جاڭا جىل قارساڭىندا سولتۇستىك قازاقستان وبلىسىنىڭ اكىمدىگىندە قازاقستان رەسپۋبليكاسى ۇلتتىق وليمپيادا كوميتەتىنىڭ (ۇوك) قۇرىلعانىنا 30 جىل تولۋ سالتاناتى مەرەكەلىك جاعدايدا اتالىپ ءوتتى. وعان وبلىس اكىمى عاۋەز نۇرمۇحامبەتوۆ, ۇوك باس حاتشىسىنىڭ ورىنباسارى, بوكستان وليمپيادا چەمپيونى سەرىك ساپيەۆ قاتىستى.
قۇتتىقتاۋ سوزىندە وبلىس اكىمى عاۋەز نۇرمۇحامبەتوۆ وبلىستا سپورتقا ۇلكەن قولداۋ كورسەتىلەتىنىن, سونىڭ ارقاسىندا جەڭىستى جەتىستىكتەردىڭ دە كوپ ەكەنىن اتاپ ءوتتى. ء«بىزدىڭ وبلىس اۋماعىندا جىل سايىن كەم دەگەندە 2-3 سپورتتىق كەشەن پايدالانۋعا بەرىلەدى. ولاردى بىلىكتى جاتتىقتىرۋشىلارمەن, ماماندارمەن جابدىقتاۋ جانە جاعداي جاساۋ دا كۇن تارتىبىنەن تۇسپەيدى. وبلىستا وليمپيادالىق قوزعالىستى دامىتۋعا ەرەكشە كوڭىل بولىنەدى. پاريج قالاسىندا وتەتىن جازعى وليمپيادا ويىندارىنا ءبىزدىڭ ۆەلوشاباندوزىمىز الەكسەي لۋتسەنكو وسى كۇننىڭ وزىندە ەكى ليتسەنزيا جەڭىپ الدى. تاعى 7 سپورتشىمىز ۇمىتكەر مارتەبەسىنە يە. سولتۇستىكقازاقستاندىق اتلەتتەرىمىز كەلەسى وليمپيادا ويىندارىندا دا بيىكتەن كورىنىپ, ەلىمىزدىڭ قورجىنىنا جۇلدەلەر سالادى دەپ سەنەمىز», دەدى ول.
وسىدان كەيىن ءوڭىر باسشىسى بىرنەشە سپورتشىنى ماراپاتتاپ, سىيلىقتار تاپسىردى. سونىڭ ىشىندە سۋردوليمپيادانىڭ چەمپيونى فارحاد قىستاۋباەۆقا پاتەر كىلتىن تابىس ەتتى. اسكەري قىزمەتكەرلەر اراسىنداعى الەم چەمپيوناتىندا ءساتتى ونەر كورسەتكەنى ءۇشىن امانعالي بەكبولاتوۆ پەن قازاق كۇرەسىنەن الەم كۋبوگىنىڭ جەڭىمپازى بولعان التىنبەك اۋساعيتوۆقا, ولاردىڭ باپكەرلەرىنە العىسحات جانە ەستەلىك سىيلىقتار تاپسىردى.
ءوز كەزەگىندە وليمپيادا چەمپيونى سەرىك ساپيەۆ قىزىلجار ءوڭىرى سپورتشىلارىن جاڭا جىلمەن, ۇوك قۇرىلعانىنا 30 جىل تولۋىمەن قۇتتىقتاپ, ەلىمىزدىڭ سپورتتاعى تابىستارىنا ولجا سالىپ جاتقانى ءۇشىن العىسىن ايتتى. «اسىرەسە قىسقى سپورت ويىندارى بويىنشا ءبىزدىڭ نەگىزگى تىرەگىمىزدىڭ ءبىرى – سولتۇستىكقازاقستاندىق سپورتشىلار. بىراق كەيىنگى جىلدارى جازعى سپورتتىق ويىندار بويىنشا دا ەلىمىزدىڭ الدىڭعى قاتارىنان تابىلىپ ءجۇر. بۇل – سپورتتى قولداۋعا دەگەن جاناشىرلىقتىڭ كورىنىسى. سوندىقتان وبلىس باسشىلىعى مەن جەرگىلىكتى اۋداندار باسشىلارىنا العىسىمىز شەكسىز», دەدى ول. وسىدان كەيىن سەرىك ساپيەۆ سولتۇستىكتە سپورتتى دامىتۋعا ولشەۋسىز ۇلەس قوسىپ كەلە جاتقان ءبىر توپ ازاماتقا ۇوك مەدالدارى مەن العىسحاتتارىن تابىس ەتتى. ولاردىڭ اراسىندا قازاقتار اراسىنان كۇرەستەن العاشقى سپورت شەبەرى ءنورماتيۆىن ورىنداعان جامبىل تاسەمەنوۆ پەن قازاق كۇرەسىنەن وسى دارەجەنى العاشقى قورعاعانداردىڭ ءبىرى باۋىرجان قۇلجانوۆ بولدى.
پەتروپاۆل