تاريحى مىڭجىلدىقتارعا ۇلاسقان تاراز قالاسىندا اۋقىمدى جۇمىس اتقارىلىپ جاتىر. بولاشاقتا كونە شاھاردىڭ اۋماعى ۇلعايىپ, وبلىس ورتالىعىنا ماڭايداعى اۋدانداردان بىرنەشە ەلدى مەكەن مەن ساياجاي قوسىلاتىنى بەلگىلى بولدى. بۇل ءوز كەزەگىندە قالانىڭ ەكونوميكالىق الەۋەتىن ارتتىراتىن جاڭا باستامالارعا سەبەپشى بولاتىنى انىق.
بيىل باقىتجان ورىنبەكوۆتىڭ قالا تىزگىنىن ۇستاعانىنا ءبىر جىل تولدى. جىل ىشىندە وبلىس ورتالىعىندا اتقارىلعان جۇمىس از ەمەس. اسىرەسە قالاداعى توز-توزى شىققان تالاي كوشە جوندەلدى. جىلدار بويى جولدىڭ «جىرىن» جىرلاعان «بۋرىل» الابىنداعى كوشەلەردى قالپىنا كەلتىرۋ جۇمىستارى قارقىندى تۇردە جۇزەگە اسا باستادى.
قىركۇيەك ايىندا وڭىرگە اكىم بولىپ كەلگەن ەربول قاراشوكەەۆ ەلىمىزدەگى ەڭ ءىرى شاعىن اۋدانداردىڭ ءبىرى سانالاتىن « ۇلى دالا» شاعىن اۋدانى تۇرعىندارىنىڭ وزەكتى ماسەلەلەرىنە نازار اۋداردى. ءبىر سوزبەن ايتقاندا, وبلىس باسشىسى العاشقى جۇمىس كۇندەرىنىڭ بىرىندە جاڭا شاعىن اۋدان تۇرعىندارىنىڭ مۇڭىنا دەن قويدى.
«بۋرىل» الابى مەن « ۇلى دالا» شاعىن اۋدانىن ءبولىپ قاراۋ استە مۇمكىن ەمەس. قوعامدىق كولىك 15-شاعىن اۋدانعا قاتىناۋ ءۇشىن «بۋرىلدىڭ» كوشەلەرى ارقىلى وتەدى. باسقانى بىلاي قويعاندا, مۇنداعى قوعامدىق كولىك جۇرەتىن جولداردىڭ ابدەن توزىعى جەتكەن ەدى.
قالا تىزگىنىن ۇستاعان كەزىندە وسى جولدىڭ ماسەلەسىن شەشۋدى ءوز مىندەتى سانايتىنىن جەتكىزگەن تاراز قالاسىنىڭ اكىمى ب.ورىنبەكوۆ سوزىندە تۇردى. ارينە, مۇنداعى جول ماسەلەسى ءالى تولىققاندى شەشىمىن تاپقان جوق. ءبىر سوزبەن ايتقاندا, باستالعان جۇمىس جالعاسىپ جاتىر. ەڭ باستىسى حالىق كوكەيىندەگى وزەكتى ماسەلە جەرگىلىكتى اتقارۋشى بيلىكتىڭ نازارىنا ىلىكتى. ناتيجە بار.
ءبىرىنشى كەزەكتە مۇنداعى قوعامدىق كولىك جۇرەتىن ەستەمەسوۆ, مولداعاليەۆ كوشەلەرىنىڭ جولى جوندەلدى. وزگە دە بىرنەشە كوشەنىڭ جولىنا اسفالت جابىندىسى توسەلگەنىن ايتا كەتكەن ءجون. سونداي-اق كوشەك باتىر كوشەسىنىڭ اياق تۇسىنا جاقىن ماڭداعى « ۇلى دالا» شاعىن اۋدانىنا اپاراتىن جاڭا جول سالىندى. باسقا دا جول ماسەلەسى وڭىنان شەشىلە باستادى. ءبىر انىعى, « ۇلى دالا» شاعىن اۋدانىنىڭ تۇرعىندارى 2-3 جىل بويى «جىرلاعان» كوشەك باتىر كوشەسى مەن جاڭا شاعىن اۋداندى بايلانىستىراتىن جولدىڭ سالىنعانىنا بەك قۋانىشتى. ويتكەنى كولىك جۇرگىزۋشىلەرى ءدال وسى جولدىڭ ماسەلەسىن ۇزدىكسىز ايتىپ جۇرەتىن.
«وبلىس ورتالىعىندا 1 445 كوشە بار. ونىڭ ىشىندە 838 كوشەنىڭ اسفالت, 607 كوشەنىڭ شاعال تاس جولى بار ەكەنىن ايتا كەتكەن ءلازىم. جالپى ۇزىندىعى 86,8 شاقىرىمدى قۇرايتىن 44 جوبانى (144 كوشە, بۇرىلىس, وتكەل, تۇيىق جانە 7 جاياۋ جۇرگىنشى جولى) ورتاشا جوندەۋ جۇمىسى جوسپارلانعان ەدى. قازىرگى كەزدە 44 نىساندا مەردىگەر جانە تەحنيكالىق قاداعالاۋشى انىقتالىپ, قۇرىلىس-مونتاج جۇمىستارى جۇرگىزىلىپ جاتىر. بۇدان بولەك, قايتا جاڭعىرتۋ جۇمىستارى دا قولعا الىنعان ەدى. ناقتىراق ايتساق, 2 نىسان بويىنشا جوبانىڭ جالپى قۇنى – 1 ملرد 354 ملن 73 مىڭ تەڭگە, ۇزىندىعى 5,6 شاقىرىمدى قۇرادى. قازىرگى كەزدە ساڭىراق باتىر كوشەسى بويىنشا مەردىگەر «ارايسترويماركەت 2003» جشس-مەن, شوستاكوۆيچ كوشەسى بويىنشا مەردىگەر «Uniserv» جشس-مەن 2023 جىلعا قاراستىرىلعان جۇمىستار اياقتالدى.
قالا جولدارىنا اعىمدى جوندەۋ جۇمىستارىن جۇرگىزۋ ماسەلەسى بويىنشا دا بىرقاتار جۇمىس اتقارىلدى. ماسەلەن, 2023 جىلى مەردىگەر «نۇرلى جول-7» جشس-مەن 29 904 شارشى مەتردى, ۇنەمدەلگەن قاراجات ەسەبىنەن مەردىگەر «RusStroy» جشس-مەن 4 622 شارشى مەتردى اعىمدى جوندەۋ جۇمىستارى اياقتالدى. قالاداعى شاعىن اۋدانداردىڭ ىشكى جولدارىن اعىمدى جوندەۋگە «ەرلان جانە كومپانيا» جشس-مەن كەلىسىمشارت جاسالعان, ءتيىستى جۇمىس ۋاقتىلى اتقارىلماعاندىقتان, كەلىسىمشارت بۇزىلىپ, جوسىقسىز مەردىگەر دەپ تانىلدى. ودان بولەك, قازىرگى تاڭدا مەردىگەر «نۇرابدراحمان جولدارى» جشس-مەن ساياجاي الاپتارىنا باراتىن جولعا اعىمداعى جوندەۋ جۇمىستارى جۇرگىزىلىپ جاتىر. الداعى ۋاقىتتا بۇل ماسەلە دە شەشىمىن تابادى», دەيدى ب.ورىنبەكوۆ.
دەرەككە جۇگىنسەك, بۋرىل ا, ب, ۆ تۇرعىن الابىنا اسفالت جول جابىندىسىن توسەۋ جۇمىستارى بويىنشا جوبالاۋ-سمەتالىق قۇجاتتاما تولىققاندى ازىرلەنگەن ەكەن. جوبالاۋشى مەكەمە – «قۇرىلىس ينۆەست جوبا» جشس.
مۇنداعى جۇمىس جاز مەزگىلىندە باستالىپ, قازىرگى ۋاقىتتا تولىققاندى جۇرگىزىلىپ جاتىر. مەردىگەر مەكەمە «ارايسترويماركەت-2003» جشس-مەن 3139 ملن تەڭگەگە كەلىسىمشارت جاسالعان. رەسپۋبليكالىق بيۋدجەتتەن 100 ملن تەڭگە, وبلىستىق بيۋدجەتتەن 330 ملن تەڭگە قاراستىرىلعان.
«جوبا بويىنشا اسفالت جول جابىندىسىن توسەۋ جۇمىستارى 33,7 شاقىرىمدى قامتيدى. ياعني بۋرىل ا, ب, ۆ تۇرعىن الابىنداعى 75 كوشەگە اسفالت جابىندىسىن توسەۋ قاراستىرىلعان. شاكىروۆ, قاسىمبەكوۆ جانە باقبەرگەنوۆ كوشەلەرىنە 2 قابات اسفالت توسەلىپ, قۇدىق قاقپاقتارى قويىلىپ, جۇمىس تولىعىمەن اياقتالدى. مولداعاليەۆ كوشەسى بويىنشا 2 قابات 600 مەترلىك اسفالت توسەلىپ, قۇدىق قاقپاقتارى قويىلعان. سونىمەن قاتار مولداعاليەۆ كوشەسىنىڭ اسفالت جابىندىسىن توسەۋ جۇمىستارى ءتامامدالدى. ناقتىراق ايتقاندا, 5,5 شاقىرىم اسفالت جول جابىندىسى توسەلدى. قالعان قاراجات 2024 جىلعا قاراستىرىلىپ, نىساننىڭ تولىق قۇرىلىس-مونتاج جۇمىستارىن 2024 جىلى اياقتاۋ جوسپارلانىپ وتىر.
تاراز قالاسىنداعى «بارىسحان» تۇرعىن الابىنا اسفالت جول جابىندىسىن توسەۋ بويىنشا جوبالاۋ-سمەتالىق قۇجاتتامالار تولىق ازىرلەنگەن. جوبا بويىنشا ساراپتامانىڭ وڭ قورىتىندىسى الىنعان. جوبانىڭ سمەتالىق قۇنى – 1,6 ملرد تەڭگە. نىساننىڭ قۇرىلىس-مونتاج جۇمىستارىنا ۇلتتىق قوردان 100 ملن تەڭگە, وبلىستىق بيۋدجەتتەن 11,1 ملن تەڭگە بولىنگەن. مەردىگەر مەكەمە «Uniserv» جشس تاياۋدا عانا قۇرىلىس جۇمىستارىن باستاۋعا رۇقساتتاما الىپ, ىسكە كىرىستى. جالپى, 16,2 شاقىرىمدى قۇرايتىن 24 كوشەگە اسفالت جابىندىسى توسەلىپ قاراستىرىلعان. وسى جىلى بولىنگەن قاراجاتقا قوعامدىق كولىك جۇرەتىن 2 كوشەگە اسفالت جول جابىندىسى توسەلىپ جاتىر. تۇرعىندارمەن كەزدەسۋدەن كەيىن قۇرمانبەتوۆ كوشەسىنە توسەلەتىن اسفالت جول جابىندىسىن 6 مەتردەن 8 مەترگە ۇزارتتىق. تالاپقا ساي جاياۋ جۇرگىنشىلەر جولى مەن جول شەكاراسى قويىلدى. بۇگىنگى تاڭدا قۇرمانبەتوۆ كوشەسى تولىعىمەن اسفالتتالىپ, قىزىل قاينار كوشەسى اسفالتتاۋ ءۇشىن دايىندالىپ جاتىر. قالعان قاراجاتقا 2024 جىلى اسفالت جول جابىندىسىن توسەۋ جوسپارلانىپ وتىر», دەيدى ول.
شاھار باسشىسى كەلتىرگەن دەرەككە جۇگىنسەك, جول قاۋىپسىزدىگىن قامتاماسىز ەتۋدە دە ءبىرشاما جۇمىس قولعا الىنعان. ماسەلەن, قالالىق پوليتسيا باسقارماسى جول-تەحنيكالىق ينسپەكتسيا بولىمشەسىنىڭ نۇسقاماسىنا سايكەس مەردىگەر «سترويمونتاجGroup» جشس تاراپىنان قاڭتار-اقپان ايلارىندا 275 دانا جول بەلگىسى ورناتىلعان. جول-كولىك وقيعالارى ءجيى ورىن الاتىن اسا قاۋىپتى ۋچاسكەلەرگە 3 جاڭا كولىك باعدارشامى قويىلعان.
تاراز حالقىن تولعاندىرعان باستى ماسەلەنىڭ ءبىرى – اباي داڭعىلى بويىنان كوپىر قۇرىلىسىن باستاۋ. تۇرعىندار جىلدار بويى كوپىر ماسەلەسىن كوتەرگەنىمەن, اكىمدەر وتكىر ماسەلەنى نازاردان تىس قالدىرا بەرەتىن. وسى ولقىلىقتىڭ ورنىن تولتىراتىن كەز كەلدى. تاراز قالاسىنىڭ اكىمى ب.ورىنبەكوۆ جەرگىلىكتى جۇرتتى تولعاندىرعان ماسەلەنى شەشۋدى باستى ماقساتى ساناپ وتىر.
«وسى جىلى اباي داڭعىلى بويىنان 2 كوپىر سالۋ ءۇشىن جوبالىق-سمەتالىق قۇجات ازىرلەۋگە, مەملەكەتتىك ساراپتامادان وتكىزۋگە جەرگىلىكتى بيۋدجەتتەن 65 ملن تەڭگە ءبولىنىپ, جوبالاۋشى مەكەمە ء«دان-قو» جشس-مەن جالپى 58 ملن 499,9 مىڭ تەڭگەگە كەلىسىمشارت جاسالدى. قازىرگى تاڭدا اباي داڭعىلىنداعى جول وتكەلىن سالۋعا قۇجاتتار ازىرلەنىپ, مەملەكەتتىك ساراپتاماعا ۇسىنىلدى. 2024 جىلدىڭ اقپان ايىندا مەملەكەتتىك ساراپتاماعا ۇسىنىپ, ءساۋىر ايىندا قورىتىندىسىن الۋدى جوسپارلاپ وتىرمىز. تاراز قالاسىنان الماتى شاھارىنا قاراي شىعاتىن, تالاس وزەنى ارقىلى وتەتىن 2 كوپىردى قايتا جاڭعىرتۋ جۇمىسى بويىنشا مەردىگەر ء«دان-قو» جشس-مەن كەلىسىمشارت جاسالىپ, قازىرگى كەزدە جوبالىق-سمەتالىق قۇجاتتار ازىرلەنىپ جاتىر», دەيدى شاھار باسشىسى.
قالا اكىمىنىڭ ايتۋىنشا, وسى جىلدىڭ سەگىز ايىندا الەۋمەتتىك-ەكونوميكالىق دامۋ كورسەتكىشى بويىنشا اۋىز تولتىرىپ ايتارلىقتاي ناتيجەگە قول جەتكىزىلگەن. ماسەلەن, ونەركاسىپ ءونىمىنىڭ كولەمى 326,4 ملرد تەڭگەنى قۇراپ, 106,8 پايىزعا جەتكەن. اۋىلشارۋاشىلىق سالاسىنداعى جالپى ءونىم كولەمى 5,4 ملرد تەڭگەنى قۇراپ, 100,1 پايىزعا ورىندالىپتى. سونداي-اق نەگىزگى كاپيتالعا سالىنعان ينۆەستيتسيالاردىڭ كولەمى 69,2 ملرد تەڭگەگە جەتىپ, 91 پايىزدى قۇراعان.
«قۇرىلىس جۇمىستارىنىڭ كولەمى 32,2 ملرد تەڭگەگە جەتىپ, 99,4 پايىزعا ورىندالدى. پايدالانۋعا بەرىلگەن تۇرعىن ءۇي كولەمى 188 مىڭ شارشى مەترگە جەتىپ, 100,1 پايىزعا اتقارىلدى. ال بولشەك ساۋداداعى تاۋار اينالىمىنىڭ كولەمى 215,7 ملرد تەڭگەنى قۇراپ وتىر. بيىل 2020-2025 جىلدارعا يندۋستريالىق-يننوۆاتسيالىق دامىتۋدىڭ مەملەكەتتىك باعدارلاماسى اياسىندا ء«دامدى سەبەت» جاۋاپكەرشىلىگى شەكتەۋلى سەرىكتەستىگىنىڭ «ۇننان جاسالعان كونديتەرلىك ونىمدەردى ءوندىرۋدى ۇيىمداستىرۋ» جوباسى ىسكە اسىرىلدى. سونداي-اق قالا اۋماعىندا 2023-2024 جىلدارى جالپى قۇنى 32,2 ملرد تەڭگەنى قۇرايتىن 6 ينۆەستيتسيالىق جوبانى ىسكە اسىرۋدى جوسپارلاپ وتىرمىز. جوبالار ىسكە اسىرىلعاندا 884 جاڭا جۇمىس ورنى اشىلادى», دەيدى ول.
قالا اكىمى كەلتىرگەن دەرەككە زەر سالساق, جوعارىدا ايتقانىمىزداي, وبلىس ورتالىعىنىڭ اۋماعى الداعى جىلدارى ايتارلىقتاي ۇلعايماق. بايزاق جانە جامبىل اۋداندارىنىڭ اۋماعىنا ەنگەن 14 ەلدى مەكەن مەن 2 ساياجاي قالا قۇرامىنا وتەدى. ناتيجەسىندە, وبلىس ورتالىعىنا قوسىمشا 12 905,3 گەكتار جەر قوسىلادى.
جەرگىلىكتى اتقارۋشى بيلىك جۇمىسسىزدىقپەن كۇرەس ماسەلەسىنە دە ايرىقشا دەن قويىپ وتىر. بۇل باعىت بويىنشا سەگىز ايدىڭ وزىندە اۋىز تولتىرىپ ايتارلىقتاي جۇمىس اتقارىلعان.
«قازىرگى تاڭدا وبلىس ورتالىعىندا وڭىرلىك جۇمىسپەن قامتۋ كارتاسى دايىندالىپ, سوعان سايكەس 2023 جىلى 13 651 ادامدى جۇمىسقا ورنالاستىرۋ جوسپارلانعان. ونىڭ ىشىندە 1 475 ازامات ۇلتتىق جوبالار اياسىندا, 1 912 تۇرعىن سۋبسيديالاناتىن جۇمىس ورىندارىنا, 183 ازاماتقا مەملەكەتتىك قايتارىمسىز گرانت, 103 جاسقا شاعىن نەسيە بەرۋ, 265 ادامدى قىسقامەرزىمدى كۋرستارعا جىبەرۋ, 100 تۇرعىندى جۇمىس بەرۋشىلەردىڭ جۇمىس ورنىندا وقىتۋ, 651 ازاماتتى ونلاين-وقىتۋ, 885 قالا تۇرعىنىن كاسىپكەرلىك باعىتى بويىنشا وقىتۋ, 8 077 تۇرعىندى بوس جۇمىس ورىندارىنا ورنالاستىرۋدى جوسپارلاپ وتىرمىز. وڭىرلىك كارتا اياسىندا جۇمىسپەن قامتىلعانداردىڭ سانى 14 808 ادامدى قۇراپ وتىر. ونىڭ ىشىندە بەلسەندى ءىس-شارالار ارقىلى جۇمىسپەن قامتىلعانداردىڭ سانى – 1 554 ادام. بۇل باعىتتاعى جۇمىس الداعى ۋاقىتتا دا جالعاسادى», دەيدى قالا اكىمى.
ب.ورىنبەكوۆتىڭ ايتۋىنشا, «كاسىپكەرلىكتى دامىتۋ جونىندەگى ۇلتتىق جوبا» اياسىندا اتقارىلاتىن جۇمىستىڭ دا اۋقىمى زور. جوبا اياسىندا 12 176 قالا تۇرعىنىن جۇمىسپەن قامتۋ جوسپارلانعان. وسى جىلدىڭ 1 قىركۇيەگىندەگى دەرەككە جۇگىنسەك, بەلسەندى جۇرگىزىلگەن ءىس-شارالار ارقىلى جۇمىسپەن قامتىلعانداردىڭ ۇلەسى 10 012 ادامدى قۇراعان.
قازىرگى تاڭدا وبلىس ورتالىعىن اعىن سۋمەن قامتيتىن ارىق جۇيەلەرىنىڭ توزىعى جەتكەنى بەلگىلى. سول ارىق-اتىز جۇيەلەرىن قالپىنا كەلتىرۋ بويىنشا ناقتى جۇمىستار قولعا الىنىپ وتىر. جوبالىق-سمەتالىق قۇجاتتاما ازىرلەنگەن. قالا باسشىسىنىڭ ايتۋىنشا, جوبانى 2023-2025 جىلدار ارالىعىندا جۇزەگە اسىرۋدىڭ جولدارى قاراستىرىلعان.
«بۇل ماسەلەنى شەشۋ ءۇشىن بيىل قالا بيۋدجەتىنەن 940 ملن تەڭگە قاراجات قاراستىرىلدى. مەردىگەر مەكەمە – «جاسىل ەل-تاراز» جاۋاپكەرشىلىگى شەكتەۋلى سەرىكتەستىگى. قالانى كوگالداندىرۋ جانە جاسىل ايماق قۇرۋدىڭ وڭىرلىك جوسپارىنا سايكەس بيىل 15 مىڭ تال ەگۋ جوسپارلانعان. كوكتەم ايىندا 7 مىڭنان اسا كوشەت ەگىلدى. ەندى قالعان اعاش كوشەتتەرى كۇز ايىندا تولىقتاي ەگىلەدى. وسى ورايدا « ۇلى دالا» شاعىن اۋدانىنان ارنايى ساياباق ورنى ۇيىمداستىرىلاتىنىن ايتا كەتكەن ءجون. ۇلكەن اۋماقتى الاتىن بۇل دەمالىس ورنىنا 10 مىڭنان اسا تال وتىرعىزىلادى. وسىلايشا, شاھارداعى ەڭ ۇلكەن شاعىن اۋدان تۇرعىندارىنا ارنالعان سەرۋەن ورنى پايدا بولماق. قالاداعى قوقىس كونتەينەرلەرى دە تالاپقا ساي اۋىستىرىلىپ جاتىر. بۇگىنگە دەيىن 520 قوقىس كونتەينەرى ساتىپ الىنىپ, ءتيىستى ورىندارعا قويىلدى», دەيدى ب.ورىنبەكوۆ.
قالا تۇرعىندارىن بۇقارالىق سپورتپەن قامتۋدا جەرگىلىكتى اتقارۋشى بيلىك تاراپىنان ىلكىمدى جۇمىستار قولعا الىنعان. ناقتىراق ايتار بولساق, سەگىز ايدىڭ بەدەرىندە وبلىس ورتالىعىندا 218 سپورتتىق ءىس-شارا ۇيىمداستىرىلعان. وتكىزىلگەن بارلىق ءىس-شاراعا 23 542 ادام قاتىسقان. بۇدان بولەك, قالا اكىمدىگىنىڭ دەنەشىنىقتىرۋ جانە سپورت بولىمىنە قاراستى 35 سپورتتىق الاڭشا جەرگىلىكتى حالىقتىڭ يگىلىگىنە بەرىلگەن. مۇندا 7 925 بالانىڭ سپورتپەن تەگىن شۇعىلدانۋىنا بارلىق مۇمكىندىك قاراستىرىلعان. قازىرگى تاڭدا تاراز قالاسىندا دەنەشىنىقتىرۋ جانە سپورتپەن جۇيەلى تۇردە اينالىساتىن تۇرعىنداردىڭ سانى 177 489 ادامعا جەتكەن. بۇل قالا حالقىنىڭ 41 پايىزىن قۇرايدى. شاھار حالقىنىڭ سپورتپەن جۇيەلى تۇردە اينالىسۋى ءۇشىن تاراز قالاسىندا قولجەتىمدى 660 سپورت نىسانى جۇمىس ىستەيتىنىن اتاپ وتكەن ءجون.
قالاي دەسەك تە, وبلىس ورتالىعىندا اتقارىلىپ جاتقان جۇمىس از ەمەس. ماسەلەن, تۇرعىن ءۇي قورىندا 1 438 كوپپاتەرلى تۇرعىن ءۇي بار. تۇرعىن ءۇي قورىن جاڭعىرتۋ ماسەلەسى بويىنشا «وڭىرلەردى دامىتۋدىڭ 2020 جىلعا دەيىنگى باعدارلاماسى» اياسىندا 2011 جىلدان باستاپ جۇمىستار قولعا الىنعان. قالا اۋماعىندا 1 103 ءۇيدىڭ پايدالانۋعا بەرىلگەن مەرزىمى 30 جىلدان اسقان, ونىڭ ىشىندە 477 ءۇي كۇردەلى جوندەۋدەن وتكىزىلدى, قالعان 626 ءۇيدى جوندەۋدەن وتكىزۋ جوسپارلانعان. ءبىر سوزبەن ايتقاندا, كونە شاھارداعى تۇرعىن ءۇي ماسەلەسىن شەشۋ بويىنشا دا وبلىس ورتالىعىندا ىلكىمدى ىستەر قولعا الىنىپ وتىرعانى قۋانتادى.
«جالپى العاندا, 2022 جىلى 67 ءۇي جوندەلدى. 2023 جىلى 63 كوپقاباتتى ءۇيدى كۇردەلى جوندەۋدەن وتكىزۋ جوسپارلانىپ وتىر. بۇل ءۇشىن 5 ملرد 372 ملن 411 مىڭ تەڭگەگە قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنە بيۋدجەتتىك ءوتىنىم ۇسىنىلدى. سونىمەن قاتار بيىل 80,91 ملن تەڭگەگە «بايتەرەك» شاعىن اۋدانىنداعى №36,37 كوممۋنالدىق مەنشىكتە تۇرعان كوپقاباتتى تۇرعىن ۇيلەرگە كۇردەلى جوندەۋ جۇمىستارىن جۇرگىزۋ ءۇشىن مەملەكەتتىك ساتىپ الۋ كونكۋرسى جاريالانىپ, ۇتىپ العان مەردىگەر «اكم Group» جشس-مەن كەلىسىمشارت جاسالدى. 1 قىركۇيەككە دەيىنگى دەرەككە سەنسەك, پاتەر الۋ كەزەگىنىڭ تىزىمىندە 21 754 ازامات تىركەلىپ تۇر. مەملەكەتتىك قوردان پاتەر الۋ كەزەگىنىڭ ءتىزىمىن اشىق تۇردە جاريالاۋ, ەلەكتروندىق جۇيە ارقىلى قاراۋ جانە قاداعالاۋ بويىنشا ارنايى «ZhilFondTaraz» موبيلدىك قوسىمشاسى جۇمىس ىستەپ تۇر. ودان بولەك, كەزەك ءتىزىمى تاراز قالاسى اكىمدىگىنىڭ رەسمي سايتىندا ورنالاستىرىلعان. سونىمەن قاتار جاۋاپتى تۇلعالارمەن بىرلەسىپ جۇمىس ىستەۋدىڭ ارقاسىندا حالىقتى قولجەتىمدى باسپانامەن قامتۋ ماقساتىندا وڭتايلى يپوتەكالىق باعدارلامالار جۇزەگە اسىرىلىپ جاتىر», دەيدى باقىتجان امىربەك ۇلى.
قالا اكىمى كەلتىرگەن دەرەكتەرگە كوز جۇگىرتسەك, شاھاردا بارلىق سالا بويىنشا جۇمىس جۇيەلى تۇردە اتقارىلىپ جاتىر. ەڭ باستىسى قالا تۇرعىندارىنىڭ كوكەيكەستى ماسەلەسىنە اينالعان اۆتوكولىك جولدارىنىڭ پروبلەماسى وڭىنان شەشىلە باستادى. قالا ىشىندەگى جولداردىڭ جوندەلگەنى تۇرعىندار ءۇشىن ءتيىمدى ەكەنى داۋسىز. الەۋمەتتىك سالادا دا از جۇمىس اتقارىلىپ جاتقان جوق.
جامبىل وبلىسى