پايدالانىلماي جاتقان جانە جەكەلەگەن شارۋاشىلىقتاردىڭ قۇزىرىنا زاڭسىز ءوتىپ كەتكەن جەرلەردى قايتارۋ قادامى ەلگە بولسىن دەگەن نيەتتەن تۋىپ وتىر. ويتكەنى يەلىگىندەگى ەن جەردى يگەرمەي, شارۋاعا يكەمدەمەي بوستان-بوس ۇستاعان لاتيفۋنديستەردىڭ كەسىرىنەن جۇرتىمىز قانشاما يگىلىكتەن قاعىلدى. وسى ولقىلىقتىڭ ورنىن تولتىرۋ ماقساتىندا پرەزيدەنت پارمەنىمەن ءبىراز جۇمىس قولعا الىنىپ, ناتيجەسىندە 10 ملن گەكتار جەر مەملەكەت مەنشىگىنە قايتارىلدى.
مەملەكەت باسشىسى قاسىم-جومارت توقاەۆتىڭ جولداۋىندا ايتىلعان تاپسىرماسىنا سايكەس 2022-2023 جىلدار ارالىعىندا ءتيىستى جۇمىستار اتقارىلدى. بۇل رەتتە پرەزيدەنت تاپسىرمالارىن ساپالى ءارى ۋاقتىلى ورىنداۋ ماقساتىندا پرەمەر-مينيستر ءاليحان سمايىلوۆتىڭ وكىمىمەن ارنايى مەملەكەتتىك كوميسسيا قۇرىلدى. ونىڭ قۇرامىنا قۇقىق قورعاۋ ورگاندارىنىڭ, مينيسترلىكتەر مەن اكىمدىكتەردىڭ وكىلدەرى كىردى.
جۇرگىزىلگەن جۇمىستاردىڭ ناتيجەسىندە پايدالانىلماي جاتقان جانە زاڭنامانى بۇزا وتىرىپ بەرىلگەن 10 ملن گەكتار اۋىل شارۋاشىلىعى جەرلەرى مەملەكەت مەنشىگىنە قايتارىلدى. سونداي-اق جايىلىمدىق جەر تاپشىلىعى ماسەلەسىنىڭ وزەكتىلىگىن ەسكەرە وتىرىپ, قايتارىلعان جەرلەردى ءتيىستى ەلدى مەكەندەرگە بەكىتۋ ارقىلى شارۋالارعا قاتاڭ تارتىپپەن ناقتى قاجەتتىلىك ءۇشىن بەرىلىپ جاتىر.
مەملەكەت باسشىسىنىڭ تاپسىرمالارىن ورىنداۋدا «Amanat» پارتياسى جانىنداعى «جەر اماناتى» كوميسسياسىنىڭ قوعامدىق-پارتيالىق باقىلاۋى ماڭىزدى فاكتورعا اينالدى. اتاپ ايتقاندا, اتالعان كوميسسيا قايتارىلاتىن جەرلەردى قايتا ءبولۋدى باقىلاۋمەن اينالىستى.
وسىلايشا, جەردى حالىق اراسىندا ودان ءارى ءادىل ءبولۋ ماسەلەلەرى ۇكىمەتتىڭ ەرەكشە باقىلاۋىندا بولادى.