ليريكالىق اندەرىمەن تالاي جۇرەكتى تەربەگەن كومپوزيتور مەلس وزبەكوۆتىڭ شىعارماشىلىق مۇراسى ماڭگى ولمەسى انىق. ايگىلى «گاۋھارتاس» فيلمىندە شىرقالعان «كەلشى, ايىم» ءانىن قازىرگى كەزدە ءتۇرلى داۋىستاعى انشىلەر ورىنداپ ءجۇر. ودان بولەك «كەلشى, قۇلانعا» ءانى تۋعان جەرى قۇلاندىقتاردىڭ گيمنىنە اينالىپ كەتكەن.
ءبىرشاما ۋاقىت بۇرىن بەلگىلى كومپوزيتوردىڭ وشپەس مۇراسى تاسقا باسىلىپ, «مەلستىڭ مۋزاسى» اتتى جاڭا جيناق جارىق كورگەن بولاتىن. ونەر يەسىنىڭ شىعارماشىلىعىنا ارنالعان, زامانداستارىنىڭ ەستەلىكتەرى جيناقتالعان جاڭا كىتاپتىڭ تانىستىرىلىمى ادەبي-سازدى كەشكە ۇلاستى. ءىس-شارانى مەلس وزبەكوۆتىڭ رۋحاني ءىنىسى, كومپوزيتور دۇيسەنالى بىقىباەۆ جۇرگىزىپ وتىردى.
شوقان ءۋاليحانوۆ اتىنداعى وبلىستىق امبەباپ-عىلىمي كىتاپحانادا وتكەن ءىس-شارا بارىسىندا وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ قازاق ونەرىنىڭ تورىنەن ويىپ تۇرىپ ورىن العان مەلس مۇراسىن جاڭا بۋىننىڭ جادىندا جاڭعىرتۋدىڭ ماڭىزدىلىعىن اتاپ ءوتتى. اقىن شىرىن ماماسەرىكوۆا, «جاڭارۋ» رەسپۋبليكالىق قوعامدىق بىرلەستىگى وبلىستىق فيليالىنىڭ جەتەكشىسى قاسىمحان تولەنديەۆ ەستەلىكتەرىمەن ءبولىستى.
بۇل كۇنى كەنەن ازىرباەۆ اتىنداعى وبلىستىق فيلارمونيانىڭ انشىلەرى مەلستىڭ بىرنەشە ءانىن ناقىشىنا كەلتىرە شىرقاسا, مادەنيەت سالاسىنىڭ ۇزدىگى وڭال ازاماتوۆا دۇيسەنالى بىقىباەۆتىڭ انىنە, ارعىنباي بەكبوسىننىڭ سوزىنە جازىلعان «مەلستى اڭساۋ» ءانىن ورىنداپ, جينالعان جۇرتتىڭ جانارىنا جاس ءۇيىردى.
كەيىننەن مەلستىڭ جەرلەس ىنىلەرى مەن باۋىرلارى ءىس-شاراعا ارنايى قاتىسقان مارتەبەلى مەيمانداردىڭ يىعىنا شاپان جاۋىپ, قۇرمەت كورسەتتى. ولاردىڭ قاتارىندا ەكى مىڭىنشى جىلدارى تۇرار رىسقۇلوۆ اۋدانىنىڭ تىزگىنىن ۇستاعان كەزدە يدەولوگيا جونىندەگى ورىنباسارى دۇيسەنالى بىقىباەۆتىڭ ۇسىنىسى نەگىزىندە اۋداندىق مادەنيەت ۇيىنە مەلس وزبەكوۆتىڭ ەسىمىن بەرۋگە ىقپال ەتكەن قاسىمحان تولەنديەۆ تە بار.
تاراز