جىلىوي اۋدانىنداعى جاس تەحنيكتەر ستانساسىندا روبوتتىق تەحنيكا ۇيىرمەسىنە جەتەكشىلىك ەتەتىن ونەرتاپقىش قۋانىش شالاباەۆ ەكى ەلەكتروندى تاقتا قۇراستىردى. تاقتالارعا سويىلعان قويدى جىلىكتەۋ, تاباق تارتۋ ءتاسىلى ەنگىزىلگەن.
ونەرتاپقىشتىڭ ايتۋىنشا, ەلەكتروندى تاقتا جاستار اراسىندا سويىلعان قويدى جىلىكتەۋدى ناسيحاتتاۋ ماقساتىندا قۇراستىرىلعان. تاقتاعا قويدىڭ بەينەسى سالىنىپ, ءار جىلىكتىڭ اتاۋى كورسەتىلگەن. ءار جىلىكتىڭ اتاۋى بار نۇكتەنى باسقاندا, ونىڭ قاي تاباققا سالىناتىنى تۋرالى جارىق جانادى.
«قويدى جىلىكتەۋ بۇرىننان كەلە جاتقانىمەن, جاستاردىڭ دەنى ونى بىلمەۋى مۇمكىن. تاباق تارتۋ دا ۇمىتىلا باستادى. مۇنى جاستارعا ۇيرەتۋىمىز قاجەت. سول سەبەپتەن, جاس بۋىننىڭ قىزىعۋشىلىعىن وياتۋ ءۇشىن اrduino باعدارلاماسىن قولدانۋ ارقىلى «Qazaq dastur board» جوباسىمەن ەكى ەلەكتروندى تاقتا دايىندادىم. ءبىرىنشى تاقتادا قويدى جىلىكتەۋ, ەكىنشىسىندە تاباق تارتۋ ءادىسىن ۇسىندىم», دەيدى قۋانىش شالاباەۆ.
ونىڭ جوباسىنا قىزىعاتىندار كوپ. ودان ەلەكتروندى تاقتانى سۇراۋشىلار دا بار. جەرگىلىكتى ونەرتاپقىشتىڭ بۇل جوباسى وزگە وڭىرلەرگە تاراتۋعا سۇرانىپ-اق تۇر.
اتىراۋ وبلىسى