سەناتتىڭ كەزەكتى وتىرىسىندا ۇكىمەت باسشىسىنان دەپۋتات جاننا اسانوۆا كەلەسى جىلدان باستاپ جويىلاتىن ۇلتتىق جوبالاردىڭ نەلىكتەن قىسقارتىلاتىنىن سۇرادى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
سەناتور پرەمەر-مينيستردەن 2024 جىلدىڭ 1 قاڭتارىنان باستاپ توقتاتىلاتىن ۇلتتىق جوبالارعا ارتىلعان مىندەت قانشالىقتى ىسكە اسقانىن سۇرادى.
«ۇكىمەت تاراپىنان مەملەكەتتىك جوسپارلاۋ جۇيەسىن رەفورمالاۋ بويىنشا كەشەندى جۇمىس جۇرگىزىلدى. تاسىلدەر وزگەرتىلىپ جەتىلدىرىلدى. ەندى ۇلتتىق جوبا بولىپ ناقتى الەۋمەتتىك-ەكونوميكالىق ماسەلەلەردى شەشۋگە باعىتتالعان قۇجات سانالادى. وسى ماسەلەلەردى شەشۋ ءۇشىن تولىعىمەن قارجىلاندىرىلعان قۇجات بولىپ ەسەپتەلەدى. وسىعان بايلانىستى ءۇش ۇلتتىق جوبا بەكىتىلدى: «قولايلى مەكتەپ», «اۋىلدىق جەردەگى دەنساۋلىق ساقتاۋدى جاڭعىرتۋ», «قولجەتىمدى ينتەرنەت». تيىسىنشە بۇرىنعى 10 ۇلتتىق جوبا قىسقارتىلدى. ولاردىڭ ىشىندەگى ينديكاتارلار, بارلىق ءىس-شارالار سالالىق كونسەپتسيالارىندا جانە مەملەكەتتىك ورگاندارىنىڭ دامۋ جوسپارلارىندا ەسكەرىلدى. وسىلايشا تۇسىنىكتى جانە ساپالى باعدارلامالىق قۇجاتتارى قابىلداندى. ولاردى قارجىلاندىرۋ زاڭمەن بەكتىلگەن تارتىپپەن جۇزەگە اسىرىلادى. وسى باعدارلامالىق قۇجاتتاردىڭ ىسكە اسۋىنىڭ بارىسى ۇكىمەتتىڭ دەڭگەيىندە قوعام مەن بيزنەس وكىلدەرىنىڭ قاتىسۋىمەن تالقىلانىپ وتىرادى. سونىمەن بىرگە رەسپۋبليكالىق بيۋدجەتتىڭ اتقارىلۋى تۋرالى جىل سايىنعى ۇكىمەتتىڭ ەسەبى شەڭبەرىندە پارلامەنتتە دە قارالاتىن بولادى», دەدى ءا.سمايىلوۆ.