الىبەك اسقاروۆ – بۇگىنگى قازاق ادەبيەتىنىڭ ابىرويلى تۇلعاسى, قارا ءسوزدىڭ حاس شەبەرى. جازۋشىنىڭ شىندىققا سۋارىلعان, كوركەم تىلمەن كەستەلەنگەن, شۋاقتى يۋمورعا تولى شىعارمالارى وقىرمان قاۋىمنىڭ ىستىق ىقىلاسىنا بولەنىپ جۇرگەنىنە كوپتەگەن جىلدىڭ ءجۇزى بولدى. كەزىندە سەرىك قيراباەۆ سىندى عالىم-سىنشىنىڭ, شەرحان مۇرتازاداي سيرەك سۋرەتكەردىڭ بيىك باعاسىن العان ء«ور التاي, مەن قايتەيىن بيىگىڭدى» رومانىنىڭ ون رەت باسىلۋى – وسى ويدىڭ داۋسىز دالەلى.
قالامگەر كىتاپتارى وزگە تىلدەرگە دە اۋدارىلىپ, ۇلتتىق ءسوز ونەرىنىڭ مەرەيىن تاسىتا تۇسۋدە. جاقىندا الىستاعى ياكۋتيادان جاعىمدى جاڭالىق جەتتى: الىبەك اسقاروۆتىڭ «اداسقان ۇرپاق» پوۆەسى ساحا تىلىندە («ساربىللىبىت تاپتال») جارىق كوردى. ەلدىڭ «ايار» اتتى بەلدى باسپاسىنان شىققان بۇل كىتاپتى تانىمال قالامگەر ۆالەري لۋكوۆتسەۆ اۋدارعان. قازاق جازۋشىسىن «بەلگىلى سۋرەتكەر» («بيلليلەەح سۋرۋيااچچى») دەپ باعالاعان باسپانىڭ اڭداتپا سوزىندە بىلاي دەلىنگەن:
«پوۆەستە جاس جىگىتتىڭ جاڭا باستالعان تاعدىرىنداعى قىزىقتى جايلار, ورىندالماعان ارمان-ۇمىتتەرى مەن قامىعۋ-قينالىستارى, ومىردەگى ورنىن ىزدەۋى باس كەيىپكەر اتىنان اسەرلى اڭگىمەلەنەدى. ول باستان كەشەتىن تارتىستى دا قاۋىپ-قاتەرلى وقيعالار شىنشىلدىقپەن ءارى نازىك يۋمورمەن بايان ەتىلەدى. كىتاپ قالىڭ وقىرمان قاۋىمعا ار- نالعان».
كوركەم دە ويلى بەزەندىرىلگەن كىتاپتىڭ تارالىمى – 1500 دانا. ساحالاردىڭ سانى جارتى ميلليونعا دا تولمايتىنىن ەسكەرسەك, بۇل قوماقتى تارالىم ەكەنىن باعامدايمىز. سالىستىرۋ ءۇشىن قازاعىنىڭ قاتارى 14 ميلليونعا جۋىقتاعان قازاقستاندا كىتاپتاردىڭ ورتاشا 2-3 مىڭ دانا بولىپ باسىلىپ جۇرگەنىن ايتا كەتۋدىڭ ارتىعى جوق.