الماتىدا اۆتوبۋستىڭ استىندا اجال قۇشقان ەرلى-زايىپتىلاردى تۋىستارى سوڭعى ساپارعا شىعارىپ سالدى, دەپ حابارلايدى Egemen.kz ktk.kz سايتىنا سىلتەمە جاساپ.
جۋىردا الماتىدا 4 بىردەي بالانىڭ اتا-اناسى تالاپ قاسىموۆ پەن جۇبايى گۇلجاحان ىرسىمباەۆا كوز جۇمدى. اجالعا قالادا بولعان اۆتوبۋس اپاتى سەبەپ. قايعىدان قان جۇتقان اعايىن-تۋىس مارقۇمداردى اقتىق ساپارعا شىعارىپ سالدى. كوز جۇمعان ەرلى-زايىپتىلاردىڭ ارتىندا 4 بالاسى قالدى, ەڭ ۇلكەنى – 23-تە, ەكىنشىسى – 18 جاستا. ءۇشىنشىسى – 9-سىنىپ وقۋشىسى, ال كەنجەسىنىڭ جاسى نەبارى بەستە.
«بالالارى تۇسىنبەيدى ءالى, ولار ءبىز كەلگەنىمىزگە قوناق دەپ, جۇگىرىپ ويناپ ءجۇر, ەرتەن مىنا ادامنىڭ ءبارى كەتكەننەن سوڭ, نە دەپ جاۋاپ بەرەمىز؟ ماماسىن سۇراسا, پاپاسىن سۇراسا نە دەپ ايتامىز؟», دەيدى مارقۇمداردىڭ تۋىسى گۇلنار تۇرسىنبەكوۆا.
ايتا كەتسەك, كوز جۇمعاندار قازاق ءتىلى مەن ادەبيەت ءپانىنىڭ مۇعالىمدەرى ەدى. اپات بولعان كۇنى ولار مەكتەپتەن شىعىپ ۇيگە قاراي اسىققان. جول جيەگىنە تۇرىپ, قالا سىرتىنا جۇرەتىن كولىكتى كۇتكەن ەكەن. بىراق ويلاماعان جەردەن اۆتوبۋستىڭ استىنا ءتۇسىپ قايعىلى وقيعانىڭ قۇرباندارى بولدى.
«كىنالىلەر جازاسىن السىن. ول قىلمىس قوي بارىپ تۇرعان! ءبىر ادامدى ەمەس بىرنەشە ادامدى باسىپ وتكەن. كەلىپ, ءتىپتى كەشىرىم سۇراماعان ادامدارعا نە دەپ ايتامىز؟ اۆتوبۋس پاركىنەن دە كەلمەدى ەشكىم», دەپ كۇرسىندى تاعى ءبىر تۋىسى ءسۇيىنباي وڭعاربەكوۆ.
ەندى قارا جامىلعان وتباسى اۆتوبۋس پاركىنەن وتەماقى تولەۋدى دە تالاپ ەتەتىنىن ايتتى.
ەسكە سالايىق, وتكەن اپتادا الماتىداعى رايىمبەك داڭعىلىنىڭ بويىندا جول اپاتى بولدى. №47 باعىتتاعى قوعامدىق كولىك جولدىڭ جيەگىندەگى ءبىر توپ ادامدى قاعىپ, ءۇش ادام كوز جۇمدى, تاعى تورتەۋى اۋرۋحاناعا تۇسكەن. اپاتقا جۇرگىزۋشى مەن جولاۋشى اراسىنداعى داۋ سەبەپ بولعان. قازىر وقيعا قاتىستى تەرگەۋ ءجۇرىپ جاتىر. كۇدىكتى جولاۋشى ەكى ايعا قاماۋعا الىنعان.