تاياۋدا بالكاشين اۋىلىنىڭ تۇرعىندارى ءۇشىن اق تۇيەنىڭ قارنى جارىلعان وقيعا ورىن الدى. شىعارماشىلىق ءۇيى مەن مۋزىكا مەكتەبى پايدالانۋعا بەرىلىپ, ەل ەرتەڭى ساناتىنداعى جاس ۇرپاق وزدەرىنە كورسەتىلىپ جاتقان قامقورلىقتى جاس جۇرەكتەرىمەن سەزىنىپ, ارقا-جارقا قۋانىپ ءجۇر.
بۇگىنگى تاڭدا الدىڭعى تولقىننىڭ وكشەسىن باسىپ كەلە جاتقان جاستارمەن بىرگە بالالاردىڭ دا بولاشاعىنا ايرىقشا نازار اۋدارىلىپ كەلەدى. ولاردىڭ ءبىلىمدى, بىلىكتى بولۋىمەن قاتار, رۋحاني كەمەلدەنىپ, تانىم كوكجيەگى كەڭەيۋىنە, جاراتقان يە سىيلاعان قابىلەتتەرىنىڭ ارقاسىندا ونەرلى بولىپ وسۋىنە قولايلى جاعداي تۋعىزۋ ەڭ الدىمەن ەل ەرتەڭىن ويلاعاندىق. اۋىلدىڭ بايىرعى تۇرعىندارىنىڭ ءبىرى فلورەنتينا كەللەردىڭ ايتۋىنا قاراعاندا, ول سوناۋ 1982 جىلى پيونەرلەر ۇيىندەگى ۇيىرمەلەرگە قاتىسقان ەكەن. كەيىن بۇل ءۇي شىركەۋگە اينالعان. ودان سوڭعى جىلدارى سەلو تۇرعىندارى باۋىر ەتى بالالارىنىڭ جان-جاقتى دامۋىن اڭساۋمەن كۇن كەشكەن. كوپ تىلەگى قابىل بولىپ, قوس بىردەي شىعارماشىلىق مەكەمەنىڭ اشىلۋى ەرتەڭگە دەگەن ەل سەنىمىن نىعايتىپ وتىر. اۋداندىق ءبىلىم ءبولىمىنىڭ مەڭگەرۋشىسى اراي ابەنوۆانىڭ ايتۋىنا قاراعاندا, بالالار مەن جاسوسپىرىمدەر شىعارماشىلىعى ورتالىعىنداعى ۇيىرمەلەرگە 120 بالا جازىلعان. ال مۋزىكا مەكتەبىنە 60 تالاپكەر قاتىسادى, 18 ۇستاز ءدارىس بەرەدى. بالالار شىعارماشىلىق ۇيىندە سەگىز ۇيىرمە جۇمىس ىستەيدى. ال مۋزىكا مەكتەبىندە بەس باعىتتا ءبىلىم بەرۋ ۇيىمداستىرىلعان.
جالپى كولەمى 828 شارشى مەتردى قۇرايتىن عيماراتقا 195 ميلليون تەڭگەدەن استام قاراجات جۇمسالعان ەكەن. قۇرىلىس جۇمىسى 2022 جىلى باستالىپ, بيىل اياقتالعان. وبلىستىق بيۋدجەتتەن 25 ميلليون تەڭگە قاراجات ءبولىنىپ, بالالار مەكەمەلەرىنە قولايلى جاعداي تۋعىزۋ ءۇشىن يگەرىلگەن. اتا-انالار بالالارىنىڭ ەل قاتارلى ونەرلى دە ونەگەلى بولىپ وسەرىنە سەنىپ, كوڭىلدەرىن دەمدەپ وتىر.
اقمولا وبلىسى,
ساندىقتاۋ اۋدانى