مينسكىدە (بەلارۋس) ءوتىپ جاتقان ۇقشۇ ۇجىمدىق قاۋىپسىزدىك كەڭەسىنىڭ سەسسياسىندا پرەزيدەنت قاسىم-جومارت توقاەۆ ەسىرتكى, قارۋ-جاراق اينالىمى, ترانسشەكارالىق قىلمىس جانە زاڭسىز ميگراتسيانىڭ وسۋىنە قازاقستان دا بەي-جاي قارامايتىنىن جەتكىزدى دەپ حابارلايدى Egemen.kz اقورداعا سۇيەنىپ.
قاسىم-جومارت توقاەۆ ۇقشۇ اياسىنداعى سەرىكتەستەردىڭ ادەتتەگى قاۋىپ-قاتەر دەڭگەيىنىڭ ۇلعايۋىنا, سونىڭ ىشىندە ەسىرتكى, قارۋ-جاراق اينالىمىنىڭ, ترانسشەكارالىق قىلمىس پەن زاڭسىز ميگراتسيانىڭ وسۋىنە قاتىستى الاڭداۋشىلىعىنا تۇسىنىستىكپەن قارايتىنىن مالىمدەدى. قازاقستان ۇيىمعا مۇشە مەملەكەتتەرمەن بىرگە وسى سىن-قاتەرلەرگە الداعى ۋاقىتتا دا توتەپ بەرۋگە ءازىر ەكەنىن جەتكىزدى.
ء«بىز ۇقشۇ قىزمەتىنىڭ ءادىس-ءتاسىلى مەن ستراتەگياسىن جولعا قويا وتىرىپ, زاماناۋي قاۋىپ-قاتەر مەن سىن-تەگەۋرىندەردى مىندەتتى تۇردە ەسكەرۋگە ءتيىسپىز. سونىمەن قاتار ۇقشۇ-عا مۇشە مەملەكەتتەردىڭ قاۋىپسىزدىگىنە قاتەر ءتونىپ كەلە جاتقانىن, ەگەر ونداي قاۋىپ بولسا دا, ونى ۇنەمى ايتا بەرۋدىڭ قاجەتى جوق دەپ ويلايمىن. تۇپتەپ كەلگەندە, قاۋىپ-قاتەر ءاردايىم بولعان. حالىقارالىق قوعامداستىقتىڭ بولمىسى وسىنداي. بۇل تاقىرىپتى قايتا-قايتا كوتەرۋ, ءبىزدى الدەكىمنەن قورقاتىنداي كورىنىس قالىپتاستىرادى. مۇنداي مالىمدەمەلەر مۇلدە قاتە تۇسىنىككە الىپ كەلۋى مۇمكىن, ءتىپتى قازىردىڭ وزىندە سولاي بولىپ كورىنەدى. قاتىسۋشى مەملەكەتتەردىڭ ابىروي-بەدەلىن جانە ولاردىڭ اسكەري-ساياسي الەۋەتى مەن قۋاتىن ەسكەرە وتىرىپ, ۇيىمنىڭ ريتوريكاسى قاتال, ايتسە دە بەلگىلى ءبىر دەڭگەيدە قيسىندى بولۋعا ءتيىس. ۇقشۇ بەدەلدى اسكەري-ساياسي ۇيىم رەتىندە ءوزىنىڭ جەتىستىكتەرىن پاش ەتتى. بىراق الدىمىزدا ۇيىمعا مۇشە مەملەكەتتەردىڭ كونسترۋكتيۆتى مۇددەسىنە ساي كەلۋگە ءتيىس جاڭا مىندەتتەر تۇر», دەدى مەملەكەت باسشىسى.
سونىمەن قاتار قاسىم-جومارت توقاەۆ ۇيىمنىڭ الەۋەتىن دامىتۋ جانە سىن-قاتەر مەن قاۋىپكە قارسى ءىس-قيمىل تەتىكتەرىنىڭ تيىمدىلىگىن ارتتىرۋ ءۇشىن ءبىر جىل ىشىندە جۇزەگە اسقان اۋقىمدى جۇمىستاردى دا اتاپ ءوتتى. پرەزيدەنت 2024 جىلدىڭ 1 قاڭتارىنان باستاپ قازاقستان ۇيىمعا توراعالىق ەتەتىنىن جانە وسى كەزەڭدە باسىمدىق بەرىلەتىن باعىتتاردى كەڭەيتىلگەن قۇرامداعى جيىن بارىسىندا جەتكىزەتىنىن ايتتى. قاسىم-جومارت توقاەۆ ەلىمىزدىڭ ۇيىمدى قارقىندى ءارى تەڭگەرىمدى دامىتۋعا, بارلىق مۇشە مەملەكەتتىڭ ۇلتتىق مۇددەلەرىن ەسكەرە وتىرىپ, ۇجىمدىق قاۋىپسىزدىكتى نىعايتۋعا نيەتتى ەكەنىنەن قۇلاعدار ەتتى.