وڭىردە ەسەپ بەرۋ كەزدەسۋىن وتكىزگەن تۋريزم جانە سپورت ءمينيسترى ەرمەك مارجىقپاەۆ قوستاناي وبلىسىنىڭ تۇرعىندارىمەن جۇزدەستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
سالا باسشىسىمەن وتكەن كەزدەسۋگە وبلىستاعى سپورت فەدەراتسيالارىنىڭ باسشىلارى, تۋريزم باعىتىندا شارۋاسىن دوڭگەلەتىپ وتىرعان كاسىپكەرلەر, باق وكىلدەرى, قوعام بەلسەندىلەرى قاتىستى. 2025 جىلعا دەيىن مەملەكەتتىك-جەكەمەنشىك ارىپتەستىك نەگىزىندە 113 جاڭا سپورت نىسانى سالىنادى, قولدانىسقا بەرىلگەن 26 نىسانعا كۇردەلى جوندەۋ جۇرگىزىلىپ, قايتا جاڭعىرتىلادى. قوستاناي وبلىسىندا مەملەكەتتىك-جەكەمەنشىك ارىپتەستىك بايلانىس ارقىلى «توبىل-ارەنا» جابىق فۋتبول ستاديونى, «قوستاناي» سپورتتىق-ويىن-ساۋىق كەشەنى, 50 مەترلىك ءجۇزۋ باسسەينى جانە مۇز سپورت سارايى سياقتى نىساندار قايتا جاڭارتىلىپ, پايدالانۋعا بەرىلدى.
الداعى ۋاقىتتا مامانداندىرىلعان سپورت مەكتەپ-ينتەرنات-كوللەدجى اشىلماق. مينيستر قوستاناي وبلىسىندا قىسقى سپورت تۇرلەرى قارقىن الىپ كەلە جاتقانىن, بىراق جازعى سپورت تۇرلەرىنە دە باسا ءمان بەرۋ قاجەتتىگىن ايتتى.