كەرەكۋدەگى اۆتوجولداردىڭ كۇتىمىنە جاۋاپتى مەردىگەر كومپانيالار قىسقى ۋاقىتقا ساقاداي سايمىز دەپ وتىر. قاراشا ايىنان بەرى وڭىردە اق ۇلپا اندا-ساندا ۇشقىنداعانى بولماسا, جولداردى بىتەپ تاستايتىن اق تۇتەك بوراندار ازىرشە تىركەلمەدى. ماماندار نەگىزگى ىلعال قاڭتار مەن اقپاندا كەلەدى دەپ بولجايدى. سوندىقتان جولعا قىزمەت كورسەتەتىن ۇيىمداردى ناعىز سىناق الدا كۇتىپ تۇرعان-سىندى.
پاۆلودار وبلىسىنداعى جولداردى قالىپتى جاعدايدا ۇستاۋعا قازىنادان بيىل 3,4 ملرد تەڭگە بولىنگەن. بۇل سومانىڭ ەسەبىنەن اۆتوكولىك جولدارىن تازالاۋ, تەحنيكالاردى جالعا الۋ, جازدا جانە قىستا كۇتىپ ۇستاۋ قاراستىرىلعان. وڭىرلىك جول قىزمەتىندە قازىرگى كۇنى 96 ازاماتتىق قورعانىس قۇرىلىمى, 798 قىزمەتكەر, 218 ينجەنەرلىك جانە 116 اۆتوكولىك تەحنيكاسى, 1 جول-كوپىر بريگاداسى, 18 جول توبى بار. رەسپۋبليكالىق ماڭىزعا يە جولداردىڭ جالپى ۇزىندىعى 1 663 شاقىرىمدى قۇراسا, ونىڭ 1 473 شاقىرىمىنا مەردىگەر كومپانيا «قاجسەرۆيس» جشس قىزمەت كورسەتەدى. ال پاۆلودار – استانا اۆتوجولىنىڭ اقىلى بولىگىن (191 شاقىرىم) كۇتىپ ۇستاۋعا «ياسسى قۇرىلىس» جشس جاۋاپتانعان. «قاجسەرۆيستىڭ» جەرگىلىكتى فيليالىندا 94 مەنشىكتى تەحنيكاسى بار. ولاردىڭ قىسقا دايىندىعى 100 پايىز دەلىنىپ وتىر. سونىمەن بىرگە 13 وندىرىستىك بازا مەن 10 جىلىتۋ پۋنكتى دايارلانىپ قويعان.
«قازاۆتوجول» اق وڭىرلىك فيليالى ديرەكتورىنىڭ ورىنباسارى الەكسەي لوگۆينەنكونىڭ ايتۋىنشا, پاۆلودارلىق مەكەمە وتكەن قىستا جولداردى ءنورماتيۆتى تازالاۋ ۋاقىتىن قىسقارتۋ ماقساتىندا بەس بىردەي قۇراما جول ماشيناسى مەن التى ارنايى تيەگىش تراكتور جالعا العان. ال بيىل 21 تەحنيكا ساتىپ الىنىپتى. جىل سوڭىنا دەيىن تاعى 10 قۇراما ماشينا جەتكىزىلەدى دەپ جوسپارلانعان.
«ياسسى قۇرىلىس» فيرماسىنىڭ وكىلدەرى 35 ارنايى تەحنيكامىز بار, پاۆلودار – استانا اۆتوبانىنىڭ وزىمىزگە تيەسىلى بولىگىن قاردان ۋاقتىلى تازالاپ تۇرۋعا تولىق دايىنبىز دەپ بىلەك سىبانىپ وتىر. بۇل اۋماقتا دا وندىرىستىك بازالار مەن 2 جىلىتۋ پۋنكتى دايىن. كاسىپورىن قوسىمشا ءتورت قۇراما جول ماشيناسىن جانە ءبىر شنەكوروتوردى جالعا الۋ تۋرالى شارتقا وتىرىپ قويعان. جولعا قىزمەت كورسەتەتىن ۇيىمدار قىسقى ۋاقىتقا 15 مىڭ تەكشە مەتر قۇم, 1 700 تەكشە مەتر سەپكىش ماتەريال مەن 4 300 توننا تۇزدى قويمالاردا ساقتاپ وتىر. بۇعان قوسا رەزەرۆتە كوكتايعاققا قارسى 75 توننا رەاگەنت بار.
وڭىرلىك توتەنشە جاعدايلار دەپارتامەنتى توتەنشە جاعدايلاردى جويۋ باسقارماسىنىڭ باستىعى اقىلبەك باياحمەتوۆ وڭىردەگى اۆتوجولداردا قار باسىپ قالاتىن ۋچاسكەلەردىڭ سانى بيىل ايتارلىقتاي ازايعانىن ايتادى. ياعني بىلتىر الگىندەي قاۋىپتى جول بولىكتەرىنىڭ سانى – 257 بولسا, بيىل ولار 215-كە دەيىن تومەندەگەن.
«پاۆلودار وبلىسىنداعى جولدار بويىندا بۇعان دەيىن 44,33 شاقىرىم قار ۇستايتىن قالقاندار بولسا, بيىل ول تاعى 3 شاقىرىمعا ۇزاردى. رەسپۋبليكالىق جولداردىڭ بويىندا كوبىنە تەمىربەتوندى قالقاندار تۇرعانىن كورگەن بولارسىزدار. وبلىستىق جانە اۋداندىق جولداردىڭ بويىندا جىلجىمالى اعاش قۇراستىرمالار قالقان رەتىندە پايدالانىلادى. پاۆلودار – استانا جولىنداعى ءبۇيىر قورشاۋلار قىستا قار باسپاۋى ءۇشىن الىنىپ تاستالدى. ال بەلدەۋ قورشاۋلارى قالدىرىلدى. سەبەبى جولدا كەيبىر اۆتوكولىكتەردىڭ دوڭگەلەكتەرى قىسقا ساي بولماي, قارسى جولاققا شىعىپ كەتىپ, جول-كولىك وقيعالارىن تۋدىراتىنى ءمالىم. جەرگىلىكتى جولداردىڭ بويىنداعى بۇتالار دا تازارتىلدى. وسىنداي ءىس-شارالاردىڭ ناتيجەسىندە قار ۇستاۋى ىقتيمال ۋچاسكەلەر بارىنشا ازايىپ وتىر», دەيدى ا.باياحمەتوۆ.
ماماننىڭ سوزىنشە, بيىلعى قىستىڭ ەرەكشە جىلى بولىپ تۇرۋى الداعى كوكتەمدە بىرقاتار قاۋىپ-قاتەرگە سوقتىرۋى مۇمكىن. كۇننىڭ بىرەسە كۇرت جىلىنىپ نەمەسە قاتتى اياز تۇرۋىنان توپىراق قاباتى بىركەلكى توڭدانبايدى. سالدارىنان جەردە مۇز قاباتتارى پايدا بولىپ, جازعىتۇرىم قار بىركەلكى ەرىمەيدى. سايكەسىنشە, وزەن سۋلارى ەرتە كوكتەمدە تاسىپ, سۋ تاسقىنى ءجيى بولاتىن اۋماقتاردا قاۋىپتى جاعداي قالىپتاسۋى ىقتيمال. توڭ بولىپ قالعان توپىراق قاباتى جىبىگەنشە ءبىراز ۋاقىت كەرەك. ونىڭ ۇستىنە قازىرگى كۇنى وبلىستا تۇراقتى قار جامىلعىسى مۇلدە جوق دەۋگە بولادى. اتالعان فاكتورلاردىڭ بارلىعى كوكتەمدە جاعدايدى ۋشىقتىراتىنى انىق.
پاۆلودار وبلىسى