بيىل بەلگىلى اقىن, قازاقستان جازۋشىلار وداعىنىڭ مۇشەسى امانقوس ەرشۋوۆتىڭ تۋعانىنا 80 جىل تولدى. وسىعان وراي ۇلتتىق اكادەميالىق كىتاپحانادا اقىننىڭ «قاسيەتتى قازىنا», «اقمەشىت», «بارماقبايدىڭ باسىنان كەشكەندەرى» اتتى كىتاپتارىنىڭ تۇساۋكەسەرى ءوتتى.
قازاق پوەزياسىنا وزىنە ءتان قوڭىر ۇنىمەن كەلگەن اقىن ءونىمدى ەڭبەك ەتىپ, سوڭىنا مول مۇرا قالدىردى. ونىڭ «كوكجيەگىم – كەلەشەگىم», «شىرقاۋ», «شوپان بالاسى», «جىلقىشىنىڭ ۇلى», «ويسىلقارا», «التىن بوساعا», «شۇعىلالى شاقتار», ء«پىر بەكەت پەن جىر زەكەت», «وعىلاندى» جانە باسقا دا جىر جيناقتارى كەزىندە ادەبيەت سىنشىلارى مەن وقىرمانداردان ءوز باعاسىن العان.
ءىس-شارا بارىسىندا بالالار جازۋشىسى تولىمبەك ءابدىرايىم, اقىن «تۇركىستان» گازەتىنىڭ باس رەداكتورى باۋىرجان باباجان ۇلى, اقىن احمەت كەندىربەك ۇلى قارىمدى قالامگەردىڭ ازاماتتىعى مەن شىعارماشىلىعى تۋرالى جىلى ەستەلىكتەرىمەن ءبولىستى. سونداي-اق ۇستاز راۋشان قۇرمانعاليەۆا اۆتوردىڭ «قاسيەتتى قازىنا» اتتى كىتابىنداعى ولەڭدەردى باستاۋىش سىنىپتاردىڭ وقۋلىعىنا ەنگىزىلسە دەگەن ۇسىنىسىن ايتتى.
اقىننىڭ بالالارعا ارنالعان «اقمەشىت» اتتى كىتابىنا بەكەت اتا تۋرالى «كيە» پوەماسى, سونداي-اق «بەيبارىس», «ارۋاق», «دالاباي», «اسالى-كوكەتاي» جانە باسقا دا تۋىندىلارى ەنسە, «قاسيەتتى قازىنا» اتتى جيناققا ۇلتتىق قۇندىلىقتاردى دارىپتەگەن بالالاردىڭ ۇعىمىنا جەڭىل شىعارمالارى توپتاستىرىلعان. ال «بارماقبايدىڭ باسىنان كەشكەندەرى» كىتابىندا اۆتور ءتورت ت ۇلىك مال, ەر قاناتى – جىلقى, تۇيە مەن سيىر, قوي تۋرالى جىرلاي وتىرىپ, اۋىل ءومىرىن, ءتورت ت ۇلىكتىڭ قاسيەتىن بالالارعا الۋان قىرىنان تانىستىرادى. جاڭا كىتاپتار «كاۋسار» باسپاسىنان جارىق كوردى. وندا ابىلقايىر جانتاسوۆ, كاميلا جاپالوۆا سەكىلدى قىلقالام شەبەرلەرىنىڭ سۋرەتتەرى پايدالانىلعان. مۇقاباسىن سۋرەتشى الماس سىرعاباي بەزەندىرگەن. مازمۇندى شارا سوڭىندا قالامگەردىڭ قىزى, اقىن, اۋدارماشى, حالىقارالىق «الاش» ادەبي سىيلىعىنىڭ لاۋرەاتى مارجان ەرشۋ اتالعان جاڭا كىتاپتاردى ۇلتتىق اكادەميالىق كىتاپحانا قورىنا تاپسىردى.