ەلوردادا قىزىلشا اۋرۋى دەندەپ بارادى. №3 كوپبەيىندى قالالىق بالالار اۋرۋحاناسىنىڭ ينفەكتسيالىق ستاتسيونارىندا 200-گە جۋىق بالا قىزىلشادان ەم الىپ جاتقانىن, ونىڭ باسىم بولىگى – ۋاقتىلى ەكپە الماعاندار ەكەنىن ەلوردا اكىمدىگىنىڭ رەسمي سايتى حابارلادى, دەپ جازادى Egemen.kz.
اۋرۋحانادا جاتقان انالار اراسىندا ەكپە الۋدىڭ ماڭىزدىلىعىن تۇسىنگەندەر كوپ. بالالارىنا ۋاقتىلى ەكپە سالدىرماعان انالار مەن دەر كەزىندە ۆاكتسينا جاساتقان انالار ويلارىن ءبولىستى.
«بالامنىڭ 5 كۇن بويى قىزۋى كوتەرىلدى. دەنساۋلىعى جاقسارماي جاتقانىن كورىپ, جەدەل مەديتسينالىق جاردەم شاقىردىق. بالام سويلەي الماي, تۇرا الماي قاتتى اۋىرعان ەدى. ەگەر دە ەكپە السام, بۇل جاعداي بولماۋشى ما ەدى دەپ ويلايمىن. ۆاكتسينا سالدىرعان ۇلكەن بالام جەڭىل تۇردە اۋىرىپ, تەز ساۋىعىپ شىقتى. ەندى الداعى ۋاقىتتا قىزىلشا اۋرۋىنان ەكپەنى الدىن الا مىندەتتى تۇردە الاتىن بولامىن», دەدى داريعا وتەشوۆا.
قازىرگى تاڭدا, قوعامدىق دەنساۋلىق ساقتاۋ باسقارماسىمەن قىزىلشا اۋرۋىنىڭ الدىن الۋ, ەمدەۋ جانە يممۋنداۋ بويىنشا ءتيىستى جۇمىس جۇرگىزىلىپ جاتىر.
جالپى, قابىلداۋ بولمەسىندە دارىگەرلەردى قابىلداۋدىڭ 8 بەكەتى, ونىڭ ىشىندە قىزىلشا بويىنشا قابىلداۋ بولمەسىندە 2 بەكەت ۇيىمداستىرىلدى. تاۋەكەل توبىنداعى بالالارعا (Triage – جۇيەسى بويىنشا قىزىل ءتۇس) كەزەكتەن تىس قىزمەت كورسەتىلەدى. سونداي-اق ءاربىر ينفەكتسيالىق بولىمشەدە قوسىمشا ورتا مەديتسينالىق پەرسونالدىڭ تاعى ءبىر بەكەتى ورنالاستىرىلدى.
ەسكە سالايىق, ەلوردادا 6 ايدان باستاپ, 10 اي 29 كۇنگە دەيىنگى سابيلەردى جاپپاي ۆاكتسيناتسيالاۋ ءجۇرىپ جاتىر. ولارعا جەلتوقسان ايىنان باستاپ, 2-4 جاس ارالىعىنداعى بالالار قوسىلادى.
«ناۋقاسپەن بايلانىس بولعان جاعدايدا, قوسىمشا ەكپە الۋ ءۇشىن كەز كەلگەن تۇرعىن تۇرعىلىقتى مەكەنجايى بويىنشا ەمحاناعا جۇگىنۋى كەرەك ەكەنىن ەسكە سالامىز. ءوزىڭىزدىڭ جانە جاقىندارىڭىزدىڭ دەنساۋلىعىن ساقتاڭىز!», دەلىنگەن قوعامدىق دەنساۋلىق ساقتاۋ باسقارماسى تاراتقان حابارلامادا.