پرەزيدەنتتىڭ قازاقستان حالقىنا جولداۋىن ىسكە اسىرۋ اياسىندا سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى «ەلىمىزدىڭ وڭىرلەرىندەگى اۋىل شارۋاشىلىعى كووپەراتسياسىنىڭ جاي-كۇيى جانە شارۋا قوجالىقتارىن ىرىلەندىرۋ تۋرالى» تاقىرىبى بويىنشا كەڭەيتىلگەن وتىرىس وتكىزدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كەزدەسۋدى اشقان اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ نارىقتى دامىتۋ جاعدايىنداعى اۋىل شارۋاشىلىعى كووپەراتيۆتەرىنىڭ نەگىزگى پروبلەمالارىنا توقتالدى جانە تەك ءىرى شارۋاشىلىقتار عانا مەملەكەتتەن سۋبسيديا الاتىنىن, ال شاعىن فەرمالاردىڭ 3%-ى عانا قولداۋ الۋعا مۇمكىندىگى بار ەكەنىن اتاپ ءوتتى.
«اۋىل تۇرعىندارى قوياتىن ەڭ ماڭىزدى سۇراق – كووپەراتيۆ قۇرۋدىڭ قانداي ارتىقشىلىعى بار جانە پايداسى نەدە؟ اۋىل تۇرعىندارى كوبىنەسە بۇل سۇراقتارعا ناقتى جاۋاپ الا المايدى جانە سوعان وراي قانداي دا ءبىر شەشىم قابىلداي المايدى. وسىنىڭ ءوزى قۇرىلعان كووپەراتيۆتەردىڭ ازدىعىنا باستى سەبەپ بولۋى مۇمكىن. بۇگىنگى كەزدەسۋ بارىسىندا وسى جانە باسقا دا وزەكتى ماسەلەلەر بويىنشا پايدالى ۇسىنىستار مەن جۇيەلى ويلار تالقىلانادى دەپ ۇمىتتەنەمىز», دەدى ءالي بەكتاەۆ.
كەزدەسۋگە قاتىسۋشىلار وتاندىق ءونىمنىڭ باسەكەگە قابىلەتتىلىگىنىڭ تومەندىگىن, كووپەراتيۆتى تىركەۋ كەزىندە كوپتەگەن قۇجاتتار تاپسىرۋ جونىندەگى تالاپتار پروبلەماسىن جانە «اۋىل شارۋاشىلىعى كووپەراتسياسى تۋرالى» قازاقستان رەسپۋبليكاسىنىڭ زاڭىن وزگەرتۋ قاجەتتىگىن تالقىلادى.
اۋىل شارۋاشىلىعى ءمينيسترىنىڭ ورىنباسارى ازات سۇلتانوۆ ءوز سوزىندە قازىرگى ۋاقىتتا اۋىل حالقىنىڭ تابىسىن ارتتىرۋ جونىندەگى «اۋىل اماناتى» جوباسى ىسكە اسىپ جاتقانى تۋرالى ايتتى. ءاربىر اۋىلدىق وكرۋگتە وندىرىستىك جابدىقتار مەن ماتەريالدىق-تەحنيكالىق رەسۋرستاردى ءوندىرۋ, وڭدەۋ, وتكىزۋ, ساقتاۋ, جابدىقتاۋمەن اينالىساتىن اۋىل شارۋاشىلىعى كووپەراتيۆتەرىن قۇرۋ جوسپارلانىپ وتىرعانى بەلگىلى بولدى.
كەڭەيتىلگەن وتىرىسقا سونىمەن قاتار ساۋدا جانە ينتەگراتسيا مينيسترلىگىنىڭ وكىلدەرى, «اگرارلىق نەسيە كورپوراتسياسى» اق باسشىلىعى جانە ماڭعىستاۋ, تۇركىستان جانە اباي وبلىستارىنىڭ اۋىل شارۋاشىلىعى باسقارمالارىنىڭ باسشىلارى قاتىستى.