قازاقستاندا 14 مىڭ شاقىرىمنان استام يرريگاتسيا جۇيەسىنىڭ توزىعى جەتكەن. سالدارىنان تاسىمال كەزىندە سۋدىڭ 40%-دان استامى جوعالادى. ماسەلەنى شەشۋ ءۇشىن سۋ رەسۋرستارى جانە يرريگاتسيا مينيسترلىگى سۋارۋ جۇيەلەرىن كەشەندى رەكونسترۋكتسيالاۋ بويىنشا اۋقىمدى جوبانى قولعا الۋدى جوسپارلاپ وتىر, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
جوبانى 3 كەزەڭگە ءبولىپ ىسكە اسىرۋ ۇسىنىلىپ وتىر. العاشقى كەزەڭدە, 2024-2025 جىلدارى 3,5 مىڭ شاقىرىم سۋ ارناسى جاڭارتىلادى. بۇل جىل سايىنعى سۋ شىعىنىن 0,5 تەكشە شاقىرىمعا دەيىن ازايتۋعا مۇمكىندىك بەرمەك.
قازىرگى ۋاقىتتا ەلىمىزدەگى سۋارۋ جۇيەسىنىڭ جالپى ۇزىندىعى 35 مىڭ شاقىرىمنان اسادى. ونىڭ 20,6 مىڭ شاقىرىمى رەسپۋبليكالىق مەنشىكتە. 14,7 مىڭ شاقىرىمى كوممۋنالدىق جانە 0,5 مىڭ شاقىرىمى جەكەمەنشىكتە.
كەشەندى جوسپاردى ىسكە اسىرۋ سۋ رەسۋرستارىن 3,7 تەكشە شاقىرىمعا دەيىن ۇلعايتۋدى جانە سۋارمالى جەرلەردى 2,2 ميلليون گەكتارعا دەيىن ارتتىرۋدى كوزدەيتىنىن ايتا كەلە ۆەدومستۆو باسشىسى نۇرجان نۇرجىگىتوۆ: «بۇل سونىمەن قاتار جىل سايىنعى سۋارۋعا ارنالعان سۋدىڭ جوعالۋىن ازايتىپ, 2030 جىلعا قاراي ونىڭ كولەمىن 3 تەكشە شاقىرىمعا دەيىن جەتكىزۋگە مۇمكىندىك بەرەدى», دەدى.