جۋىردا پەتروپاۆل قالاسى ونەرپاز ورەندەرىنىڭ «قارلىعاش» حورەوگرافيالىق ءانسامبلى رەسەي استاناسىنداعى بالالار مەن جاسوسپىرىمدەردىڭ «موسكوۆسكوە ۆرەميا» اتتى حالىقارالىق فەستيۆالىنە قاتىسىپ, ءبىرىنشى ورىن الىپ كەلدى.
كونكۋرسقا بارلىعى 1,5 مىڭداي ۇمىتكەر قاتىستى. فەستيۆال ماسكەۋدىڭ «كوسموس» قوناقۇيىنىڭ ۇلكەن كونتسەرتتىك زالىندا ءوتتى. قازىلار قاتارىندا يۋ.گريگوروۆيچ اتىنداعى كونكۋرستىڭ «حورەوگراف» اتالىمى بويىنشا ەكى دۇركىن لاۋرەاتى, ن.ساتس اتىنداعى بالالار مۋزىكالىق تەاترىنىڭ قويۋشى-رەجيسسەرى ە.بارىشنيكوۆا, حالىقارالىق دەڭگەيدەگى توپ-پەداگوگتەردىڭ ءبىرى د.اكيمەنكو سياقتى بىلىكتى ماماندار بولدى.
رەسەيدىڭ بارلىق وڭىرلەرىنەن كەلگەن ونەرپاز ۇلاندار اراسىندا «قارلىعاش» ءانسامبلى قازاقستاننان جالعىز بارىپ, «حالىقتىڭ ستيلدىك ءبيى» اتالىمى بويىنشا ونەر كورسەتتى. ولار «سۇلۋ قىزدار» جانە «سەۆەرنىە كارتينكي» اتتى ەكى ءنومىر ورىندادى.
جەڭىمپاز جەتكىنشەكتەردى پوەزدان پەتروپاۆل قالاسىنىڭ اكىمى س.مۇحامەديەۆ باستاعان رەسمي ادامدار, ۇستازدار مەن تۋىستارى قارسى الدى. «بالالارىمىزدىڭ جەڭىسكە جەتكەنىنە قۋانىشتىمىز. ولار بۇكىل قازاقستاننىڭ اتىن شىعارىپ, تابىسپەن ورالىپ وتىر. ءبىز ولاردىڭ بولاشاقتا دا ۇلكەن بيىكتەردەن كورىنۋىن تىلەيمىز», دەدى اكىم ءوزىنىڭ سوزىندە.
ءانسامبلدىڭ كوركەمدىك جەتەكشىسى گالينا جۇماليەۆانىڭ قۋانىشى ەرەكشە دەۋگە بولادى. ول تەبىرەنىپ تۇرىپ ءوزىنىڭ سەزىمىن بىلاي جەتكىزدى: «شىنىن ايتقاندا ءبىز قاتتى تولقىدىق. رەسەيدىڭ تۇكپىر-تۇكپىرىنەن كەلگەن حورەگرافيالىق ۇجىمداردىڭ دايىندىعى وتە كۇشتى ەكەن. ءبارى دە جالىنداپ تۇرعان جاستار. ولاردىڭ اراسىندا ءبىزدىڭ ۇجىم بارىنشا قاراپايىم بولىپ كورىندى. بىراق ساحناعا شىققاندا شابىتتانىپ كەتتى. ءوزىمىزدىڭ ۇلتتىق كولوريتىمىزدى جارقىلداتىپ, قازاق ونەرىنىڭ وتىن لاۋلاتىپ جىبەردى. وعان كورەرمەندەر قاتتى ريزا بولىپ, ۇزاق ۋاقىت قول سوقتى. ءبىزدىڭ ءبيىمىز فەستيۆالدىڭ جاڭالىعىنداي بولدى. سوندىقتان دا قازىلار ءبىرىنشى ورىن بەردى», دەدى ول.
«قارلىعاش» ءانسامبلىنىڭ قۇرىلعانىنا 50 جىلداي ۋاقىت بولعان. ول بۇعان دەيىن دە ەلىمىزدىڭ جانە الەمنىڭ سان ءتۇرلى ساحنالارىندا ونەر كورسەتكەن. بالعىن بيشىلەردىڭ قازىرگى حورەوگرافى ۆيكتوريا تيحونكوۆا ۇزاق جىلداردان بەرى جۇمىس ىستەيدى. ء«بىزدىڭ انسامبل نەگىزىنەن حالىق بيلەرىن ورىنداۋعا ماماندانعان. رەپەرتۋارىمىزدا قازاق, ورىس جانە باسقا دا ۇلتتاردىڭ بيلەرى بار. ءبىز ماسكەۋگە ءبىرىنشى رەت باردىق, ونداعى مامانداردىڭ ەڭبەگىمىزدى جوعارى باعالاعانىنا قۋانىشتىمىن», دەدى ول.
قارسى الۋشىلار ونەرپازدارعا ءتۇرلى سىيلىقتار, ديپلومدار مەن كۋبوكتار تاپسىردى. ماسكەۋ فەستيۆالىندە ولارعا تۋاپسە قالاسىندا بولاتىن فەستيۆالعا شاقىرۋ بەرىلگەن. سونىمەن بىرگە انسامبل وسى جازدا سانكت-پەتەربۋرگتە بولاتىن فەستيۆالعا قاتىسۋدان ءۇمىتتى.
پەتروپاۆل