جاقىندا وزبەكستاننىڭ ءا.ناۋاي اتىنداعى مەملەكەتتىك اكادەميالىق ۇلكەن تەاترى باس قالاعا گاسترولدىك ساپارمەن كەلىپ, «استانا وپەرا» ساحناسىندا ونەر كورسەتتى. تاريحى باي تەاتر ۇجىمى ەلوردالىقتارعا وپەرا مەن بالەتتىڭ ۇزدىك تۋىندىلارىنان گالا-كونتسەرت ۇسىندى.
ء«بىزدىڭ ەكى ەلدى ونداعان جىل بويى قالىپتاسقان شىعارماشىلىق پەن جاقىن مەملەكەتتىك قارىم-قاتىناس بايلانىستىرادى. قوس حالىقتى شىنايى دوستىق پەن تاتۋ كورشىلىك بىرىكتىرەدى. تەاترىمىزدىڭ قازاقستانعا گاسترولدىك ساپارى – ەكى مەملەكەتتىڭ ءوزارا شىعارماشىلىق بايلانىسىن نىعايتىپ, مادەنيەتىن بايىتاتىنى انىق. ۇيىمداستىرۋ تۇرعىسىنان مۇنداي ۇلكەن تۋر اۋقىمدى حالىقارالىق جوبا سانالادى. مۇندا 110 ادامنان قۇرالعان شىعارماشىلىق ۇجىمدى كورسەتۋىمىز قاجەت. وسى توپقا حالىق ارتىستەرى, ونەر قايراتكەرلەرى, ەڭبەك سىڭىرگەن ارتىستەر, سونداي-اق كوپتەگەن حالىقارالىق بايقاۋدا, سونىڭ ىشىندە جۋىردا وزبەكستاندا وتكەن «Competition dell’وpera» دوداسىنىڭ لاۋرەاتى اتانعان دارىندى جاستار ەندى. ءا.ناۋاي اتىنداعى ءماۇت سيمفونيالىق وركەسترى دە ونەر كورسەتەدى. بۇل ەلىمىزدىڭ وپەرا جانە بالەت ونەرىن جان-جاقتى تانىستىرۋعا مۇمكىندىك بەرەدى», دەدى ءا.ناۋاي اتىنداعى مەملەكەتتىك اكادەميالىق ۇلكەن تەاتردىڭ ديرەكتورى, وزبەكستاننىڭ حالىق ءارتىسى راميز ۋسمانوۆ.
ەلوردالىق كورەرمەندەر تاماشا كەشتە وزبەكتىڭ ءتول وپەرا جانە بالەت شىعارمالارىمەن جاقىن تانىسىپ, جىلى اسەرگە بولەندى. دالىرەك ايتقاندا, ءا.ناۋاي اتىنداعى ۇلكەن تەاتر سوليستەرى دج.ۆەرديدىڭ «دون كارلوس», پ.چايكوۆسكيدىڭ «يولانتا» وپەرالارىنان نومىرلەر ۇسىنىپ, دج.ءپۋچچينيدىڭ «بوگەما», ۆ.ا.موتسارتتىڭ «سيقىرلى فلەيتا», ف.چيلەانىڭ «ادريانا لەكۋۆريور» وپەرالارىنان اريالاردى ناقىشىنا كەلتىرىپ ورىندادى. وزبەك كومپوزيتورى, كسرو حالىق ءارتىسى م.ءاشرافيدىڭ «كاشميريدا» رومانسى, سونداي-اق وزبەك كسر حالىق ءارتىسى, كومپوزيتور س.يۋداكوۆتىڭ «مايسارانىڭ ايلاسى» وپەراسىنان قويىلعان ۋۆەرتيۋرا مەن كورىنىستەر باعدارلامانىڭ اجارىن ودان ءارى اشا ءتۇستى.
عاجايىپ گالا-كونتسەرتتە بىرەگەي بالەتتىك قويىلىمدار دا ۇسىنىلدى. ل.مينكۋستىڭ «دون كيحوت», ا.اداننىڭ «جيزەل» سپەكتاكلدەرىنەن نومىرلەر, ر.دريگونىڭ «تاليسمان» بالەتىنەن پا-دە-دە كورسەتىلدى. اسىرەسە ج.بيزە-ر.ششەدريننىڭ «كارمەن سيۋيتا» بالەتىنەن ۆارياتسيالار مەن اداجيو, س.پروكوفەۆتىڭ «رومەو مەن دجۋلەتتا» بالەتىنىڭ بالكونداعى كورىنىستەرىندەگى ارتىستەردىڭ شەبەرلىگى كورەرمەندى ءسۇيسىندىردى. سونىمەن بىرگە ماەسترو دەنيس ۆلاسەنكونىڭ جەتەكشىلىگىمەن ۇلكەن تەاتردىڭ سيمفونيالىق وركەسترى بىرقاتار كلاسسيكالىق تۋىندىنى تىڭدارمانعا تارتۋ ەتتى.