تۋريزم جانە سپورت ءمينيسترى ەرمەك مارجىقپاەۆ الماتى قالاسىنىڭ تۇرعىندارىمەن ەسەپ بەرۋ كەزدەسۋىن وتكىزىپ, مەگاپوليستىڭ سپورت سالاسى قالاي دامىپ جاتقانىن باياندادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
«بيىل الماتىداعى الاتاۋ, زەردەلى جانە جاس قانات ىقشام اۋداندارىندا 3 دەنە شىنىقتىرۋ-ساۋىقتىرۋ كەشەنىنىڭ قۇرىلىسى اياقتالدى. سونداي-اق اقجار, شۇعىلا, سايالى ىقشام اۋداندارىندا جانە اۆياتور ستاديونىندا تاعى 4 دەنە شىنىقتىرۋ-ساۋىقتىرۋ كەشەنىنىڭ, نۇركەنت ىقشام اۋدانىندا 5000 ورىندىق جەڭىل اتلەتيكا مانەجىنىڭ جوبالاۋ-سمەتالىق قۇجاتتاماسىن ازىرلەۋ باستالدى. سونىمەن قاتار ورتالىق ستاديون جانە بيىك تاۋلى «مەدەۋ» سپورت كەشەنى جاڭعىرتىلادى. جالپى بولاشاقتا 2025 جىلعا دەيىن 9 دەنە شىنىقتىرۋ-ساۋىقتىرۋ كەشەنىن, 3 مۇز ايدىنىن, جەڭىل اتلەتيكا مانەجىن جانە گيمناستيكاعا ارنالعان مانەج سالۋ جوسپارلانعان. وسى شارالاردىڭ بارلىعى سپورت الاڭدارىن 100 مىڭ شارشى مەترگە دەيىن ۇلعايتۋعا جانە تاۋلىگىنە 10 مىڭ ادامعا دەيىن قامتۋعا مۇمكىندىك بەرەتىنىن» ايتتى مينيستر.
مەملەكەت باسشىسىنىڭ تاپسىرماسىنا سايكەس وسكەلەڭ ۇرپاقتىڭ سپورتتىق الەۋەتىن دامىتۋعا باسىمدىق بەرىلەدى. وسىعان بايلانىستى مينيسترلىك مەملەكەتتىڭ سپورتتىق تاپسىرىسىن ىسكە اسىرۋ بويىنشا الماتى قالاسىندا 31 مىڭعا جۋىق بالا مەن ءجاسوسپىرىم تەگىن سپورت سەكتسيالارىمەن قامتاماسىز ەتىلگەن.
«الماتى – دۇنيەجۇزىلىك دودالاردا ەل مەرەيىن اسىرعان داڭقتى سپورتشىلار مەكەنى. باقىت سارسەكباەۆ, الەكساندر پارىگين, باقتيار يبراەۆ, ولگا شيشيگينا, دەنيس تەن, دميتري بالاندين, جانسايا ابدىمالىك جانە «قايرات» فۋتزال كلۋبىنىڭ سپورتشىلارىن اتاپ وتۋگە بولادى. جالپى العاندا, الماتى قالاسى سپورتشىلارىنىڭ الەۋەتى زور. قازىرگى تاڭدا ۇلتتىق قۇرامادا 1 200-گە جۋىق الماتىلىق سپورتشى بار. بۇل – نەگىزگى قۇرامنىڭ باسىم بولىگىن قۇرايدى. سايكەسىنشە ەلىمىزدىڭ تاۋەلسىزدىك جىلدارىندا الماتى وليمپياداعا قاتىسقان 56 سپورتشىنى دايىنداپ شىعارعان. سونىمەن قاتار بيىلعى رەسپۋبليكالىق جازعى سپارتاكيادادا الماتى قالاسى جالپىكوماندالىق ەسەپتە 1-ورىنعا يە بولدى. كوماندا قورجىنىندا 84 التىن, 71 كۇمىس, 74 قولا بار. قىتايداعى ازيا ويىندارىندا الماتى قالاسىنىڭ سپورتشىلارى 1 التىن, 3 كۇمىس جانە 9 قولا جۇلدە جەڭىپ الدى», دەدى ەرمەك مارجىقپاەۆ.