جاڭا جىل قارساڭىندا «استانا وپەرا» سيمفونيالىق وركەسترىنىڭ ءبىرىنشى سكريپكاشىسى, قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ پەن تەاتردىڭ كامەرالىق وركەسترى ەلوردا قوناقتارى مەن تۇرعىندارىنا تاماشا تارتۋ جاسادى. اسىرەسە قازاقستاننىڭ ەڭبەك سىڭىرگەن قايراتكەرى, ديريجەر ايدار ءابجاحانوۆتىڭ جەتەكشىلىگىمەن ورىندالعان يتاليالىق باروككو مەن ارگەنتينالىق تانگو تۋىندىلارى جۇرتشىلىقتى جىلى اسەرگە بولەدى.
دارىندى ديريجەر ايدار ءابجاحانوۆ الەمنىڭ جەتەكشى تەاترلارىندا بىرنەشە مارتە ونەر كورسەتىپ, اتى اڭىزعا اينالعان يتاليالىق La Scala تەاترىندا تاعىلىمدامادان وتكەن. سونداي-اق ول Savaria Symphony وركەسترىمەن بىرگە Bartok فەستيۆالىنە (سومباتحەي, ۆەنگريا), اۋستريا استاناسى ۆەناداعى Vidin Philarmonic Orchestra بازاسىندا زولتان پەشكونىڭ, سالۆادور ماس كوندەنىڭ شەبەرلىك ساباعىنا قاتىسىپ, قويۋشى ديريجەر رەتىندە بىرقاتار بالەت سپەكتاكلىنىڭ جوعارى دەڭگەيدە وتۋىنە ۇلەسىن قوسقان.
كلاسسيكالىق ساز اۋەلەگەن كەشتە كورەرمەندەر تالانتتى ديريجەردىڭ جەتەكشىلىگىمەن ورىندالعان XVII عاسىردىڭ ۆەنەتسيالىق رۋحى انتونيو ءۆيۆالديدىڭ مۋزىكاسىمەن قاناتتانىپ, استور پياتستسوللا جاساعان بۋەنوس-ايرەستىڭ عاجايىپ الەمىنە ساپار شەككەندەي بولدى.
كەرەمەت كەشتىڭ العاشقى بولىمىندە تەاتر مۋزىكانتتارى ا.ءۆيۆالديدىڭ «جىل مەزگىلدەرى» اتتى كونتسەرتتەر توپتاماسىن ۇسىندى. مۇندا شۋاقتى كوكتەمنەن باستاپ, قىتىمىر قىس مەزگىلىنە دەيىنگى ءاربىر كومپوزيتسيا تىڭدارمانعا مۋزىكا ارقىلى ءار ماۋسىمنىڭ وزىنە ءتان ەرەكشەلىگىن اشىپ بەردى. بۇل توپتاما ءتۇرلى مۋزىكالىق اسپاپتاردىڭ ارلەۋىمەن پوپ جانە روك مۋزىكادا, كينودا كەڭىنەن قولدانىلادى.
ەكىنشى بولىمدە استور پياتستسوللانىڭ «بۋەنوس-ايرەستەگى جىل مەزگىلدەرى» شىرقالدى. ارگەنتينالىق كومپوزيتوردىڭ تانگونىڭ سىرى تۇنعان مۋزىكاسى يتاليالىق باروككو مەن لاتىن امەريكالىق سارىنداردىڭ اراسىنداعى «التىن كوپىر» سەكىلدى. مۇنداعى قۇشتارلىق پەن ىرعاقتى سوزبەن جەتكىزۋ قيىن. كومپوزيتور وسى شىعارماسىن كەيدە بىرگە, كەيدە جەكە ورىنداعان دەپ ايتادى.
سونداي-اق كامەرالىق مۋزىكا كەشىندە قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ سيقىرلى سكريپكا ۇنىمەن ورىنداعان تاماشا تۋىندىلارى تىڭدارماندى ءتانتى ەتتى.