بەلگىلى جازۋشى, حالىقارالىق «الاش» ادەبي سىيلىعىنىڭ لاۋرەاتى قۋانىش جيەنبايدىڭ «قاراپايىم ءھام تاماشا تاعدىرلار» اتتى جاڭا جيناعى جارىق كوردى.
بۇل كىتاپقا قالامى جۇردەك قالامگەردىڭ كەيىنگى جىلدارى جازعان ادەبيەت تۋرالى ويلارى مەن تانىمال قالامگەرلەردەن العان سۇحباتتارى, كوڭىلدى سەلت ەتكىزەر ويلى جازبالارى توپتاستىرىلعان. اسىرەسە ءابدىجاميل نۇرپەيىسوۆ, انەس ساراي, ساپار بايجانوۆ, سەيداحمەت بەردىقۇلوۆ, ادىلبەك ءابايدىلدانوۆ, عابيدەن قۇلاحمەت, ەرجۇمان سمايىل, ەربول شايمەردەن ۇلى, نەسىپبەك داۋتاەۆ, سەيىتقۇل وسپانوۆ, قازي داناباەۆ تۋرالى جازعان ەستەلىكتەرىندە ولاردىڭ ادامي بولمىسى مەن شىعارماشىلىعىن ارتىق-كەم بوياۋ قوسپاي, ءدال سۋرەتتەيدى. سونداي-اق مەرەكە قۇلكەنوۆ, الىبەك اسقاروۆ, قايسار ءالىم, سۇلەيمەن مامەت, باۋىرجان ومار ۇلى سەكىلدى قالامى قارىمدى زامانداستارىنىڭ شىعارماشىلىعى جايىندا جازعان ەسسەلەرى مەن ماقالالارىن وقىعاندا قانت قيىعىنداي ەرىپ كەتەسىز. ال كىتاپقا اتاۋى بەرىلگەن «قاراپايىم ءھام تاماشا تاعدىرلار» اتتى زەرتتەۋ ماقالاسىندا ورىستىڭ كورنەكتى جازۋشىسى ۆالەنتين ءراسپۋتيننىڭ تۋىندىلارىن جىلىكتەپ تالداپ, پاراساتتى وي تولعايدى. اۆتوردىڭ ايتۋلى تۇلعالاردان العان سۇحباتتارى دا مايدان قىل سۋىرعانداي شىنشىلدىقپەن جازىلعان.
ءبىر سوزبەن ايتقاندا, جازۋشىنىڭ وقىرمانعا جول تارتقان جيناعى – الەم ادەبيەتىندە ومىرگە كەلگەن تىڭ باستامالاردى قوزعاۋىمەن, ادام پسيحولوگياسىنداعى الۋان ءتۇرلى تارتىستاردى جەتكىزۋدەگى ءادىس-تاسىلدەرىمەن, زامانداس قالامگەرلەرى تۋرالى تولعانىستارىمەن, ەڭ اقىرى, قوعامداعى قۇبىلىستارعا جەكە كوزقاراسىمەن ەشكىمدى بەيجاي قالدىرمايدى.