قازاندىقتىڭ قۋاتى

قازاندىقتىڭ توزىپ كەتۋىنىڭ بىردەن-ءبىر سەبەبى بۇرىنعى مەنشىك يەلەرىنىڭ نەمقۇرايلىعى ەدى. قازاندىق جەكەمەنشىك قاراماعىندا بولعانىمەن, توتەنشە جاعداي ورىن العان كەزدە مەملەكەت ءتيىستى مامانداردى تارتىپ, جوندەۋ جۇمىستارىن قولعا العان. جاعداي مەملەكەت باسشىسى قاسىم-جومارت توقاەۆتىڭ جەكە باقىلاۋىندا بولدى. رەسپۋبليكالىق قا­زىنادان 8,39 ملرد تەڭگە, وبلىستىق بيۋدجەتتەن 533 ملن تەڭگە ءبولىندى. ءسويتىپ, جازداي جىلۋ ورتالىعىنىڭ بارلىق التى قازاندىعىندا كۇردەلى جوندەۋ جۇرگىزىلدى. قازىر قالپىنا كەلتىرۋ ۇدەرىسى تولىعىمەن اياقتالدى. وبلىس جانە ريددەر قالاسى­نىڭ اكىمى داۋلەت باتىرباەۆ, وزگە دە سالاعا جاۋاپتى قىز­مەتكەرلەر كۇنى-ءتۇنى جەو-دا, جۇمىستاردىڭ باسى-قاسىندا ءجۇردى. ايتا كەتۋ كەرەك, جىلۋ-ەلەكتر ستانساسىنىڭ جۇمىسىن باقىلاۋ ءالى كۇنگە دەيىن كۇن تارتىبىنەن تۇسكەن ەمەس. قانداي دا وقىس وقيعانى بولدىرماۋ ءۇشىن قازاندىقتا پاترۋلدەۋ جۇمىسى دا ۇيىم­داستىرىلعان ەدى.

– جەو-داعى العاشقى اپات بىلتىر قاراشا ايىندا بولدى. جىلىتۋ ماۋسىمى كەزىندە قازاندىقتاردا 84 رەت اپاتتى ءوشىرۋ ورىن العان. بىراق جوندەۋ جۇ­مىس­تارىن ماۋسىمنىڭ بىرىندە باستادىق. وعان دەيىن ورتا­لىقتىڭ يەلەرى اقاۋ­دى قال­پىنا كەلتىرۋ جۇمىس­تارىن ءوز كۇشىمەن جاسايتىندارىن ايتىپ, وبلىس باسشىلىعىن سەندىرىپ كەلگەن بولاتىن, جىل باسىندا جوسپارلارىن دا كورسەتكەن. بىراق ولاردىڭ مۇمكىندىكتەرى بولمادى, – دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى نۇرلان رامازانوۆ.

ماماندار ايتىپ وتكەن­دەي, جىلىتۋ ماۋسىمى شتات­تىق رەجىمدە جۇمىس ىستەپ جاتىر. قىستاي قالانى جىلىتۋ ءۇشىن ءتورت قازاندىقتىڭ كۇشى جەتەدى ەكەن. قاتتى اياز­داردا عانا قوسىمشا ءبىر قازاندىق قوسىلادى. ءسوي­تىپ, بۇگىندە ريددەر جىلۋ ەلەكتر ورتالىعىندا كۇر­دەلى جوندەۋدەن وتكەن قازان­دىقتار ورتا قىسىمدا قا­لىپتى جۇمىس ىستەپ تۇر. كۇردەلى جوندەۋدەن كەيىن قازاندىقتاردىڭ وزدەرى دە, قۇبىرلار مەن قۇرىلعىلار دا سۋ جاڭا. دەسە دە ريددەردەگى جىلۋ-ەلەكتر قازاندىعى  قوعام مەن باق وكىلدەرىنىڭ نازارىندا.

ريددەر