ءماجىلىستىڭ جالپى وتىرىسىندا مادەنيەت جانە اقپارات ءمينيسترى ايدا بالاەۆا «ماسس-مەديا تۋرالى» جانە وعان ىلەسپە زاڭ جوباسى بويىنشا بايانداما جاساپ, دەپۋتاتتاردىڭ ساۋالىنا جاۋاپ بەردى, دەپ حابارلايدى Egemen.kz.
«ماسس-مەديا تۋرالى» جانە وعان ىلەسپە زاڭ جوباسىنا قاتىستى باياندامادان كەيىن دەپۋتات ەرمۇرات باپي مەملەكەتتىك اقپاراتتىق تاپسىرىستىڭ بولىنىسىنە بايلانىستى ساۋال جولدادى.
«مەملەكەتتىك اقپاراتتىق تاپسىرىسقا تەك مەملەكەتتىك اقپارات قۇرالدارى قاتىساتىنى كوزدەلگەن. مەملەكەتتىك اقپاراتتىق تاپسىرىستى تەك تارالىمى از مەملەكەتتىك باق-قا بەرۋ اقپارات سالاسىندا بيۋدجەت قاراجاتىن جۇمساۋدىڭ تيىمسىزدىگىنە اكەلىپ سوقپاي ما؟ تاۋەلسىز باق-تىڭ مەملەكەتتىك اقپاراتتىق تاپسىرىسقا قاتىستىرۋ مۇمكىندىگى ۋاكىلەتتى ورگاننىڭ تاراپىنان زاڭ جوباسىندا نەگە قارالماعان؟», دەدى دەپۋتات ەرمۇرات باپي. مادەنيەت جانە اقپارات ءمينيسترى ا.بالاەۆا مەملەكەتتىك اقپاراتتىق تاپسىرىس بويىنشا وزگەرىس ەنگىزىلەتىنىن ايتتى.
«مەملەكەتتىك قۇزىرلى ورگان رەتىندە بۇقارا حالىقتى شىنايى اقپاراتپەن قامتىپ, مەملەكەتتىڭ ساياساتىن جان-جاقتى جەتكىزۋگە مۇددەلىمىز. سوندىقتان دا اقپاراتتىق مەملەكەتتىك تاپسىرىس تەك مەملەكەتتىك ورگاندارعا بەرىلەدى دەۋ قيسىنسىز. ءبىز جەكەمەنشىكتەگى اقپارات قۇرالدارىمەن دە قويان-قولتىق جۇمىس اتقارىپ, مەملەكەتتىك اقپاراتتىق تاپسىرىستى بەرىپ وتىرمىز. مەملەكەتتىك اقپاراتتىق تاپسىرىسقا وزگەرىس ەنگىزىپ, بۇدان بىلاي گرانتتىق قارجىلاندىرۋ ماسەلەسىنە كوشەمىز. ويتكەنى قازىرگى قولدانىستاعى مەحانيزم بويىنشا ءسوزدى, سيمۆولدى ساناۋعا باسىمدىق بەرىلەدى دە, تاقىرىپتىڭ قامتىلۋى, وزەكتىلىگى جان-جاقتى اشىلۋى كەيىنگە ىسىرىلىپ قالادى. شىعارماشىلىق ساپا دا تومەندەيتىنى راس. سوندىقتان ءبىز گرانتتىق جۇيەنى ەنگىزۋ ارقىلى تاقىرىپتىڭ جان-جاقتى اشىلۋىنا باسىمدىق بەرەمىز. گرانتتىق جوبا الدىمەن رەسپۋبليكالىق باق-تى قامتيدى, ناتيجەسى جاقسى بولسا, جەرگىلىكتى اقپارات قۇرالدارىندا دا قولدانىسقا ەنگىزەمىز», دەدى مينيستر.