسى توراعاسىنىڭ ورىنباسارى تولەگەن تورەگەلدين جانە بۇرىنعى مەملەكەتتىك مەنشىكتى تالان-تاراجعا سالۋعا قارسى كۇرەس ءبولىمىنىڭ قىزمەتكەرلەرى ءسابيت بايتەلەنوۆ, قوجاحمەت شاياحمەتوۆ, سەرىك سادۋاقاسوۆ قاتىستى.
ۇيىم مۇشەسىنىڭ ءبىرى قوجاحمەت شاياحمەتوۆ – بۇرىن مەنشىكتى ۇرلاۋعا قارسى كۇرەس بولىمىندە جۇمىس ىستەگەن بىلىكتى, تاجىريبەلى مامان. كەڭەس جىلدارى مۇنداي بولىمگە قازاق ازاماتتارى سيرەك قابىلداناتىن ەدى. وسى قىزمەتتە ۇزاق جىل مىندەتىن اتقارعان اعا بۋىن وكىلى پولكوۆنيك دارەجەسىنە دەيىن جەتىپ, زەينەتكە شىقتى. انتيكورعا وسىنداي ازاماتتاردىڭ تاجىريبەلەرى, جيناعان ءبىلىم-بىلىكتىگى وتە قاجەت. «ارداگەرلەردىڭ بىلىكتىلىگىن, تاجىريبەسىن ەسەپتەن شىعارىپ تاستاۋعا بولمايدى. كەز كەلگەن قىزمەتتىڭ شەبەرلىگى جىلدار بويى عانا قالىپتاسادى. سوندىقتان اعا بۋىنعا سەنىم ارتىپ, ۆولونتەر رەتىندە ورتاق ىسكە جۇمىلدىرعىسى كەلگەن دەپارتامەنت باسشىلىعىنا ريزاشىلىعىمدى بىلدىرەمىن», دەدى تولەگەن تورەگەلدين جيىندا.
وسىلايشا, انتيكوردىڭ سولتۇستىك قازاقستان دەپارتامەنتىندە ۆولونتەرلىك قىزمەت ءتورت باعىت بويىنشا ىسكە كىرىسپەك. ولار – قوعامدىق باقىلاۋ, جەمقورلىقتى زەردەلەۋ, كاسىبي كومەك جانە كورپوراتيۆتىك كومەك.
پەتروپاۆل