اۋىل مەكتەپتەرىنىڭ 9-11(12) سىنىپ وقۋشىلارىنا ارنالعان جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ ءۇشىنشى كەزەڭى باستالدى. وعان وليمپيادانىڭ ەكىنشى كەزەڭىنەن وتكەن ەلىمىزدىڭ ءار وڭىرىنەن 1 088 وقۋشى قاتىسىپ جاتىر. رەسپۋبليكالىق كەزەڭ جاراتىلىستانۋ-ماتەماتيكالىق باعىتتىڭ 6 ءپانى بويىنشا (14-18 قاڭتار ارالىعىندا) جانە قوعامدىق-گۋمانيتارلىق باعىتتىڭ 7 ءپانى بويىنشا (21-25 قاڭتار ارالىعىندا) ءداستۇرلى فورماتتا ەكى تۋردان وتكىزىلەدى, دەپ حابارلايدى Egemen.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.
«وليمپيادانىڭ ماقساتى — اۋىلدىق جەرلەردەگى مەكتەپ وقۋشىلارىنىڭ دارىنى مەن قابىلەتتەرىن انىقتاۋ جانە ولارعا قولداۋ ءبىلدىرۋ, نەعۇرلىم اكادەميالىق قابىلەتتى وقۋشىلاردى تابۋ, ولاردىڭ زياتكەرلىك دامۋى مەن كاسىبي باعدارلانۋىنا جاعداي جاساۋ. ەرەجەگە سايكەس وليمپيادا 13 ءپان بويىنشا وتكىزىلەدى جانە 3 كەزەڭنەن تۇرادى. ءبىرىنشى (باستاپقى) كەزەڭگە ەلىمىزدىڭ ءار وڭىرىنەن 78 404 وقۋشى قاتىستى. ەكىنشى (ىرىكتەۋ) كەزەڭىندە 25 844 وقۋشى باق سىناستى. ولاردىڭ ىشىنەن, 1088 جەڭىمپاز ءۇشىنشى (رەسپۋبليكالىق) كەزەڭگە جولداما الدى», دەپ اتاپ ءوتتى «دارىن» رعپو زياتكەرلىك ءىس-شارالاردى ۇيىمداستىرۋ جانە حالىقارالىق ىنتىماقتاستىق ءبولىمىنىڭ باسشىسى ايگەرىم ەرنيازوۆا.
وليمپيادا قورىتىندىسى بويىنشا قاتىسۋشىلاردىڭ 45%-دان استامى جۇلدەلى بولماق. ولار وقۋ-اعارتۋ مينيسترلىگىنىڭ I, II, III دارەجەلى ديپلومدارىمەن ماراپاتتالادى. سونداي-اق بارلىق قاتىسۋشىلارعا سەرتيفيكاتتار مەن ەستەلىك سىيلىقتار بەرىلەدى. سونىمەن قاتار جەڭىمپازدارعا ەلىمىزدىڭ بىرقاتار جوعارى وقۋ ورىندارىنىڭ رەكتورلىق گرانتتارى تابىستالادى. ايتا كەتسەك, III كەزەڭنىڭ بارلىق قاتىسۋشىلارى «دارىن» رەسپۋبليكالىق سىرتتاي مەكتەبىنە قابىلداناتىن بولادى. سونىمەن قاتار I دارەجەلى ديپلوم يەگەرلەرى 2024 جىلعى جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ قورىتىندى كەزەڭىنە قاتىسادى.